- 2018-07-11 04:09:04
- ជីវិតតារា
រំលឹកពីអតីតតារាសម្ដែងល្បីឈ្មោះ ពេញវង្ស រស្មី ដែលឃ្លាតមាតុភូមិ ឆ្ងាយសិល្បៈជិត ២០ឆ្នាំ
- 2018-07-11 04:09:04
- ចំនួនមតិ 0 | ចំនួនចែករំលែក 0
រំលឹកពីអតីតតារាសម្ដែងល្បីឈ្មោះ ពេញវង្ស រស្មី ដែលឃ្លាតមាតុភូមិ ឆ្ងាយសិល្បៈជិត ២០ឆ្នាំ
ចន្លោះមិនឃើញ
អតីតតារាសម្ដែងល្បីឈ្មោះ អ្នកស្រី ពេញវង្ស រស្មី ដែលបច្ចុប្បន្នកំពុងរស់នៅប្រទេសបារាំង បានពោលនឹករលឹកដីប្រទេសកំណើត ក្រោយបានចាកចេញពីអស់កាលជិត២០ឆ្នាំរួចមក។
ផ្ដើមពីហេតុផលនេះអ្នកស្រី ពេញវង្ស រស្មី រមែងបង្ហោះសារនានាពីកម្ពុជា។ "អរុណសួស្ដី ប្រទេសកម្ពុជា មាតុភូមិជាទីស្នេហានៃខ្ញុំ"។ សារចុងក្រោយបង្អស់អ្នកស្រីពីកម្ពុជា ទើបបង្ហោះនាថ្ងៃម្សិលមិញ។ បន្ថែមពីលើនេះ អ្នកស្រីនៅបានឆ្លើយប្រាប់ Sabay ទៀតថា ច្បាស់ណាស់ អ្នកស្រីពិតជានឹករលឹកទឹកដីកំណើតខ្លាំងពិតមែន! បើទោះធ្លាប់ចេញចូលមកលេងប្រទេសកំណើត និងក្រុមគ្រួសារ២-៣លើកហើយក៏ដោយ។
អ្នកស្រីទើបឡើងមកកម្ពុជាចុងក្រោយកាលពី២ឆ្នាំមុន មកលេងក្រុមគ្រួសារ ប៉ុន្តែនៅតែមិនអាចផ្ដាច់អារម្មណ៍នឹករលឹកទឹកដីកំណើតបានឡើយ។ “នៅស្រុកគេ ឃើញគេរីកចម្រើនជឿនលឿន ដល់អីចឹងក៏ចេះតែមានអារម្មណ៍នឹកគិត ចង់ឲ្យស្រុកយើងមានការរីកចម្រើនដូចគេអីចឹងណា ហើយមួយទៀត គឺនឹកបងនឹកប្អូន នឹកអនុស្សាវរីយទាំងឡាយនៅស្រុកកំណើត ក៏ដូចជាប្រទេសកំណើត!”។
អតីតតារាសម្ដែងមានទម្រង់មុខមូលពេញដោយមន្តស្នេហ៍រូបនេះ បញ្ជាក់ថា ជាមួយអារម្មណ៍នឹកមិនដាច់នេះ អ្នកស្រីគ្រោងនឹងឡើងមកកម្ពុជាទៀត នៅពេលមិនយូរនាពេលខាងមុខ។ បើមិនដូច្នេះ ហោចណាស់ ក៏ស្នើឲ្យអ្នកម្ដាយ និងបងស្រីឡើងទៅលេងនៅបារាំងវិញដែរ ប្រសិនបើជាក់ស្ដែងមានធុរៈមិនអាចឡើងមកបាន។
ពេញវង្ស រស្មី មានស្រុកកំណើតនៅខេត្តកំពង់ធំ។ អ្នកស្រីគឺជាអតីតតារាសម្ដែង និងជាពិធីការិនីទូរទស្សន៍ ប្រសូតចេញពីការប្រឡងកម្មវិធីបវរកញ្ញាមួយនាឆ្នាំ ១៩៩៤ ដែលពេលនោះ អ្នកស្រី បានជាប់ចំណាត់ថ្នាក់លេខ២ (First Runner Up) ។ ក្រោយមក១ឆ្នាំ អ្នកស្រីក៏បានប្រឡូកសិល្បៈធ្វើជាតារាសម្ដែង និងពិធីការិនីទូរទស្សន៍។
ស្នាដៃលេចធ្លោរបស់អ្នកស្រីនាពេលនោះ មានតាមរយៈរឿងជាច្រើនដូចជា "ជាតិស្ត្រី" របស់លោក ហ្វៃ សំអាង និងរឿង "ចាបស្រុក ចាបព្រៃ" ជាដើម មុនពេលចាកចេញទៅរស់នៅប្រទេសបារាំងនៅឆ្នាំ ២០០០។ នៅដើមឆ្នាំ ២០០៩ អ្នកស្រីក៏បានរៀបអាពាហ៍ពិពាហ៍ ជាមួយអាណិកជនខ្មែរនៅបារាំងដែលមានដើមកំណើតនៅខេត្តកំពង់ធំដូចគ្នា។ មកដល់បច្ចុប្បន្ន អ្នកទាំងពីរមិនទាន់មានបុត្រទេ។
តាមការបញ្ជាក់របស់ ពេញវង្ស រស្មី គឺអ្នកស្រី គ្រោងនឹងវិលមករស់នៅស្រុកខ្មែរវិញនៅពេលជីវិតឈានចូលដល់វ័យចាស់ ជាមួយនឹងការតាំងចិត្តថា "មិនព្រមស្លាប់ចោលឆ្អឹងលើដីស្រុកគេដាច់ខាត"។ នៅពេលនោះ អ្នកស្រីអះអាងទៀតថា នឹងមានគម្រោងខ្លះៗ ដើម្បីចូលរួមចំណែកស្ថាបនាសង្គមជាតិ និងប្រទេសកំណើតរបស់អ្នកស្រី៕
