- 2018-08-15 08:43:33
- ព័ត៌មាន
ចង់ឲ្យកូនសិក្សាសិល្បៈរបាំខ្មែរមែនទេ? សាលាមធ្យមវិចិត្រសិល្បៈប្រកាសរើសសិស្សចូលរៀន ដោយឥតគិតថ្លៃ
- 2018-08-15 08:43:33
- ចំនួនមតិ 0 | ចំនួនចែករំលែក 0
ចង់ឲ្យកូនសិក្សាសិល្បៈរបាំខ្មែរមែនទេ? សាលាមធ្យមវិចិត្រសិល្បៈប្រកាសរើសសិស្សចូលរៀន ដោយឥតគិតថ្លៃ
ចន្លោះមិនឃើញ
សាលាមធ្យមវិចិត្រសិល្បៈ នៃក្រសួងវប្បធម៌ និងវិចិត្រសិល្បៈ បានប្រកាសការប្រឡងជ្រើសរើសសិស្សចូលរៀនសម្រាប់ឆ្នាំសិក្សា ២០១៨-២០១៩ ទៅលើជំនាញឯកទេសចំនួន៥ ដោយឥតគិតថ្លៃ។
ឯកទេសជ្រើសរើស រួមមាន៖
១. តូរ្យដន្ត្រី
-ចម្រៀង៖ អាយ៉ៃ ជាពួក និងបុរាណ
-ឧបករណ៍តន្រ្តីសម័យ៖ វីយូឡុង វីយូឡា សែលឡូ កុងត្រឺបាស ត្រុំប៉ែត ហ្លុត សាក់ស និង ក្លារីណែត
-ឧបករណ៍តន្រ្តីបុរាណ៖ ចាប៉ីដងវែង ស្រឡៃ ទ្រអ៊ូ ទ្រសោ ឃឹម គងតូច គងធំ តាខេ រនាតឯក និង រនាតធុង
២.របាំ៖ របាំបុរាណ របាំប្រពៃណី និងល្ខោនខោល
៣.ល្ខោន៖ ល្ខោននិយាយ ល្ខោនយីកេ និងល្ខោនបាសាក់
៤.សៀក៖ លោតលើកម្រាល លំនឹង ត្រេះ បច្ចេកទេសលើលំហ បាល្លេ...
៥.សិល្បៈសូនរូប៖
ឯកទេសគំនូរ៖ វិចិត្រកម្ម គំនូរបុរាណ គំនូរផ្សារ និងគំនូរលម្អលើក្រណាត់
ឯកទេសចម្លាក់៖ ចម្លាក់ពុម្ព ចម្លាក់ប្រាក់ ចម្លាក់ស្មិត ចម្លាក់ឈើ ខ្មុកសាក់ និងកុលាលភាជន៍
លក្ខខណ្ឌ៖
-ចំពោះឯកទេសរបាំបុរាណ ខោល សៀក ចម្រៀងបុរាណ តន្រ្តីបុរាណ និងតន្រ្តីសម័យ (ឧបករណ៍ខ្សែ) បេក្ខជនត្រូវមានអាយុ៩ ឬ១០ឆ្នាំ ឬជាសិស្ស បានរៀនចប់ថ្នាក់ទី៣ ឬទី៤។
-ឯកទេសរបាំប្រពៃណី តន្រ្តីសម័យ (ឧបករណ៍ផ្លុំ) ស្រឡៃ កុងត្រឺបាស ត្រុំប៉ែត ហ្លុត សាក់សូ ក្លារីណែត យីកេ និងបាសាក់ បេក្ខជនត្រូវជាសិស្សដែលបានបញ្ចប់ថ្នាក់ទី៥ ឬទី៦ នៅសាលាចំណេះដឹងទូទៅ ដែលមានអាយុ ១១ ដល់១៣ឆ្នាំ។
-ឯកទេសចម្រៀងអាយ៉ៃ ចម្រៀងជាពួក ចាប៉ីដងវែង ល្ខោននិយាយ និងសិល្បៈសូនរូប បេក្ខជនត្រូវមានអាយុ១៣ ឬ១៤ឆ្នាំ។
មាតាបិតា ឬអាណាព្យាបាលដែលមានចំណាប់អារម្មណ៍ចង់បញ្ជូនកូនប្រុសស្រីសិក្សាជំនាញខាងលើ អាចទាញយកសេចក្តីជូនដំណឹង និងពាក្យសុំប្រឡងតាមបណ្តាញសង្គមរបស់ សាលាមធ្យមវិចិត្រសិល្បៈ ចាប់ពីថ្ងៃជូនដំណឹងនេះតទៅ រហូតដល់ថ្ងៃទី២២ ខែកញ្ញា ឆ្នាំ២០១៨ ឯការបរិច្ឆេទប្រឡងនឹងធ្វើឡើងនៅថ្ងៃទី២៨ ខែកញ្ញា ឆ្នាំ២០១៨។
កន្លែងចែកចាយ និងទទួលពាក្យ នៅសាលាមធ្យមវិចិត្រសិល្បៈ បឹងបាយ៉ាប ស្ថិតនៅវិថីបណ្ឌិត ម៉ុង ឬទ្ធី (១៩២៨) ភូមិបាយ៉ាប សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ ចំពោះព័ត៌មានបន្ថែមសូមទាក់ទងលេខ៖ ០១២ ៨៩០ ៧៩៧ / ០៩២ ១៩៧ ៥៩១ / ០១១ ២៥១ ៩៨៧៕