- 2018-05-21 05:13:54
- ជីវិតតារា
គួរឲ្យសរសើរ ត្រឹមប៉ុន្មានឆ្នាំកូនប្រុស ពៅ គីសាន់ ផ្លាស់ពីរត់កង់បី មកជាប្រធានក្រុមពិធីការមួយមានសមាជិកជាង៥០នាក់
- 2018-05-21 05:13:54
- ចំនួនមតិ 0 | ចំនួនចែករំលែក 0
គួរឲ្យសរសើរ ត្រឹមប៉ុន្មានឆ្នាំកូនប្រុស ពៅ គីសាន់ ផ្លាស់ពីរត់កង់បី មកជាប្រធានក្រុមពិធីការមួយមានសមាជិកជាង៥០នាក់
ចន្លោះមិនឃើញ
កូនប្រុសតារាជើងចាស់ ពៅ គីសាន់ គឺលោក គីសាន់ រ៉ៃយ៉ា ដែលប៉ុន្មានឆ្នាំមុន ប្រិយមិត្តខ្លោចចិត្តអាណិត ត្បិតធ្លាក់ខ្លួនពីតារាទៅរត់រ៉ឺម៉កកង់បីយកកម្រៃជួយគ្រួសារនោះ ឥឡូវលោករកឃើញជីវិតប្រសើរជាងមុនបន្តិចហើយ ក្រោយតស៊ូប៉ុន្មានឆ្នាំ។
កូនប្រុសលោក ពៅ គីសាន់ បានធ្វើឲ្យទស្សនិកជនចាប់អារម្មណ៍ចំពោះការប្រែប្រួលជីវិត ក្រោយពីលោកបានប្រកាសនៅលើហ្វេសប៊ុករបស់លោកទទួលរៀបចំកម្មវិធីនានា ដូចជាមង្គលការ ខួបកំណើត ឬពិធីជប់លៀងផ្សេងៗ ខុសពីប៉ុន្មានឆ្នាំមុន លោកត្រឹមជាអ្នករត់រ៉ឺម៉កកង់បីនៅម្ដុំព្រែកប្រា បន្ថែមពីលើអាជីពជាតារាដែលមិនសូវមានផ្លែផ្កា។
ឆ្លើយប្រាប់ Sabay គីសាន់ រ៉ៃយ៉ា ថា លោកគឺជាប្រធាននៃក្រុមពិធីការមួយមែន ឈ្មោះថា "គីសាន់ រ៉ៃយ៉ា តន្ត្រី"។ បច្ចុប្បន្ន ក្រុមនេះ មានសមាជិកតារាចម្រៀងដល់ទៅជាង ៥០នាក់ មានទាំងជើងចាស់ ជើងថ្មី និងតារាចម្រៀង ប្រភេទ Original Songទៀត។ "បាទបង ខ្ញុំអាចនិយាយបានថាជាប្រធាន ព្រោះខ្ញុំជាអ្នកទទួលការងារពីអតិថិជន និងចាត់ចែងអ្វីៗទាំងអស់"។
ក្រុមពិធីការរបស់ រ៉ៃយ៉ា ទើបតែចាប់ផ្ដើមលេចមុខលេចមាត់នៅឆ្នាំ ២០១៨ នេះ ក្រោយអតិថិជនក៏ចាប់ផ្ដើមស្គាល់ និងទទួលយកសេវាកម្មរបស់លោកជាបន្តបន្ទាប់។ យ៉ាងណា ក្រុមនេះមិនមែនទើបតែកើតឡើងនៅឆ្នាំនេះទេ។ តាមប្រធានក្រុមវ័យ ៣២ឆ្នាំរូបនេះ គឺបានកើតឡើងតាំងពីមុនលោកប្រកបអាជីពរត់រ៉ឺម៉កកង់បីទៅទៀត។
