តារា៥ដួងជួបរឿងស៊យ រងគ្រោះអស់ប្រាក់សន្ធឹកព្រោះចោរលួចមិនប្រណី

2018-06-12 08:24:05
ជីវិតតារា

2018-06-12 08:24:05
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗនេះ តារាជាច្រើនជួបរឿងស៊យ ខាតអស់ប្រាក់និងទ្រព្យសម្បត្តិមានតម្លៃ ដោយសារចោរលួច ខ្លះត្រូវចោរឆក់ ធ្វើឲ្យពួកគេស្ដាយរបស់ដែលខំប្រឹងរកពីការងារសិល្បៈយ៉ាងលំបាក។

១. កញ្ញា សុភ័ក្រ កុសុម៉ា ស្ទើរតែគាំងបេះដូង ពេលត្រូវចោរឆក់ទូរស័ព្ទម៉ាក Iphone 7 plus ពណ៍ក្រហម តម្លៃ ៩៩៩ដុល្លារ ដែលរូបនាងបានទិញពីប្រទេសអូស្ត្រាលី។ ខណៈប្អូនរបស់ពិធីការីនីសំបូរប្រជាប្រិយភាពរូបនេះកាន់ទូរស័ព្ទបម្រុងថតរូបឲ្យ ស្រាប់តែមានបុរសម្នាក់រាងស្គម ស្លៀកខោពណ៌ប្រផេះ អាវដៃវែងក្រឡាជិះម៉ូតូមកយឺតៗ រួចឆក់យកទូរស័ព្ទដៃទៅបាត់។

អ្វីដែលខ្លួនសោកស្ដាយបំផុត គឺឯកសារសំខាន់ៗជាច្រើននៅក្នុងនោះ បើគិតជាលុយមិនក្រោម ៣ ទៅ ៤ពាន់ដុល្លារអាមេរិកនោះទេ។

២. កញ្ញា ណា សាឌី ត្រូវចោរលួចកាត់កញ្ចក់រថយន្តអស់មួយចំហៀងនៅក្នុងបរិវេណបុរីដែលពិធីការីនីរូបនេះស្នាក់នៅ។ តារាមានសមត្ថភាពនិយាយភាសាអង់គ្លេសបានល្អរូបនេះ រាល់ដងតែងចតឡាននៅមុខផ្ទះ ព្រោះអាងក្នុងបុរីមានសន្តិសុខការពារ តែនូវជួបរឿងស៊យទាល់តែបាន។

៣. យាយ យ៉យ ត្រូវចោរឆក់កាបូបទាំងព្រឹកពេលជិះ PassApp ។ នាយព្រែកជាកូនបានបញ្ជាក់ថា របស់ទ្រព្យដែលបាត់រួមមាន លុយជិត១ពាន់ដុល្លារ ចិញ្ចៀនពេជ្រមួយវង់ រួមទាំងទូរស័ព្ទដៃមួយគ្រឿង សរុបអស់ជិត៣ពាន់ដុល្លារ ធ្វើឲ្យតារាកំប្លែង យាយ យ៉យ យំផងភ័យផង ព្រោះស្ដាយកម្លាំងញើសឈាមខំរក។

៤. លោក សាយ សៀរ៉ា បានសំដែងការហួសចិត្តដែលចោរមួយក្រុមបានលួចស្លាកលេខរថយន្តទាំងមុខនិងក្រោយរបស់លោក បូករួមនឹងស្លាកលេខចំនួន១០ទៀត របស់អ្នកជិតខាងដែលរស់នៅក្នុងបុរី។ តារាសម្ដែងរូបនេះ មិននឹកស្មានថាសូម្បីទុករថយន្តក្នុងបុរីហើយ នៅតែចោរហ៊ានធ្វើសកម្មភាពបានបែបនេះសោះ។

រូបភាព៖ FB Panha sith

៥. លោក បញ្ញា សិទ្ធ ជួបហេតុការណ៍ចោរឆក់ទូរស័ព្ទ ដែលធ្វើឲ្យពិធីករសាច់សរូបនេះស្ដាយរបស់ទ្រព្យដែលខ្លួនខំរកបានមកយ៉ាងលំបាក។ យ៉ាងណាមិញ នៅក្នុងទូរស័ព្ទដៃនោះមានឯកសារ ក៏ដូចជារូបថតអនុស្សាវរីយ៍ជាច្រើននៅពេលចោរឆក់យកទៅបាត់ ដូច្នេះធ្វើឲ្យស្ដាយស្រណោះយ៉ាងខ្លាំង៕

អត្ថបទ៖ លឹម សុនា