- 2018-08-16 03:29:15
- ព័ត៌មាន
ក្រោយផ្ញើខ្លួនដីបារាំងជិត ២០ឆ្នាំ ឥឡូវ ពេញវង្ស រស្មី ព្រលយពីគម្រោងសិល្បៈ
- 2018-08-16 03:29:15
- ចំនួនមតិ 0 | ចំនួនចែករំលែក 0
ក្រោយផ្ញើខ្លួនដីបារាំងជិត ២០ឆ្នាំ ឥឡូវ ពេញវង្ស រស្មី ព្រលយពីគម្រោងសិល្បៈ
ចន្លោះមិនឃើញ
អតីតជយលាភីលេខ២ បវរកញ្ញាឆ្នាំ ១៩៩៤ ពេញវង្ស រស្មី បានបង្ហើបពីគម្រោងចង់ចូលប្រឡូកសិល្បៈវិញ បន្ទាប់ពីចោលអាជីពនេះរហូតមកតាំងពីជើងចុះជាន់ដីអឺរ៉ុបអស់រយៈពេលជិត២០ឆ្នាំ។
ពេញវង្ស រស្មី បានចាកចេញពីប្រទេសកំណើត ទៅរស់នៅប្រទេសបារាំងតាំងឆ្នាំ ២០០០ ហើយបានបញ្ឈប់អាជីពសិល្បៈ រហូតមក ក្នុងនោះបើទោះធ្លាប់មានការអញ្ជើញពីផលិតករមួយចំនួនក៏ដោយ។ "ការងារសិល្បៈថត សម្ដែងអីហ្នឹង អត់បានបន្តទេពេលមកដល់ស្រុកបារាំងនេះ...ធ្លាប់មានប្អូនៗ សិល្បៈយើងហៅដែរ ប៉ុន្តែខ្ញុំប្រាប់ថា បើជាការថតឃ្លិបខ្លីៗណែនាំ ឬអប់រំពីសង្គមអី ខ្ញុំថត បើថតជារឿងវែងៗ ត្រូវចុះទៅស្រុកខ្មែរអី ខ្ញុំអត់មានពេលទេ!"។
តួស្រីក្នុងរឿង "ជាតិស្ត្រី" ប្រាប់ថា អ្នកស្រីមិនបានបន្តការងារសិល្បៈ ដោយសារជាប់បន្តការសិក្សា។ មកទល់បច្ចុប្បន្នអតីតជយលាភីបវរកញ្ញាលេង២ ឆ្នាំ ១៩៩៤ បញ្ជាក់ថា នាងនៅតែរៀនដដែលជារៀងរាល់ថ្ងៃច័ន្ទដល់សុក្រ គឺរៀនភាសាបារាំង។ "គ្រួសារខ្ញុំ គាត់ប្រាប់ថា កាលដែលយើងរស់នៅទីកន្លែងណា យើងភាសាគេពិតប្រាកដ វាល្អសម្រាប់យើង ទើបខ្ញុំនៅតែរៀនមកដល់សព្វថ្ងៃ"។
ជាមួយគ្នានឹងការឱបជាប់ការសិក្សាមិនដាច់សូម្បីដល់វ័យជិត៤០ទៅហើយនេះ ពេញវង្ស រស្មី ប្រាប់អ្នកស្រី មានគោលបំណងមួយចំនួននៅពេលជីវិតដល់វ័យចាស់។ ទី១ ក្រោយចេះភាសាបារាំងច្បាស់ នឹងត្រឡប់មកកម្ពុជាវិញនៅអាយុខ្ទង់ ៥០ឆ្នាំជាង បើកកន្លែងបណ្ដុះបណ្ដាលភាសាបារាំងដល់កូនខ្មែរ និងចូលរួមកិច្ចការងារសង្គមមួយចំនួនទៀត ព្រោះថា អ្នកស្រីចង់រួមចំណែកជួយសង្គមក៏ដូចជាទឹកដីដែលផ្ដល់កំណើត មុនអ្នកនាងបិទភ្នែកលាទៅវិញ។
កិច្ចការទី២ គឺការងារសិល្បៈ កន្លែងដែលធ្លាប់ផ្ដល់ឲ្យនាងនូវជីវិតត្រចះត្រចង់មួយ។ "ពេលវ័យចាស់ជាងនេះ ខ្ទង់ ៥០ឆ្នាំអី ខ្ញុំនឹងទៅរស់នៅប្រទេសកំណើតវិញ គ្រួសារខ្ញុំក៏គាត់មានគំនិតអីចឹងដែរ។ ហើយនាងខ្ញុំក៏គិតដែរថា ចង់ចូលប្រឡូកការងារសិល្បៈវិញ បើឲ្យចោល គឺមិនចោលទេ ស្រឡាញ់ណាស់ អីចឹងពេលនោះ យើងអាចសម្ដែងជាតួម្ដាយអីបាន!”។
ពេញវង្ស រស្មី ជាអតីតតារាសម្ដែង និងជាពិធីការិនីទូរទស្សន៍ល្បីឈ្មោះមួយរូប ប្រសូតចេញពីការប្រឡងកម្មវិធីបវរកញ្ញាមួយនាឆ្នាំ ១៩៩៤ ដែលពេលនោះ អ្នកស្រី បានជាប់ចំណាត់ថ្នាក់លេខ២ (First Runner Up) ។ ១ឆ្នាំក្រោយការប្រកួត អ្នកស្រីបានសាងស្នាដៃលេចធ្លោជាច្រើន មានតាមរយៈរឿងជាច្រើនដូចជា "ជាតិស្ត្រី" របស់លោក ហ្វៃ សំអាង និងរឿង "ចាបស្រុក ចាបព្រៃ" ជាដើម មុនចាកចេញទៅរស់នៅលើទឹកដីបារាំង។
រហូតដល់ដើមឆ្នាំ ២០០៩ ទើបអ្នកស្រីរៀបអាពាហ៍ពិពាហ៍ ជាមួយអាណិកជនខ្មែរនៅបារាំងមានដើមកំណើតនៅខេត្តកំពង់ធំដូចគ្នា និងរួមរស់ជាមួយគ្នារហូតដល់បច្ចុប្បន្ន៕