“ខ្ញុំធ្វើការងារនេះយូរហើយបង គឺ៧-៨ឆ្នាំហើយ គ្រាន់តែតិចតួចតូចតាច ផ្សំនឹងយើងកាលណោះនៅក្មេងខ្ចី មិនសូវមានបទពិសោធន៍ផង ក៏មិនបានបញ្ចេញឲ្យគេដឹងចឹងណាបង ទើបតែឥឡូវយើងមានបទពិសោធន៍ច្រើន អាចធ្វើវាបាន ទើបបញ្ចេញឲ្យគេដឹងទៅ!”។
បែបនេះក្ដី កូនប្រុសច្បងក្នុងគ្រួសាររូបនេះអះអាងថា ក្រុមរបស់លោកមិនទាន់ជាក្រុមធំមួយដូចក្រុមរបស់រៀមច្បងផ្សេងទៀតនោះទេ ព្រោះលទ្ធភាពរបស់លោកនៅទាបដែរ។ ប៉ុន្តែលោកអះអាងថា អាចទទួលរៀបកម្មវិធីរបស់អតិថិជនបានគ្រប់ទាំងអស់។ "ខ្ញុំអាចរៀបចំបានទាំងអស់បង ហើយមួយវិញទៀត ឧទាហរណ៍ថា បើអតិថិជនទាក់ទងថ្ងៃនេះ ហើយចង់រៀបចំស្អែក ពោលគឺរយៈពេលតែមួយថ្ងៃ ក៏ខ្ញុំអាចរៀបចំធ្វើឲ្យទាន់ដែរបង...ប៉ុន្មានថ្ងៃទៀតនេះ ខ្ញុំនឹងរៀបចំកម្មវិធីធំមួយឲ្យស្ថានទូតអាមេរិកដែរ"។
គីសាន់ រ៉ៃយ៉ា គឺជាតារាសម្ដែងមួយរូប ភាគច្រើនប្រិយមិត្តឃើញការសម្ដែងរបស់លោកជាតួអ្នកលេង។ ដោយសារកម្រៃពីសិល្បៈតិចតួចពេក ក្នុងនាមជាបង្គោលគ្រួសារ លោកក៏បំបែកមុខរបរលក់បាយមួយទៀត រួមទាំងឆ្លៀតរត់រ៉ឺម៉កកង់បីយប់ៗទៀតអំឡុងឆ្នាំ២០១៥។ យ៉ាងណាក៏ដោយ ចំណូលពីមុខរបរទាំងពីរខាងលើ ក៏មិនអាចជួយគ្រួសារលោកឲ្យរស់នៅស្រួលឡើយ។
រហូតមកដល់ឆ្នាំ ២០១៤ លោកបានចូលធ្វើការនៅទូរទស្សន៍ MyTV ក្រោមការផ្ចុងផ្ដើមពីបងប្រុសម្នាក់ ដែលមានឱកាសឲ្យលោករៀនសូត្រការងារផ្សេងៗ រហូតបានពង្រីកក្រុមទទួលរៀបចំពិធីការ ទើបជីវភាពបានប្រសើរបន្តិច។ "គ្រាន់ជាងមុនបន្តិច ប៉ុន្តែមិនទាន់ផុតពិបាកទេបង រាល់ថ្ងៃខ្ញុំរកតែឯង ប៉ាក៏ឈឺ ម៉ាក់ក៏ឈឺនៅពេទ្យ តិចទៀតជិះម៉ូតូយកលុយទៅឲ្យម៉ាក់នៅពេទ្យទៀតឥឡូវហើយ!"។
រ៉ៃយ៉ា អះអាងថា នឹងប្រឹងប្រែងមិនឲ្យអតិថិជនខកចិត្ត និងរំពឹងថា ក្រុមពិធីការរបស់លោកនឹងមានការទទួលស្គាល់ ជាបច្ច័យជីវភាពគ្រួសារកាន់តែប្រសើរដែរ៕
