ក្រោយរឿងអាស្រូវហាក់ស្ងប់ស្ងាត់ ទីបំផុត Fan Bingbing ប្រកាសចូលសិល្បៈវិញឆាប់ៗនេះ

2018-11-17 03:00:00
ជីវិតតារា

2018-11-17 03:00:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយផ្ទុះរឿងអាស្រូវគេចពន្ធ តារាសម្ដែង Fan Bingbing បានអវត្តមានពីបណ្ដាញសង្គមអស់រយៈពេលយ៉ាងយូរ។ ទោះជាយ៉ាងណាក៏ដោយ ក្រោយចេញមុខទទួលស្គាល់កំហុស និងធ្វើការសុំទោសដល់មហាជនជាសាធារណៈមកនោះ ទីបំផុតតារាស្រីរូបនេះ បានត្រឡប់មកសកម្មលើបណ្ដាញសង្គមសាជាថ្មី ហើយថែមទាំងប្រកាសពីដំណឹងល្អរបស់នាង ទៅកាន់អ្នកគាំទ្រថែមទៀតផង។

កាលពីពេលថ្មីៗនេះ តារាសម្ដែង Fan Bingbing បានបង្ហោះរូបភាពមួយសន្លឹកទៅក្នុងក្រុម chat មួយរបស់នាងជាមួយមិត្តភ័ក្ដិ ដោយរូបភាពនោះជារូបភាពរបស់នាង អមនឹងអក្សរសរសេរថា "ជួបគ្នាថ្ងៃទី២០ ខែវិច្ឆិកា"។

ជាមួយសារនេះហើយ បានធ្វើឲ្យអ្នកលេងបណ្ដាញសង្គមចាប់អារម្មណ៍គ្រប់គ្នា ហើយមួយចំនួននៅតែសួរបញ្ជាក់ថា តើនាងពិតជាត្រឡប់មកចូលវិស័យសិល្បៈវិញនៅចុងខែវិច្ឆិកានេះ មែនឬក៏យ៉ាងណា?

មិនត្រឹមតែប៉ុណ្ណឹងនោះទេ កាលពីថ្ងៃទី ១១ ខែវិច្ឆិកានេះ Fan Bingbing ក៏បានបង្ហាញខ្លួនធ្វើការផ្សព្វផ្សាយផលិតផលថែរក្សាសម្រស់របស់នាងផងដែរ ហើយថែមទាំងផ្ដល់ជាកាដូតូចមួយសម្រាប់អ្នកគាំទ្រណាដែលបានជាវផលិតផលរបស់នាង។ កាដូនោះដែរ ជាថង់តូចមួយ ដែលមានលិខិតមួយនៅក្នុងនោះ ដែលនាងសរសេរពាក្យពេចន៍ជូនពរ និងបង្ហាញពីក្ដីស្រឡាញ់ចំពោះអ្នកគាំទ្រ។ ទាំងនេះហើយ ទើបមហាជនកាន់តែជឿជាក់ថា Fan Bingbing ពិតជាកំពុងត្រៀមខ្លួនចូលប្រឡូកវិស័យសិល្បៈវិញក្នុងពេលឆាប់ៗខាងមុខនេះ៕

ប្រភព៖ Kenh14 ប្រែសម្រួល៖ អន សុភក្ត្រា