- 2018-07-19 03:38:30
- ភាពយន្ត
កូនខ្មែរអាមេរិកម្នាក់ ចែករំលែកការថតភាពយន្តឲ្យមានលក្ខណៈស្តង់ដារហូលីវូដ
- 2018-07-19 03:38:30
- ចំនួនមតិ 0 | ចំនួនចែករំលែក 0
កូនខ្មែរអាមេរិកម្នាក់ ចែករំលែកការថតភាពយន្តឲ្យមានលក្ខណៈស្តង់ដារហូលីវូដ
ចន្លោះមិនឃើញ
ផលិតករអ្នកដឹកនាំសម្ដែងវ័យក្មេងជាង៥០នាក់របស់កម្ពុជា ត្រូវបានមជ្ឈមណ្ឌលបណ្ដុះបណ្ដាលជំនាញ និងទទួលថតភាពយន្តនៅកម្ពុជា (CFC) អញ្ជើញមកស្ដាប់ការចែករំលែក ស្ដីពីការផលិតភាពយន្តឲ្យមានលក្ខណៈស្តង់ដារមួយ ដែលវាគ្មិនគឺពីកូនខ្មែរអាមេរិកម្នាក់ ដែលមានជំនាញលើវិស័យនេះជាង១៧ឆ្នាំមកហើយជាមួយនឹងភាពយន្តហូលីវូដ។
ពិធីចែករំលែកចំណេះដឹងដែលមិនធ្លាប់មានកន្លងមកនេះ បានធ្វើឡើងកាលពីថ្ងៃទី១៨ ខែ កក្កដា ឆ្នាំ ២០១៨ នៅមជ្ឈមណ្ឌលបណ្ដុះបណ្ដាលជំនាញ និងទទួលថតភាពយន្តនៅកម្ពុជា (CFC)។ អ្នកស្រី សាន ស៊ីណា គឺជាវិចិត្រករកុំព្យូទ័រជំនាញខាងផលិតកុនឲ្យ ហូលីវូដ ដោយអ្នកស្រីបានធ្វើការលើវិស័យនេះជាង១៧ឆ្នាំមកហើយ។ ទន្ទឹមគ្នានោះដែរ អ្នកស្រីក៏ធ្លាប់ទទួលបានពានរង្វាន់ពានរង្វាន់ EMMY ក្នុងឆ្នាំ ២០១៧ សម្រាប់ឥទ្ធិពលទស្សនីយភាពដ៏លេចធ្លោ និងពានរង្វាន់ Emmy ក្នុងឆ្នាំ ២០១៥។ ភាពយន្តល្បីៗរបស់ហូលីវូដ ដែលអ្នកស្រី សាន ស៊ីណា ធ្លាប់បានចូលរួមផលិតមានដូចជា Westworld, Transformers: Dark of the Moon, Alice និង Wonderland ជាដើម។
លោក ជៀប សុវិជ្ជា នាយកមជ្ឈមណ្ឌលបណ្ដុះបណ្ដាលជំនាញ និងទទួលថតភាពយន្តនៅកម្ពុជា បានឲ្យដឹងថា ដោយទទួលដំណឹងថា អ្នកស្រី សាន ស៊ីណា គឺជាកូនខ្មែរ១រូបដែលមានភាពល្បីល្បាញលើវិស័យផលិតកុន ជាពិសេសលើប្លង់ និងជាវិចិត្រករកុំព្យូទ័រធ្លាប់ធ្វើការជាមួយក្រុមហ៊ុនផលិតកុនឲ្យហូលីវូតជាច្រើនមក មានបេសកកម្មមកកម្ពុជា ដើម្បីផលិតភាពយន្តមួយ ទើបលោកអញ្ជើញអ្នកស្រី ដើម្បីចែករំលែកចំណេះដឹងខ្លះៗ ដល់ក្រុមផលិតកុននៅកម្ពុជា។
ទោះបីជាការចែករំលែកចំណេះដឹងនេះ មានរយៈពេលខ្លីក៏ពិតមែន ប៉ុន្តែនាយកមជ្ឈមណ្ឌលរូបនេះ រំពឹងថា នឹងអាចជួយបានជាគំនិតនិងជំនាញខ្លះៗ លើការផលិតកុននៅកម្ពុជាឲ្យបានល្អប្រសើរថែមទៀត។
អ្នកស្រី សាន ស៊ីណា បានមើលឃើញថា វិស័យភាពយន្តនៅកម្ពុជា គឺពិតជាមិនទាន់មានភាពជឿនលឿននៅឡើយ ដូចនេះអ្នកស្រីថា គឺត្រូវទាមទារពេលវេលា និងធនធានមនុស្សច្រើនលើវិស័យនេះ។ អ្នកស្រីថា ផលិតករទាំងអស់ត្រូវតែខិតខំរៀនជំនាញដែលខ្លួនខ្វះខាត ប្រសិនបើចង់ប្រលូកលើវិស័យភាពយន្តនេះ។
ទោះបីជាវិស័យភាពយន្តនៅមិនទាន់អាចប្រៀបនឹងប្រទេសជិតខាងក៏ពិតមែន តែអ្នកស្រីមើលឃើញជំនាញ២ លើវិស័យសិល្បៈមានការរីកចម្រើន នោះគឺវិស័យគំនូរ និងចម្រៀង ។ អ្នកស្រី មើលឃើញថា កូនខ្មែរកំពុងតែវិវឌ្ឍខ្លួនបានល្អប្រសើរណាស់លើជំនាញទាំង២នេះ ។ ជាមួយនឹងការចែករំលែកចំណេះដឹងលើជំនាញផលិតកុននេះ តាមការលើកឡើងរបស់អ្នកស្រី សាន ស៊ីណា កូនខ្មែរអាមេរិកកាំងរូបនេះធ្លាប់បានចែករំលែកបានខ្ទង់២០០នាក់មកហើយ នៅតាមបណ្ដាប្រទេសមួយចំនួនទៀត។
បេសកកម្មរបស់ អ្នកស្រី សាន ស៊ីណា នៅប្រទេសកម្ពុជាមានរយៈពេល២សប្ដាហ៍ប៉ុណ្ណោះ ដោយអ្នកស្រីនឹងត្រូវចាប់ដៃគូជាមួយអ្នកដឹកនាំរឿង លោក សុខ វិសាល ក្នុងការថតភាពយន្តមួយ ដើម្បីយកទៅចាក់នៅហូលីវូដ ដោយបច្ចុប្បន្នថតបានខ្លះរួចហើយ៕