ទាំងនេះជាកំពូលតួឯកស្រីទាំង ៥របស់រឿងកុនម្ចាស់ចំណូលខ្ទង់លានដុល្លារ

2018-10-01 03:10:00
ព័ត៌មាន

2018-10-01 03:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែភាពយន្តថៃជាច្រើនបានលេចរូបរាង និងទទួលបានភាពជោគជ័យ ជាបន្តបន្ទាប់ ព្រមទាំងអាចរកប្រាក់ចំណូលបានដល់ទៅរាប់លានដុល្លារឯណោះ។ និយាយពីតារាសម្ដែង ក៏ជាចំណែកមួយក្នុងការធ្វើឲ្យរឿងទាំងនោះល្បីដែរ ថ្ងៃនេះសុំបង្ហាញជូនកំពូលតារាស្រី ៥រូបជាតួឯកក្នុងភាពយន្តល្បី និងរកចំណូលបានរាប់លានច្រើនបំផុតជាប្រវត្តិសាស្ត្រ។

១. Aokbab Chutimon

បន្ទាប់ពីលេចមុខ ក្នុងរឿង "សិស្សឆ្នើមកំពូលល្បិច” មក កេរ្តិ៍ឈ្មោះរបស់តារាសម្ដែង Aokbab បានឡើងស្រឺតៗ ស្ទើរមិនគួរឲ្យជឿ។ រឿងកុនឆ្នាំ ២០១៧មួយនេះបាននាំ តារាស្រីវ័យ ២២ឆ្នាំ ហក់ឡើងដល់ចំណុចកំពូលក្លាយជាតារាស្រីដែលមានមុខទទួលពានរង្វាន់ច្រើនមិនធម្មតាក្នុងរយៈពេលដ៏ខ្លី។ ដោយឡែកនិយាយពីចំណូលវិញ "សិស្សឆ្នើមកំពូលល្បិច” អាចរកបានដល់ទៅ ៤៣,៣៥ លានដុល្លារ ឯណោះ។

២. Mai Davika

សម្រាប់ Mai វិញ ក៏បានក្លាយជាតារាស្រីដែលទទួលបានចំណូលច្រើនពីភាពយន្តខ្នាតធំមួយរឿងដែលបានបញ្ចាំងកាលពីឆ្នាំ ២០១៣ គឺ "ព្រលឹងស្នេហ៍នាងណាត"។ រឿងនេះអាចរកចំណូលបានរហូតទៅដល់ជាង ១ពាន់លានបាត (ប្រហែល ៣៣លានដុល្លារ) និងបាននាំតួឯកទាំង ២គឺ Mario និង Mai ក្លាយជាតារាជួរមុខគេប្រចាំប្រទេសថៃទៀត។

៣. Ice Preechaya

តាមរយៈរឿង “I Fine Thank You, Love You” បានធ្វើឲ្យ Ice ក្លាយជាតារាជួរមុខ និងលេចធ្លោបំផុតកាលពីឆ្នាំ ២០១៤។ រឿងកុនដែលមាន Sunny Suwanmethanon និង Ice Preechaya ជាតួនេះអាចរកចំណូលបានដល់ទៅ ៣៣៥ លានបាត (ប្រហែល ១០,៣២ លានដុល្លារ)។

៤. Cris Howang

ភាពយន្តមួយរឿងដែលធ្វើឲ្យ គ្រប់គ្នាកោតសរសើរមិនដាច់ពីមាត់ នូវទឹកដៃសម្ដែងរបស់ Cris និង Ken មានចំណងជើងថា "Bangkok Traffic Love Story” បញ្ចាំងកាលពីឆ្នាំ ២០០៩។ ពេលបង្ហាញខ្លួនភ្លាម រឿងនេះផ្ទុះខ្លាំងមិនធម្មតា រហូតធ្វើឲ្យរឿងអាចរកចំណូលដល់ទៅ ១៤៧ លានដុល្លារ (ប្រហែល ៤,៥៣លានដុល្លារ)។

៥. Yaya Urassaya

ចូលដល់តារាស្រីវ័យក្មេងកូនកាត់ណ័រវេសរូបនេះវិញ ក៏បានធ្វើឲ្យរឿងកុនឆ្នាំ ២០១៨មួយរឿងល្បីកក្រើកពេញទ្វីបអាស៊ីដែរ គឺរឿង "បងប្រុសកំពូលកូរ”។ ភាពយន្តដែលមានការចូលរួមសម្ដែងដោយ Sunny Suwanmethanon, Yaya និង Nichkhun នេះ ទទួលបានការគាំទ្រពីសំណាក់មហាជន។ វាអាចរកចំណូលបានដល់ទៅ ១៤០លានបាត (ប្រហែល ៤,៣១លានដុល្លារ) ឯណោះ។ មួយវិញទៀតរឿងនេះ ក៏បាននាំតារាសម្ដែង Yaya ទទួលបានពានរង្វាន់ច្រើនដែរ៕

ប្រភព៖ tvpoolonline ប្រែសម្រួល៖ យី សុធារី