ឯកឧត្ដម ថៃ នរៈសត្យា បកស្រាយរឿងដាក់ល្ខោនខោលវត្តស្វាយអណ្ដែត ជាសម្បត្តិបេតិកភណ្ឌពិភពលោក

2018-11-29 09:17:07
ព័ត៌មាន

2018-11-29 09:17:07
ចំនួនមតិ 0 | ចំនួនចែករំលែក 0

ចន្លោះមិនឃើញ

ខណៈនេះប្រជាជនកម្ពុជាចងចាំថ្ងៃទី ២៨ ខែវិច្ឆិកា ឆ្នាំ ២០១៨ ជាសកល ថាល្ខោនខោលនៅកម្ពុជាបានក្លាយជាសម្បត្តិបេតិកភណ្ឌពិភពលោក ដែលទទួលស្គាល់ដោយអង្គការយូណេស្កូ ដោយបញ្ជាក់ច្បាស់ពីការចុះបញ្ជីឈ្មោះ ល្ខោនខោលវត្តស្វាយអណ្ដែត។

រូបភាព Twitter អង្គការយូនេស្កូប្រកាសល្ខោនខោលវត្តស្វាយអណ្ដែត

ត្រង់ការយកឈ្មោះល្ខោនខោលវត្តស្វាយអណ្ដែត ទៅចុះបញ្ជីមិនបានកំណត់អត្តសញ្ញាណផ្សេងគ្នារវាងល្ខោនខោលខ្មែរឡើយ ហើយគ្រប់ល្ខោនខោលតាមតំបន់ផ្សេងៗក្នុងប្រទេសនៅតែជាល្ខោនខោលខ្មែរដែលត្រូវបានការពារ និងជាសម្បត្តិបេតិកភណ្ឌពិភពលោកដូចគ្នា។ នេះបើតាមការបញ្ជាក់របស់ឯកឧត្ដម ថៃ នរៈសត្យា ទីប្រឹិក្សាក្រសួងវប្បធម៌ និងវិចិត្រសិល្បៈ។

ហេតុតែ ល្ខោនខោលវត្តស្វាយអណ្ដែត ត្រូវបានដាក់ទៅចុះបញ្ជីនៅអង្គការយូណេស្កូ ជាសម្បត្តិបេតិកភណ្ឌពិភពលោក ដោយសារតែល្ខោនខោលនៅទីនោះមានឯកសារបញ្ជាក់គ្រប់គ្រាន់ស្របតាមលក្ខខណ្ឌផ្លូវការរបស់អង្គការដែលមានដូចជា ទីតាំងប្រវត្តិសាស្ត្រនៃការកកើតល្ខោនខោល មានសមាគមថែរក្សា សម្ដែង និងការបន្តវេនជាដើម។ នេះបើតាមការលើកឡើងខ្លះៗរបស់ ឯកឧត្ដមថៃ នរៈសត្យា។

ក្នុងនាមជាកូនខ្មែរស្រលាញ់វប្បធម៌ជាតិខ្លួន ឯកឧត្ដម ថៃ នរៈសត្យា លើកឡើងថាយុវជនគួរតែកុំព្យាយាមប្រៀបធៀបវប្បធម៌ជាតិខ្លួនល្អ ឬអន់ជាងជាតិសាសន៍ដទៃ។ ជាទូទៅគ្រប់ជាតិសាសន៍រស់នៅក្នុងតំបន់ក្បែរៗគ្នាតែងមានឥទ្ធិពលវប្បធម៌ពីគ្នាទៅវិញទៅមក បើយើងស្រលាញ់របស់វប្បធម៌យើង ជាតិសាសន៍គេក៏ស្រលាញ់របស់គេដូចគ្នា។ ដូចនេះជាជាងបង្កើតពាក្យមុសាដាក់គ្នា គួរព្យាយាមថែរក្សានិងពេញចិត្ត របស់ដែលខ្លួនមាន៕