- 2018-07-12 03:22:43
- ព័ត៌មាន
ប្រុងយ៉ាងម៉េចអីចេះ! យុគ ចិន្តា ស្រាប់តែចង់ឲ្យកូនស្រីក្លាយជាអ្នកសារព័ត៌មានល្បី
- 2018-07-12 03:22:43
- ចំនួនមតិ 0 | ចំនួនចែករំលែក 0
ប្រុងយ៉ាងម៉េចអីចេះ! យុគ ចិន្តា ស្រាប់តែចង់ឲ្យកូនស្រីក្លាយជាអ្នកសារព័ត៌មានល្បី
ចន្លោះមិនឃើញ
នាមជាអាណាព្យាបាល យុគ ចិន្តា បានផ្ចុងផ្ដើមកូនច្រើន ដោយបានជំរុញឲ្យកូនស្រីតែមួយ ចេះជំនាញជាច្រើនក្នុងសិល្បៈ ប៉ុន្តែនៅមានចំណុចមួយទៀត ដែលអ្នកនាង ចង់ជំរុញកូនស្រីដែរនោះ គឺធ្វើជាអ្នកសារព័ត៌មាន។
យុគ ចិន្តា មានបំណងបែបនេះ ទន្ទឹមនឹងខ្លួនឯងជាអ្នកសិល្បៈផង និងជាអ្នកធ្វើការក្នុងជួរអ្នកសារព័ត៌មានផង ពោលគឺជាពិធីការិនីទូរទស្សន៍។ អ្នកម្ដាយរូបនេះ អះអាងថា អាជីពជាអ្នកសារព័ត៌មាន គឺជាអាជីពគួរឲ្យមោទនភាពមួយសម្រាប់ស្ត្រី ជាក់ស្ដែង អ្នកនាងមានមុខមកដល់សព្វថ្ងៃ ក៏ដោយសារការងារជាអ្នកអត្ថាធិប្បាយព័ត៌មានទូរទស្សន៍នេះមួយផ្នែកដែរ។
“សម្រាប់ខ្ញុំ គឺជាអ្នកនិយាយព័ត៌មាន អីចឹងចង់ឲ្យគាត់ក្លាយជាអ្នកសារព័ត៌មាន គឺចង់ខ្លាំងតែម្ដង ហើយចង់ឲ្យគាត់ក្លាយអ្នកសារព័ត៌មានល្បីតែម្ដង ប៉ុន្តែគួរឲ្យស្ដាយ អមគាត់អត់ព្រម"។ យុគ ចិន្តា ថ្លែង។
អតីតពិធីការិនីទូរទស្សន៍ IBC រូបនេះ បានបញ្ជាក់ថា ជាប់ជាមួយបំណងនេះ អ្នកនាង ធ្លាប់បាននិយាយជាមួយកូនស្រីហើយ ប៉ុន្តែមិនទទួលបានលទ្ធផល ព្រោះកូនស្រីបដិសេធន៍។ "សម្រាប់ អម គាត់អត់ចង់មកខាងនេះទេ គឺគាត់ចូលចិត្តតែសិល្បៈប៉ុណ្ណោះ ពិសេសគឺការច្រៀង គាត់ចូលចិត្តខ្លាំងតែម្ដង!”។
ចិញ្ចឹមកូនស្រី ដោយឲ្យសេរីភាពលើការសម្រេចចិត្ត យុគ ចិន្តា ប្រាប់ថា ក៏មិនបង្ខំកូនស្រីដែរ។ បច្ចុប្បន្ន អ្នកនាងជំរុញបន្ថែមលើអ្វីដែល អម ចូលចិត្ត គឺសិល្បៈ ដែលមកទល់នឹងពេលនេះ កូនស្រីចេះចាំជំនាញជាច្រើន ដូចជាតន្ត្រី ច្រៀង រាំ ជាដើម។ ជំនាញមួយៗសុទ្ធតែចូលសិក្សាសាលាជំនាញ ខ្លះចំណាយពេលសិក្សាដល់ទៅ ៥-៦ឆ្នាំឯណោះ។
យ៉ាងនេះក្ដី មានចំណុចមួយដែលអ្នកនាង ព្យាយាមទប់កូនស្រីនោះ គឺការចូលប្រឡូកសិល្បៈ បើទោះជាកូនស្រីមានសមត្ថភាព និងការជឿជាក់ថាអាចធ្វើបានក៏ដោយ នោះក៏ព្រោះតែអ្នកនាង ចង់ឲ្យកូនស្រីតែមួយរូបនេះ រៀនសូត្របានជ្រៅជ្រះសិន។
បច្ចុប្បន្ន អម ដែលមានឈ្មោះក្នុងបញ្ជីជាតិថា យុគ ដាពេជ្រ កំពុងសិក្សាចំណេះទូទៅថ្នាក់ទី៨ នៅសាលាឯកជនមួយនារាជធានីភ្នំពេញ។ យុគ ចិន្តា បញ្ជាក់ថា ក្រោយបញ្ចប់ចំណេះទូទៅនៅក្នុងស្រុក អ្នកនាង គ្រោងបញ្ជូនកូនទៅសិក្សានៅបរទេសទៀត មុនពេលបណ្ដោយឲ្យ អម ចង់ធ្វើអ្វីដែលគេចង់ក្នុងសិល្បៈ៕