- 2018-07-20 02:58:31
- ភាពយន្ត
មកដឹងប្រវត្តិជីវិតតស៊ូរបស់កូនខ្មែរអាមេរិកម្នាក់មុនទទួលបានពានរង្វាន់ Emmy Award
- 2018-07-20 02:58:31
- ចំនួនមតិ 0 | ចំនួនចែករំលែក 0
មកដឹងប្រវត្តិជីវិតតស៊ូរបស់កូនខ្មែរអាមេរិកម្នាក់មុនទទួលបានពានរង្វាន់ Emmy Award
ចន្លោះមិនឃើញ
រយៈពេលជាង១០ឆ្នាំ ក្នុងវិស័យភាពយន្ត Hollywood អ្នកនាង សាន ស៊ីណា មិនត្រូវបានគេបង្ហាញឈ្មោះ ឬត្រូវបានគេស្គាល់ច្រើននោះទេ ទោះបីមានជំនាញពិសេសក្នុងការផលិតរូបភាពបែប 3D ឌីជីថល គំនូរសិល្បៈនានា ឬក៏ការងារល្អៗនានាក្នុងវិស័យភាពយន្តនៅ Hollywood ក៏ដោយ។
នេះជាវីដេអូ Breakdown VFX ផលិតដោយអ្នកនាង សាន ស៊ីណា
ដោយមានគម្រោងភាពយន្តខ្នាតទូរទស្សន៍ធំមួយរបស់អាមេរិកគឺរឿង «GOTHAM» បានធ្វើឱ្យ អ្នកនាង សាន ស៊ីណា ទទួលបានជោគជ័យ និងពានរង្វាន់ខ្នាតអន្តរជាតិ Emmy Award ដែលជាមោទកភាពមួយសម្រាប់ជនជាតិខ្មែររស់នៅអាមេរិក ក៏ដូចជាប្រជាជនខ្មែរទាំងអស់ផងដែរ។ អ្នកនាង សាន ស៊ីណា បន្តថា៖ «វាជាគម្រោងមួយដែលគេប្រញាប់ ហើយមានរយៈពេលខ្លីបំផុត លុយតិចបំផុត គេក៏បោះឱ្យខ្ញុំគ្រប់គ្រង ហ្នឹងហើយខ្ញុំគិតថានេះជាឱកាសដែលគេផ្ដល់ឱ្យយើង ខ្ញុំក៏ព្យាយាមផលិតវាឱ្យអស់ពីចិត្ត តែមែនទែនខ្ញុំក៏នៅតែចង់កែវាបន្ថែមទៀត»។
ជាក់ស្ដែងអ្នកនាងមិនធ្លាប់បានគិតថាគម្រោងភាពយន្តទូរទស្សន៍ «Gotham» នេះអាចទទួលបានជោគជ័យលើសការរំពឹងទុកបែបនេះដែរ អ្នកនាងធ្លាប់តែគិតថា ត្រូវតែធ្វើឱ្យបានល្អបំផុត ហើយទទួលបានចំណូលពីការផលិតដើម្បីផ្ដល់ឱ្យគ្រួសារប៉ុណ្ណោះ។ អ្នកនាង ស៊ីណា បន្តថា៖ «មកដល់ឆ្នាំ ២០១៧ ក៏មានការរៀបចំកម្មវិធី ពានរង្វាន់ Emmy Award ហើយគម្រោងភាពយន្ត «Gotham» ក៏បានផ្ញើជូនគណៈកម្មការកម្មវិធី ហើយដល់គេប្រកាសថា ខ្ញុំទទួលបានពានរង្វាន់នេះភ្លាម ខ្ញុំរំភើបចិត្តខ្លាំង រកនិយាយអ្វីមិនចេញ»។
រម្លឹកពេលដែលបានទៅដល់សហរដ្ឋអាមេរិក គឺចាប់ផ្ដើមពីជំរំខៅអ៊ីដាងប្រទេសថៃ ពេលអ្នកនាង សាន ស៊ីណា មានអាយុ៣ ឆ្នាំ គ្រួសារអ្នកនាងក៏ទទួលបានសំបុត្រអនុញ្ញាតឆ្លងដែនទៅរស់នៅអាមេរិក ហើយប្រកបរបរជាអ្នកលក់ដូរ និងកម្មករ ដែលមានជនជាតិខ្មែររស់នៅ។ ជីវិតពេលនោះ មិនជាល្អប្រសើរប៉ុន្មានទេ គ្រាន់តែអាចចៀសផុតពីសង្គ្រាម នេះបើតាមការលើកឡើងរបស់ស្រ្តីវ័យ៣៧ឆ្នាំរូបនេះ។
