- 2018-12-05 06:45:11
- ស្ទីលតារា
ទូតខ្មែរនៅថៃ បង្ហាញឈុតបុរាណបង្កប់អត្តសញ្ញាណជាតិជ្រាលជ្រៅឲ្យបរទេសបានស្គាល់
- 2018-12-05 06:45:11
- ចំនួនមតិ 0 | ចំនួនចែករំលែក 0
ទូតខ្មែរនៅថៃ បង្ហាញឈុតបុរាណបង្កប់អត្តសញ្ញាណជាតិជ្រាលជ្រៅឲ្យបរទេសបានស្គាល់
ចន្លោះមិនឃើញ
ឈុតបុរាណខ្មែរមួយឈុតពណ៌ទឹកសមុទ្រ រំលេចដោយក្បូរក្បាច់ររចនាល្អឯក ត្រូវបានបង្ហាញក្នុងកម្មវិធីដើរម៉ូដមួយមានឈ្មោះថា The 8th Celebration of Silk, Thai Silk Road to the World 2018 នៅប្រទេសថៃ កាលពីពេលថ្មីៗនេះ។
លោកស្រី ឡាយ ច័ន្ទរស្មី ទីប្រឹក្សានៃស្ថានឯកអគ្គរាជទូតកម្ពុជាប្រចាំប្រទេសថៃ គឺជាអ្នកគ្រងនូវសម្លៀកបំពាក់បុរាណខ្មែរដ៏ស្រស់ស្អាត បង្កប់ដោយអត្ថន័យ បង្ហាញក្នុងកម្មវិធីខាងលើ។ លោកស្រីថា ក្នុងនាមជាអ្នកការទូតនៅក្រៅប្រទេស ក្រៅពីការងារពង្រឹងទំនាក់ទំនងទ្វេភាគីជាមួយប្រទេសម្ចាស់ផ្ទះ និងការងារបម្រើផលប្រយោជន៍ជាតិ លោកស្រីក៏បានចូលរួមចំណែកទោះតិច ឬច្រើនក្នុងបង្ហាញវប្បធម៌ប្រពៃណីឲ្យបរទេសបានស្គាល់។ លោកស្រីពិតជាមានមោទកភាពក្នុងនាមជាកូនខ្មែរ ក្នុងការលើកស្ទួយវប្បធម៌ជាតិ ជាពិសេសបង្ហាញទង់ជាតិកម្ពុជាលើឆាកអន្តរជាតិ។
ឈុតដែលលោកស្រី ឡាយ ច័ន្ទរស្មី គ្រងនោះច្នៃដោយអ្នកច្នៃម៉ូដដ៏ចំណាន អ្នកស្រី លី កូឡាប បង្កប់ដោយ អត្ថន័យជ្រាលជ្រៅ ដោយផ្នែកខាងលើរំលេចរូបនាគព័ន្ធជុំវិញ តំណាងឲ្យព្រះនាងនាគ ឬព្រះនាងសោមា ចំណែកឯពណ៌ទឹកសមុទ្រ ឬពណ៌ខៀវខ្ចី តំណាងឲ្យមហាសាគរ ដែលជាដើមកំណើតទឹកដីខ្មែរ។ ឯសត្វដំរីមួយគូតំណាងឲ្យអំណាច ភាពរឹងមាំ មហិច្ចតា និងសេចក្តីសុខក្សេមក្សាន្ត ហើយក៏តំណាងឲ្យធនធានសត្វព្រៃ-ធម្មជាតិក្នុងដែនដីខ្មែរ។
ផ្នែកខាងក្រោមវិញ រចនាឡើងតាមលំនាំនៃក្បាច់រចនានៃរូបទេពអប្សរា តំណាងស្ត្រីបរិសុទ្ធ និងជាស្រីសួគ៌ ដែលមានឆ្លាក់នៅជញ្ជាំងប្រាសាទអង្គរវត្ត។ គ្រឿងអលង្ការលម្អរចនាក្បាច់តាមសិល្បៈខ្មែរពិតៗ និងមានស្នៀតសក់រូបផ្ការំដួល តំណាងឲ្យបុប្ផាជាតិ នៃព្រះរាជាណាចក្រកម្ពុជា។
កម្មវិធី The 8th Celebration of Silk, Thai Silk Road to the World 2018 មានការចូលរួមបង្ហាញពីបណ្តាអង្គទូតបរទេស និងតំណាងស្ថានទូតនានាចំនួន ៤៨ ប្រទេស រួមទាំងអ្នកច្នៃម៉ូដពី ៤៣ ប្រទេស រួមទាំងកម្ពុជា ជាពិសេសមានការចូលរួមឯកឧត្តម ប្រាយុទ្ធ ចាន់អូចា នាយករដ្ឋមន្រ្តីថៃ និងបវរកញ្ញា ឆ្នាំ ២០១៧ ពីប្រទេសជាច្រើន។