ស្រីស្អាត Jimmy ទម្លាយអាថ៌កំបាំងយីអ៊ុនឡើងក្រឺតៗ ទិញផ្ទះច្រើនកន្លែងជិតកន្លះលានដុល្លារ

2018-07-18 07:16:45
ជីវិតតារា

2018-07-18 07:16:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ឆ្នាំ២០១៨ នេះ មានព័ត៌មានលេចឮថា ពិធីការិរីពូកែវោហារសព្ទប្រចាំទូរទស្សន៍ PNN កញ្ញា Jimmy កំពុងមានយីអ៊ុនឡើងក្រឺតៗយ៉ាងសម្បើមមិនថាការងារសិល្បៈ និងជំនួញអចលនទ្រព្យរាប់សិបម៉ឺនដុល្លារឯណោះ រហូតដល់មានមនុស្សជាច្រើនលាន់មាត់ស្ទើរមិនគួរឲ្យជឿ។

តបនឹងពាក្យចចាមអារ៉ាមនេះ ស្រីស្អាតរូបនេះបានបញ្ជាក់ប្រាប់ Sabay ក្នុងកម្មវិធីខួបកំណើតរបស់គ្រូហុងស៊ុយល្បីឈ្មោះម្នាក់នៅកម្ពុជា កាលពីល្ងាចអាទិត្យមុន ថា រឿងទាំងអស់នេះ ជាការពិត។

ពិធីការិនីឆ្នើមសមត្ថភាពមិនធម្មតាចេះច្រើនភាសាទាំងខ្មែរ អង់គ្លេស ថៃ ចិន រូបនេះ និយាយថា៖ "ក្នុងឆ្នាំនេះ ខ្ញុំទិញផ្ទះបាន ៣ កន្លែងធំៗ...មួយនៅទីក្រុង OCIC [ទីក្រុងរណបជ្រោយចង្វារ] មួយទៀតនៅអ៊ីអន២ មួយទៀតនៅជិតអ៊ីអន៣ ដែលគ្រាន់តែទិញរួចភ្លាម គេមានគម្រោងឡើងអ៊ីអន៣ ភ្លាមម៉ង"។

Jimmy ផ្ដល់បទសម្ភាសដល់ Sabay ក្នុងកម្មវិធីខួបកំណើតអ្នកគ្រូហុងស៊ុយ ណាលី កាលពីថ្ងៃទី ១៥ កក្កដា ២០១៨

តម្លៃទិញអចលនទ្រព្យទាំងនេះ មានសរុបទាំងអស់ប្រមាណជិត ៥០ ម៉ឺនដុល្លារ ដោយមិនទាន់គិតខុនដូមួយនៅកំពង់សោម និងខុនដូមួយនៅម្ដុំផ្លូវ៦០ ម៉ែត្រ ខណៈដែលការងារសិល្បៈរបស់ Jimmy ឆ្នាំនេះ ហូរចូលច្រើនរវល់ដល់ថ្នាក់រកពេលសម្រាកស្ទើរគ្មាន។ នេះបើតាមការបញ្ជាក់របស់ Jimmy។

ពេលត្រូវបានចោទសួរថាអ្វីជាអាថ៌កំបាំងនៅពីក្រោយជំនួញអចលនទ្រព្យក្នុងទំហំទឹកប្រាក់ធំមួយនេះ Jimmy បង្ហើបថា ក្រៅពីប្រឹងប្រែងការងារដោយសមត្ថភាពខ្លួនឯង Jimmy មានគ្រូហុងស៊ុយល្បីម្នាក់នៅក្បែរខ្លួនដែលតែងចង្អុលប្រាប់ផ្លូវថា នាងគួរធ្វើអ្វី គួររកស៊ីអ្វីត្រូវ ពោលគឺអ្នកគ្រូ ណាលី អគ្គនាយិកាស្ថាប័នហុងស៊ុយ ម៉ាស្ទ័រ ណាលី។

"ថ្ងៃមួយ អ្នកគ្រូប្រាប់ថា កុំទាន់អាលចំណាយលើរឿងតែងខ្លួន fashion ប្រមូលទាំងអស់មកដាក់លើដី ព្រោះឆ្នាំនេះ [២០១៨] បើកូនឯងមានដីច្រើន គឺយើងហេងមែនទែន ព្រោះឆ្នាំហ្នឹងយើងត្រូវជាមួយធាតុដី"។