ស្ថិតក្នុងវ័យ ៥ ទៅ ៦ ឆ្នាំ កូនខ្មែររូបនេះ ប្រាប់ថាខ្លួនបានចាប់ផ្ដើមរៀនគូររូបភាពដោយខ្លួនឯង ហើយពេលនោះ ម្ដាយរបស់អ្នកនាងខឹងនឹងនាងខ្លាំង រហូតដល់ចង់វាយនឹងរំពាត់ ដោយសារគាត់យល់ថាជំនាញសិល្បករ វិចិត្រករនេះមិនសូវមានតម្លៃប៉ុន្មាននោះទេ។ ពេលនោះមានតែលោកឪពុកទេ ដែលលើកទឹកចិត្ត និងមានជំនឿចិត្តលើទេពកោសល្យរបស់អ្នកនាង។
សិល្បកររូបនេះក៏បន្តការសិក្សារហូតដល់ចប់មហាវិទ្យាល័យ ថ្នាក់អាហារូបករណ៍ ផ្នែក សិល្បៈ Art College របស់សហរដ្ឋអាមេរិក តាមរយៈទេពកោសល្យគំនូររបស់អ្នកនាង។ ក្រោយមកទៀតក៏បន្តការងារទាក់ទងនឹងការគូររូបភាពសម្រាប់ប្រើប្រាស់ក្នុងការផលិតភាពយន្តដូចជា 3D និង Digital Art ជាដើម ដោយផ្ដើមពីក្រុមហ៊ុនតូចមួយមានសមាជិកតែជាង ១០នាក់រហូតក្លាយជាកន្លែងធំ។
ស្នាដៃរបស់សិល្បកររូបនេះ មានការទទួលស្គាល់នៅលើគុណភាពក្នុងវិស័យភាពយន្ត HollyWood World ដោយមានស្នាដៃភាពយន្តជាច្រើនដូចជារឿង WestWorld, Transformers: Dark of the Moon, Alice និង Wonderland និងរឿង ភ្នាក់ងារដ៏អស្ចារ្យរបស់ S.H.I.E.L.D ផងដែរ។ អ្នកនាងក៏បានលើកឡើងទៀតដែរថាដោយក្តីស្រលាញ់ទើបធ្វើឱ្យរូបនាងទទួលបានជោគជ័យដូចថ្ងៃនេះ តែវាបានប្រើប្រាស់ពេលវេលាស្ទើរស្មើជីវិតរបស់គាត់ហើយដើម្បីសម្រេចជោគជ័យនេះ។
សិល្បករ គំនូរ Digital រូបនេះក៏បានបង្ហាញភាពរីករាយយ៉ាងខ្លាំងលើការគាំទ្រស្វាគមន៍របស់ប្រជាជនខ្មែរ រូបនាងមានការរំភើបដែលបានមកដល់កម្ពុជាជាលើកទី២ ក្រោយចាកចេញតាមគ្រួសារតាំងពីអាយុបាន៣ ឆ្នាំ។ អ្នកនាងក៏បន្តថាការព្យាយាមរបស់អ្នកនាងគឺជាការអប់រំ និងលើកទឹកចិត្តពីលោកឪពុកយ៉ាងធំ។ អ្នកនាង សាន ស៊ីណា បន្ថែម «ព្រោះគាត់តែងតែប្រាប់ថា ខ្ញុំត្រូវតែធ្វើអ្វីដើម្បីមោទកភាពជាតិ» ។ បូករួមនឹងការស្រលាញ់លើវិស័យភាពយន្តនេះតាំងពីក្មេងៗ ហើយមិនដែរបោះបង់ អ្នកនាង ស៊ីណា ផ្ដាំម្ដងទៀតថា មិនត្រូវបោះបង់អ្វីដែលខ្លួនយើងស្រលាញ់នោះទេ ហើយបើបរាជ័យ អ្នកត្រូវងើបហើយបន្តធ្វើការងារនោះលុះអ្នកជោគជ័យ៕