- 2018-10-23 07:00:46
- ព័ត៌មាន
មេក្រុមចម្រៀង The East Light បង្ហាញស្លាកស្នាមក្រោយរងទារុណកម្ម ពីម្ចាស់ផលិតកម្ម
- 2018-10-23 07:00:46
- ចំនួនមតិ 0 | ចំនួនចែករំលែក 0
មេក្រុមចម្រៀង The East Light បង្ហាញស្លាកស្នាមក្រោយរងទារុណកម្ម ពីម្ចាស់ផលិតកម្ម
ចន្លោះមិនឃើញ
កាលពីថ្ងៃទី ១៩ ខែតុលា មេក្រុម The East Light តារាចម្រៀង Lee Seokcheol បានធ្វើសន្និសីទកាសែតមួយ ដើម្បីបកស្រាយរឿងពិតដែលក្រុមចម្រៀងរបស់លោកទទួលរងទុក្ខវេទនាកន្លងមក។
បញ្ហាមួយនេះបានក្លាយជារឿងដ៏ធ្ងន់ធ្ងរមួយ ខណៈតារាចម្រៀង Lee Seokcheol និងប្អូនប្រុសរបស់លោក Lee Seunghyun កំពុងសិក្សាក្នុងឆ្នាំទី ៣ និងទី ១ នៃថ្នាក់វិទ្យាល័យនៅឡើយ ហើយចំពោះសមាជិកដទៃទៀតក្នុងក្រុមក៏សុទ្ធតែនៅជាអនីតិជនផងដែរ។ បើតាមការពិតដែលបានបង្ហាញថា ការធ្វើទារុណកម្មនោះ ត្រូវបានប្រព្រឹត្តទៅអស់រយៈពេល ៤ ឆ្នាំមកហើយនោះ ដូចនេះ សមាជិកក្នុងក្រុមមួយចំនួនអាចនឹងកំពុងសិក្សាថ្នាក់បឋម ឬ អនុវិទ្យាល័យនៅឡើយទេ។
មេក្រុមចម្រៀងរូបនេះ បានបង្ហាញទៀតថា ប្អូនប្រុសរបស់លោកគឺនៅតែកំពុងស្ថិតក្នុងការភ័យខ្លាចពីការធ្វើទារុណកម្មនោះរហូតមកទល់សព្វថ្ងៃនេះ ហើយគេនៅតែមមើមមាយនិយាយពាក្យ "ជួយខ្ញុំផង" ដដែល រាល់ពេលដែលគេដេកលក់។
ផលិតករ Moon Young IL ត្រូវបានឲ្យដឹងថា បានប្រើប្រាស់វត្ថុរឹងជាច្រើនដូចជា ដងវាយកូនបាល់ ដងក្រណាត់ជូតឥដ្ឋ និងជើងទម្រក្បាលមីក្រូជាដើមក្នុងការធ្វើទារុណកម្មកូនក្រុមចម្រៀងរបស់លោក។ រាល់សមាជិកទាំងអស់ត្រូវបានវាយដំនឹងវត្ថុទាំងនោះ ដោយហេតុផលផ្សេងៗគ្នា។ Lee Seokcheol បញ្ជាក់ទៀតថា មានពេលមួយ សមាជិកទាំងអស់ ត្រូវបានផលិតកររូបនេះវាយដំជាច្រើនលើកច្រើនសារជាមួយដងវាយកូនបាល់ ដោយសារតែពួកគេចេញទៅញ៉ាំអីខាងក្រៅដោយមិនបានប្រាប់មុន។
អំពើដ៏ឃោរឃៅដែលមិនអាចទទួលយកបានមួយទៀតគឺ ផលិតកររូបនេះបានយកខ្សែហ្គីតាមកចងករបស់ Seokcheol ហើយទាញរឹតរហូតលោកមិនអាចដកដង្ហើមបាន នៅពេលដែលលោកបានបង្កកំហុសមួយអំឡុងពេលហ្វឹកហាត់។ មេក្រុមចម្រៀងរូបនេះ បានបន្ថែមទៀតថា លោកទទួលរងស្នាមជាំ និងរបួសនៅលើក ដោយសារតែកំហុសមួយនោះ។
Seokcheol បន្តបកស្រាយទៀតថា ទោះបីជាសមាជិកទាំងអស់ធ្លាប់ទទួលរងទារុណកម្មដ៏ឃោរឃៅនេះក៏ដោយ ប៉ុន្តែវាគឺពិបាកទទួលយកខ្លាំងណាស់សម្រាប់កូនក្រុមដែលមានវ័យក្មេងជាងគេ។ ពួកគេត្រូវបានវាយដំយ៉ាងខ្លាំង រហូតដល់ថ្នាក់រត់ទៅក្អួតក្នុងបន្ទប់ទឹក។ ក្រោយត្រឡប់មកពីក្អួតវិញ ផលិតកររូបនោះ នៅតែមិនឈប់វាយដំពួកគេឡើយ។
ខណៈព័ត៌មានលម្អិតកាន់តែបើកបង្ហាញ រឿងនេះបានធ្វើឲ្យមានការខឹងសម្បារជាខ្លាំងពីសំណាក់ប្រជាជនពាក់ព័ន្ធនឹងករណីប្រើហិង្សាដាក់ក្មេងៗបែបនេះ។ ប្រការនេះហើយ ទើបមហាជននាំគ្នា ដាក់ញត្តិស្នើដល់រដ្ឋាភិបាល ឲ្យដោះស្រាយបញ្ហានេះដោយយកចិត្តទុកដាក់៕