ក្រៅពីជឿតាមការចង្អុលប្រាប់របស់គ្រូហុងស៊ុយ Jimmy ក៏បានឲ្យអ្នកគ្រូរៀបចំហុងស៊ុយផ្ទះ និងចាវអ៊ុង (ផ្នូរមនុស្សរស់) ក្នុងតម្លៃម៉ឺនដុល្លារ ដើម្បីឲ្យលាភសំណាងកាន់តែចូលមកច្រើនឡើងផងដែរ។

អ្នកគ្រូ ណាលី អគ្គនាយិកាស្ថាប័នហុងស៊ុយ ម៉ាស្ទ័រ ណាលី

ហេតុអី Jimmy ជឿលើហុងស៊ុយ?

ស្រីស្អាតកូនទោលរូបនេះ រៀបរាប់ថា នាងជឿលើហុងស៊ុយ ៤០% ជឿលើសមត្ថភាពខ្លួនឯង ៦០%។ Jimmy បាននៅក្បែរអ្នកគ្រូ ណាលី តាំងពីដំបូងគេ តាំងពីអ្នកគ្រូមិនទាន់ល្បីមកម្ល៉េះ។ អ្នកគ្រូប្រាប់ថា នាងមានរាសីដំណើរជីវិតមិនល្អណាស់ណាទេ មានឡើងមានចុះ តែនាងជាមនុស្សមានចំណេះដឹង ជំនាញការងារ ហើយស្រលាញ់ការងារ។ ការរៀបហុងស៊ុយ អាចជួយនាងមានលាភហូរចូលច្រើន។

បន្ទាប់ពីរៀបហុងស៊ុយផ្ទះរួច Jimmy ទទួលបានការងារច្រើនដល់ថ្នាក់នាងរកពេលសម្រាកគ្មាន។ រហូតដល់ពេលមួយ អ្នកគ្រូប្រាប់ថា Jimmy នៅខ្វះមួយទៀត គឺការធ្វើចាវអ៊ុង ដែលជួយថែរក្សាសុខភាព មិនឲ្យមានសត្រូវជុំវិញមកប៉ះពាល់ ខណៈដែលការធ្វើចាវអ៊ុង ត្រូវចំណាយរាប់ម៉ឺនដុល្លារ។

អីទៅជា ចាវអ៊ុង?

Jimmy បានរៀបរាប់ត្រួសៗថា ចាវអ៊ុង ឬផ្នូរមនុស្សរស់ ធ្វើឡើងដោយប្រើ DNA របស់មនុស្ស គឺសក់ ក្រចក សម្លៀកបំពាក់ ហើយធ្វើពិធីបញ្ចុះនៅក្នុងដីដែលជាប្រភេទដីដង្ហើមនាគ មានធាតុ ៥ ពណ៌ ព័ទ្ធសងខាងដោយភ្នំ មានបឹង ឬសមុទ្រធម្មជាតិខាងមុខ ព្រមទាំងមានកោះទល់មុខផងដែរ។

ប្រសិទ្ធភាពចាវអ៊ុង គឺជួយឲ្យមានលុយកាក់ហូរចូល សុខភាពល្អបរិបូរ អំណាចបារមី និងបរិវារ ខណៈដែលចាវអ៊ុងមាន ៤ លំដាប់ គឺ សេដ្ឋី មហាសេដ្ឋីធម្មតា មហាសេដ្ឋីប្រចាំប្រទេស និង មហាសេដ្ឋីពិភពលោក។ អ្នកធ្វើចាវអ៊ុង ត្រូវទៅផ្នូរនោះដាក់ដៃលើផ្នូរស្រូបយកថាមពលចក្រវាល និងបន់ស្រន់បំណង ៣ យ៉ាងក្នុងចិត្ត ហើយអាចសម្រេចបានចាប់ពី ៦០%ឡើងទៅ។

ត្រណមអ្នកធ្វើចាវអ៊ុង

ត្បិតមានចាវអ៊ុងតាមថែរក្សា ការពារមែន តែអ្នកធ្វើចាវអ៊ុង ត្រូវមានត្រណមមួយ គឺចិត្តបរិសុទ្ធ។ បើគ្មានចិត្តបរិសុទ្ធ លោភលន់កេងប្រវ័ញ្ច ធ្វើអាក្រក់ សម្លាប់មនុស្ស គ្មានគុណធម៌ ឥទ្ធិពលចាវអ៊ុង នឹងសាបរលាបដោយខ្លួនឯង៕