បងប្អូន ម៉េង ប៊ុនលី ម៉េង ប៊ុនឡូ ដឹកដៃគ្នាទៅ ផលិត Original Song ដល់ប្រទេសបារាំង (វីដេអូ)

2018-07-18 04:30:59
ចម្រៀង

2018-07-18 04:30:59
ចំនួនមតិ 0 | ចំនួនចែករំលែក 0

ចន្លោះមិនឃើញ

យ៉ាងតិចមានបទ MV ចំនួន៣បទ ដែលសុទ្ធតែជា Original song ត្រូវបានតារាចម្រៀងពីរនាក់បងប្អូន គឺលោក ម៉េង ប៊ុនលី ម៉េង ប៊ុនឡូ កំពុងតែសម្រុកថត និងថតបានសម្រេចខ្លះហើយ។ វីដេអូនិងអត្ថន័យបទចម្រៀងទាំងនោះ បង្ហាញពីសម្រស់នៃប្រទេសបារាំង ក្នុងគោលបំណងយកបង្ហាញដល់អ្នកគាំទ្ររបស់លោកបានទស្សនាក៏ដូចជាស្ដាប់កម្សាន្ត ។ នេះបើតាមការឲ្យដឹងពី លោក ម៉េង ប៊ុនលី ដែលជាប្អូន។

លោក ម៉េង ប៊ុនលី បានថ្លែងពីប្រទេសបារាំងឲ្យដឹងថា បទចម្រៀងទាំង៣បទដែលបងប្អូនរបស់លោកកំពុងតែថតនៅប្រទេសបារាំងនោះ មាន២បទជាបទចម្រៀងផ្ទាល់ខ្លួនរបស់លោក និង១បទជាបទចម្រៀង របស់ លោក ម៉េង ប៊ុនឡូ ដែលជាបងប្រុស។ បទចម្រៀងរបស់លោកមានបទ"ស្ទឹងសែនដែនសមុទ្រ" និងបទ"ជួបស្នេហ៍ចៃដន្យ" ចំណែកបទលោក ម៉េង ប៊ុនឡូ គឺបទ"LA ROSE DE PARIS" សុទ្ធតែជា Original song រៀបរាប់ពីសម្រស់នៃទីក្រុង និងស្នេហា នៅប្រទេសបារាំង។

លោកថា សម្រាប់បទបទ "LA ROSE DE PARIS" បានផលិតរួច និង ទើបតែបង្ហោះលើ Youtube កាលពីប៉ុន្មានថ្ងៃនេះ ចំណែក២បទផ្សេងទៀតរបស់លោកកំពុងតែសម្រុកថត ក្រោយពីថតរួច នឹងយកមកកាត់នៅស្រុកខ្មែរ ហើយគ្រោងបង្ហោះលើ Youtube នៅក្នុងអំឡុងខែ សីហា ខាងមុខនេះ។

វត្តមានតារាចម្រៀងត្រកូលម៉េង២នាក់បងប្អូនលើទឹកដីបារាំងនេះ មិនមែនការចេញទៅផលិតបទចម្រៀងដោយចំណាយប្រាក់ពីហោប៉ៅខ្លួនឯងឡើយ ពោលគឺពួកគេមានសមាគមខ្មែរនៅទីនោះជា អ្នករ៉ាប់រង។ ជាមួយគ្នានោះដែរតារាដែលចូលរួមសម្ដែងក្នុង MV ខាងលើ សុទ្ធតែជាកូនខ្មែររស់នៅទីនោះ ហើយការចូលរួមសម្ដែងមិនគិតពីតម្លៃខ្លួនឡើយ។

លោក ម៉េង ប៊ុនលី បានចេញទៅប្រទេសតាំងពីដើមខែ ឧសភា ហើយគ្រោងត្រលបប់មកវិញនៅចុងខែ កក្កដា នេះបន្ទាប់ពីថត MV រួច។ ក្រៅពីការផលិតបទចម្រៀង លោក ម៉េង ប៊ុនលី ក៏មានបេសកកម្មច្រៀងនៅទីនោះ តាមការរៀបចំរបស់ម្ចាស់ស្ពុនស័រ ចំណែកលោក ប៊ុនឡូ ទៅក្នុងនាទីជាអ្នកថតវីដេអូ និងដឹកនាំការសម្ដែង MV ប៉ុណ្ណោះ។

លោក ម៉េង ប៊ុនលី បានលើកឡើងឲ្យដឹងទៀតថា តាមបំណងរបស់ខ្លួនទៅប្រទេសណា លោកចង់ផលិតបទចម្រៀងយ៉ាងតិចឲ្យបាន១បទ ក្នុងប្រទេសនោះកន្លងមកលោកក៏ធ្លាប់ផលិតបទ"សូមលើកទូរស័ព្ទបងផង" លើទឹកដីអាមេរិកផងដែរ។ ទន្ទឹមគ្នានោះដែរ លោកក៏មានបំណងចង់ផលិតបទចម្រៀងនៅក្នុងប្រទេសកម្ពុជា ឲ្យបានយ៉ាងតិច១បទ និយាយពីខេត្តនីមួយៗផងដែរ។

ការដាក់មហិច្ឆតាដូចបានលើកឡើងខាងលើ ក៏ព្រោះតែលោករំពឹងថា បទចម្រៀងទាំងនោះ ក្រោយចេផ្សាយនឹងជួយបំបែកភាពស្ងប់ស្ងាត់របស់លោកឡើងវិញជាក់ជាមិនខាន៕

ទស្សនាវីដេអូចម្រៀង "LA ROSE DE PARIS" ដែលបានផ្តិតយករូបភាពនៅប្រទេសបារាំងខាងក្រោមនេះ៖