ព័ត៌មានខ្លះៗពី ទំនាក់ទំនងស្នេហា Suzy និង Lee Dong Wook

2018-05-22 07:50:00
ព័ត៌មាន

2018-05-22 07:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ទំនាក់ទំនងស្នេហារវាងតារាចម្រៀង Suzy និងតារាសម្ដែង Lee Dong Wook បានក្លាយជាព័ត៌មានដ៏ល្បីមួយ ដោយសារតែពួកគេទាំងពីរនាក់មិនដែលធ្លាប់សម្ដែងរឿងជាមួយគ្នា និងកម្រឡើងកម្មវិធីទូរទស្សន៍រួមគ្នា។ ពួកគេបានជួបគ្នា គឺនៅពេលដែលមានការជួបជុំជាលក្ខណៈឯកជនតែប៉ុណ្ណោះ។

ពាក្យចចាមអារ៉ាមពាក់ព័ន្ធនឹងទំនាក់ទំនងរបស់តារាទាំង២រូបនេះ កើតមានឡើងក្រោយពួកគេត្រូវបានប្រទះឃើញនៅជាមួយគ្នាដូចគូស្នេហ៍ក្នុងតំបន់ Cheongdam Dong។ សាក្សីដែលបានប្រទះឃើញពួកគេនោះ បាននិយាយថា តារាសម្ដែង Lee Dong Wook មើលទៅហាក់ដូចជាថ្នាក់ថ្នម និងមើលថែ Suzy ណាស់ ដែលនរណាមើលមក ក៏ថាពួកគេជាគូស្នេហ៍នឹងគ្នាដែរ។

ក្រោយពាក្យចចាមអារ៉ាមទាំងនេះបានផ្សព្វផ្សាយ ខាងផលិតកម្មរបស់តារាទាំង២នេះ បានបកស្រាយថា ពួកគេកំពុងនៅស្វែងយល់ចិត្តគ្នានៅឡើយ ហើយបានណាត់ជួបគ្នាម្ដង ឬក៏ពីរដងតែប៉ុណ្ណោះ។

បើតាមមិត្តជិតស្និទ្ធរបស់ពួកគេវិញក៏បានបញ្ជាក់ដែរថា Suzy និង Lee Dong Wook មិនទាន់មានទំនាក់ទំនងស្នេហាជាផ្លូវការនៅឡើយទេ នៅពេលដែលព័ត៌មានចាប់ផ្ដើមបែកធ្លាយនោះ។ រហូតដល់ពេលដែលបណ្ដាញសារព័ត៌មានចាប់ផ្ដើមចាប់អារម្មណ៍ខ្លាំង ក៏ពេលនោះពួកគេសម្រេចចិត្តទាក់ទងគ្នាជាផ្លូវការតែម្ដង។

“Lee Dong Wook និង Suzy មិនទាន់ទាក់ទងគ្នាជាផ្លូវការទេ ដូច្នេះហើយពួកគេឧស្សាហ៍ដើរលេងក្រៅជាមួយគ្នា ទៅហាងកាហ្វេ ទៅនេះទៅនោះ។ ខ្ញុំគិតថា បើទោះបីជាមានអ្នកលួចថតរូបរបស់ពួកគេ ក៏គ្មានអ្វីគួរឲ្យសង្ស័យទៀតដែរ។ ពួកគេមានការភ្ញាក់ផ្អើលជាមួយព័ត៌មានបែកធ្លាយពីទំនាក់ទំនងស្នេហានេះដែរ ប៉ុន្តែពួកគេទាំង២ពិតជាពេញចិត្តគ្នាមែន ដូច្នេះហើយខ្ញុំគិតថា ពួកគេសម្រេចចិត្តទទួលស្គាល់ពាក្យចចាមអារ៉ាមនេះ ហើយចាប់ផ្ដើមទាក់ទងគ្នាជាផ្លូវការតែម្ដង" នេះបើតាមមិត្តជិតស្និទ្ធរូបនោះបញ្ជាក់៕

ប្រភព៖ Koreaboo ប្រែសម្រួល៖ អន សុភក្ត្រា