ឆេះស្ដែងៗ ភ្លើងឆាបឆេះក្រុមអ្នកថតកុន បណ្ដាលឲ្យតួសម្ដែងរងរបួសទាំងអស់ ៣១នាក់(វីដេអូ)

2018-09-26 14:36:07
ព័ត៌មាន

2018-09-26 14:36:07
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែងចំនួន ៣១នាក់ ត្រូវបានគេរាយការណ៍ថា បានរងរបួសឆេះលើរាងកាយ ក្នុងហេតុការណ៍អគី្គភ័យលើក្រុមអ្នកថតភាពយន្តសម្រាប់អបអរបុណ្យចូលឆ្នាំប្រពៃណីជនជាតិចិននៅប្រទេសម៉ាឡេស៊ីមានចំណងជើងថា "Amazing Spring"។

ហេតុការណ៍បានកើតឡើងនៅម៉ោងប្រមាណ៧ព្រឹកថ្ងៃច័ន្ទ។ តារាសម្ដែងជើងចាស់ហុងកុង Sharon Yeung Pan វ័យ ៥៩ឆ្នាំ តារាសម្ដែងម៉ាឡេស៊ី Joey Leong និងតារាប្រុស Cedric Loo វ័យ ៣០ឆ្នាំ ស្ថិតក្នុងចំណោមអ្នករងរបួសក្នុងដោយសារអគ្គីភ័យអំឡុងពេលកំពុងថតភាពយន្តនៅក្នុងតំបន់ Bandar Bukit Puchong នៃខេត្ត Selangor របស់ម៉ាឡេស៊ី។ នេះបើយោងតាម The Star។

ព័ត៌មានពីគ្រូពេទ្យ តារាសម្ដែងហុងកុង ត្រូវភ្លើងឆាបឆេះលើផ្ទៃមុខផ្នែកខាងឆ្វេង ដៃស្ដាំ និងជើងទាំងពីរ។ ដោយឡែក តារាវ័យក្មេងម៉ាឡេស៊ី រងរបួសលើជើងទាំងពីរដែលត្រូវការពេល ៣សប្ដាហ៍ដើម្បីព្យាបាល។

លោក Jack Lim អ្នកគ្រប់គ្រងការផលិត បានពន្យល់នៅក្នុងសន្និសីទសារព័ត៌មានក្រោយគ្រោះចៃដន្យថា តាមផែនការ ផ្ទះភ្លើងឆេះចំនួន៣ត្រូវបានគ្រោងដើម្បីថត។ ជាមួយគ្នា ភ្នាក់ងារអគ្គីភ័យដែលប្រចាំការនៅកន្លែងថត ក៏បានប្រាប់ឲ្យក្រុមអ្នកថតទាំងអស់ឲ្យឈរនៅឆ្ងាយពីភ្លើងដែរ។ ប៉ុន្តែរឿងនឹកស្មានមិនដល់នៅតែកើតឡើង ដោយសារតែភ្លើងបានឆេះរាលដល់កន្លែងក្រុមតារាសម្ដែងឈរទៅទៀត។

ជុំវិញហេតុការណ៍នេះ នាយកដ្ឋានបង្ការអគ្គីភ័យបានបើកការសើបអង្កេត និងបានរកឃើញថា ឧប្បទ្ទវហេតុនេះ បណ្ដាលមកពីក្រុមការងារថតកុន បានចាក់ឲ្យហៀរប្រេងក្នុងផ្ទះឈើដែលប្រើសម្រាប់ថតកុន ជាហេតុធ្វើឲ្យមានគ្រោះអាក្រក់កើតឡើងតែម្ដង នៅពេលថតប្លង់ភ្លើងឆេះ ដែលជាប្លង់ដំបូងនៃសាច់រឿងខាងលើ៕

ប្រភព៖ nextshark ប្រែសម្រួល៖ ទារិកា