- 2018-09-12 02:37:11
- ជីវិតតារា
គង់ ដារិទ្ធ តួសិតា ធ្លាប់បាក់ទឹកចិត្តនឹងពាក្យគេមើលងាយច្រើនដង ព្រោះប្រុសតែងខ្លួនជាស្រី
- 2018-09-12 02:37:11
- ចំនួនមតិ 0 | ចំនួនចែករំលែក 0
គង់ ដារិទ្ធ តួសិតា ធ្លាប់បាក់ទឹកចិត្តនឹងពាក្យគេមើលងាយច្រើនដង ព្រោះប្រុសតែងខ្លួនជាស្រី
ចន្លោះមិនឃើញ
នៅក្នុងទម្រង់ល្ខោនខោល ថ្វីត្បិតតួសេដា ជានារី តែគេមិនតម្រូវឲ្យស្រ្តីសម្ដែងឡើយ គឺយកមនុស្សប្រុសមកសម្ដែង ហើយតែងខ្លួនជាស្រី។ ដោយសារតែមនុស្សមួយចំនួន មិនយល់ច្បាស់ពីទម្រង់នេះ យុវជន គង់ ដារិទ្ធ សម្ដែងជាតួសេដា ត្រូវរងការមាក់ងាយ មិនផ្ដល់តម្លៃ រហូតបាក់ទឹកចិត្ត ចង់បោះបង់ការសម្ដែងច្រើនដង។
ដំបូងឡើយ ម្ដាយឪពុករបស់ដារិទ្ធមិនសប្បាយចិត្តទេ ព្រោះខ្លាចអ្នកដទៃមើលមកមិនទំនងលើកូនប្រុស ពេលតែងខ្លួនជាស្រីបែបនេះ។ ចំណែកមិត្តភ័ក្ដិរបស់ដារិទ្ធវិញ ខ្លះគាំទ្រ ខ្លះវិញបែរជាសើចចំអក ហើយទស្សនិកជនខ្លះបានឡកឡឺយថា ម៉េចល្ខោនខ្មែរយកខ្ទើយមករាំអ៊ីចឹង។ ពាក្យសម្តីទាំងនេះ បានក្លាយជាសម្ពាធផ្លូវចិត្ត ធ្វើឲ្យសិស្សរៀននៅវិទ្យាល័យឥន្រ្ទទេវីរូបនេះ លែងចង់បន្តដំណើរលើការសម្ដែងល្ខោនខោលបន្តទៀត។ តែដោយកើតចេញពីចិត្តស្រលាញ់សុទ្ធសាធ ដារិទ្ធព្យាយាមជម្នះ ហើយពន្យល់មូលហេតុឲ្យឪពុកម្ដាយយល់ ទើបលោកទាំងពីរគាំទ្រនិងផ្ដល់កម្លាំងចិត្ត។
ចំពោះការហាត់រៀនផ្នែកសិល្បៈបុរាណនេះ ដារិទ្ធហាត់រៀនអស់ពេល៣ឆ្នាំហើយ តាមរយៈសមាគម ដោយចេះផ្នែករបាំប្រពៃណី និងល្ខោនខោល។ បើនិយាយពីការសម្ដែងជាតួសេដាវិញ យុវជនអាយុ១៨ឆ្នាំ ខំប្រឹងសម្ដែងយ៉ាងណាឲ្យចូលតួបានល្អ ពិសេសត្រង់ឈុតកម្សត់ ដែលសេដា ត្រូវព្រាត់ពីព្រះរាម។ ដោយសារល្ខោនប្រភេទនេះ ហាក់មិនសូវទូលំទូលាយសម្រាប់ទស្សនិកជនខ្មែរនៅឡើយ ដូច្នេះដារិទ្ធ មិនសូវមានឱកាសបានចេញសម្ដែងនៅខាងក្រៅឡើយ។
ដារិទ្ធ ស្រលាញ់សិល្បៈបុរាណខ្លាំងណាស់ ទោះពីមុនធ្លាប់តូចចិត្តព្រោះពាក្យមើលងាយរបស់អ្នកដទៃក្តី តែពេលនេះ ដារិទ្ធ មិនបោះបង់ការសម្ដែងសិល្បៈបុរាណខ្មែរចោលទេ ។ នេះជាក្ដីស្រមៃតាំងពីតូចរបស់ដារិទ្ធ និងដើម្បីថែរក្សាវប្បធម៌ដ៏ផូរផង់នេះឲ្យគង់វង្ស៕
