- 2018-06-14 03:22:48
- ព័ត៌មាន
បញ្ហាពិតជាកើតមានមែន នេន ទុំ ចូលមន្ទីរនៅសហរដ្ឋអាមេរិកនាថ្ងៃម្សិលមិញ
- 2018-06-14 03:22:48
- ចំនួនមតិ 0 | ចំនួនចែករំលែក 0
បញ្ហាពិតជាកើតមានមែន នេន ទុំ ចូលមន្ទីរនៅសហរដ្ឋអាមេរិកនាថ្ងៃម្សិលមិញ
ចន្លោះមិនឃើញ
ដូចនឹងការខ្វល់ខ្វាយតាំងពីមុនចេញដំណើរពីកម្ពុជាទៅម្ល៉េះ នេន ទុំ ប្រាប់ថា លោកមានការបារម្ភច្រើនរឿងក្នុងការបង្ហាញខ្លួនលើទឹកដីថ្មី មនុស្សថ្មី បរិយាកាសថ្មី។ ជាក់ស្ដែង បញ្ហាមួយចេញពីកង្វល់ទាំងនោះ ពិតជាកើតឡើងមែន រហូតដល់លោកត្រូវបង្ខំចិត្តចូលទៅមន្ទីរពេទ្យទាល់តែបាន។
នេន ទុំ ប្រាប់ថា តាំងពីជាន់ដីអាមេរិកថ្ងៃទី១ លោកដឹងថាខ្លួនឯងមានបញ្ហាប្លែកទៅហើយ នោះគឺការចាញ់អាកាសធាតុ។ "គ្រាន់តែទៅដល់ឈឺរហូតបងអើយ...ចាញ់អាកាសធាតុ នៅនេះត្រជាក់ពេក តឹងច្រមុះ ផ្ដាសាយ ផ្សំនឹងការងាររវល់ជាប់ផង អត់បានពេលសម្រាកលេបថ្នាំជាប់រហូត"។
នេះជាស្ថានភាពសម្រាប់អ្នកទៅដល់ទឹកដីថ្មីលើកដំបូង ដែលតាមការសាកសួរលោកថា គ្រប់គ្នាសុទ្ធតែជួបបញ្ហានេះដូចគ្នា ក្នុងនោះអ្នកខ្លះយូរ អ្នកខ្លះឆាប់ៗជាងប៉ុណ្ណោះ។ យ៉ាងណាក៏ដោយ នេន ទុំ បញ្ជាក់ថា ស្ថានភាពលោកកាន់តែវិវត្ត ទើបត្រូវតែបង្ខំចិត្តទៅរកគ្រូពេទ្យថ្មីៗនេះ។ "វាអត់បាត់សោះ អីចឹងក៏ទៅជួបពេទ្យម្សិលមិញហ្នឹង ក្រោយពេលពិនិត្យហើយ ពេទ្យប្រាប់ថា អត់អីទេ វាជាជំងឺចាញ់អាកាសធាតុធម្មតា ហើយគេឲ្យលេបថ្នាំជាប់ចំនួន ១២ថ្ងៃជាវិញហើយ"។
នេន ទុំ បានដល់អាមេរិកលើកទី១បំផុតក្នុងឆាកជីវិត កាលពីថ្ងៃទី ០៩ ឧសភា ក្នុងបេសកកម្មរយៈពេលវែងមួយដល់ទៅជាង ៣ខែ។ នៅទីនោះលោកថា ប្លែកភ្នែក ចម្លែកអារម្មណ៍ និងសប្បាយរីករាយខ្លាំង ក្នុងនោះ បងប្អូនខ្មែររស់នៅសហរដ្ឋអាមេរិកស្វាគមន៍ និងរាប់អានលោកណាស់ ដោយពួកគេបាននាំលោកដើរកម្សាន្តស្ទើរគ្រប់កន្លែង ធ្វើឲ្យលោកមានអារម្មណ៍កក់ក្ដៅមែនទែន។
លោកថា បញ្ហាតែមួយគត់ដែលរំខានបេសកកម្មរបស់លោកលើទឹកដីអាមេរិកលើកនេះ គឺជំងឺពីការចាញ់អាកាសធាតុនោះឯង។ "វាធ្វើទុក្ខខ្លាំងពេក តឹងច្រមុះ តឹងទៅៗ មានពេលខ្លះ ទាល់តែលួចក្រេបស្រាបន្តិចឲ្យក្ដៅ បានច្រៀងកើតណាបង!"។
រយៈពេលប្រមាណ១ខែលើទឹកដីសហរដ្ឋអាមេរិក នេន ទុំ បានចេញច្រៀងតាមបណ្ដារដ្ឋ និងក្រុងដែលមានបងប្អូនខ្មែររស់នៅ បានជាច្រើនរួចមកហើយ ហើយថា លោកនៅមានបេសកកម្មច្រើនទៀត មុនពេលដល់វេលាត្រឡប់មកកម្ពុជាវិញនៅរង្វង់ប្រមាណ ២ខែទៀត៕
