- 2019-01-31 02:03:55
- ព័ត៌មាន
ណាយចិត្តផង ឆ្អែតចិត្តផងជាមួយផលិតកម្ម អេនឌី តស៊ូធ្វើវីដេអូចម្រៀងខ្លួនឯង!
- 2019-01-31 02:03:55
- ចំនួនមតិ 0 | ចំនួនចែករំលែក 0
ណាយចិត្តផង ឆ្អែតចិត្តផងជាមួយផលិតកម្ម អេនឌី តស៊ូធ្វើវីដេអូចម្រៀងខ្លួនឯង!
ចន្លោះមិនឃើញ
លោក អេនឌី ដែលបាត់មុខមួយរយៈចុងក្រោយនោះ ថ្មីៗនេះ ទើបឃើញបញ្ចេញវីដេអូចម្រៀងថ្មីមួយបទ ដែលលោកអះអាងថា បានចំណាយលុយផ្ទាល់ខ្លួនធ្វើឡើង ក្រោយអស់ចិត្តនឹងផលិតកម្មពេក។
វីដេអូចម្រៀងបទថ្មីរបស់ អេនឌី នេះមានចំណងជើងថា "សុំធ្វើអ្នកជូតទឹកភ្នែក" ជាបទចម្រៀងតាម(Cover)បទដើមចិន។ ការសម្ដែងទៀតសោត ក៏លោករៀបចំខ្លួន ទៅតាមបែបប្រពៃណីចិនដែរ ដើម្បីអបអរឱកាសបុណ្យចូលឆ្នាំប្រពៃណីជាតិចិនដែលនឹងមកដល់នៅដើមសប្ដាហ៍ក្រោយ។
និយាយពីការធ្វើវីដេអូចម្រៀងខាងលើ ក្រោយពីទីផ្សារចម្រៀងរបស់លោកជួបភាពស្ងប់ស្ងាត់ បើទោះគេដឹងថាលោកបានចូលជ្រកក្រោមផលិតកម្មមួយទៅហើយក្ដី។ អេនឌី សុំរក្សាសិទ្ធិមិននិយាយចំពីផលិតកម្មដែលលោកបានចូលជ្រកនៅរយៈកាលចុងក្រោយ។ "ខ្ញុំសុំមិននិយាយពីឈ្មោះផលិតកម្មរបស់គេ ប៉ុន្តែវាស្ងាត់ពេក...មិនដឹងថាគាត់គិតយ៉ាងម៉េច គាត់យកយើងទៅហើយ យកទៅទុកអីចឹង!”។
តារាប្រុសនិយមច្រៀងបទស្រគត់ស្រគំរូបនេះ បញ្ជាក់ថា ផលិតកម្មហាក់មិនអើពើនឹងលោក ក្រោយពីបានអូសយករូបទៅ។ ផ្ទុយទៅវិញ តារាចម្រៀងផ្សេងក្នុងផលិតកម្មតែមួយ មានបទចម្រៀងចេញធម្មតា ចម្លែកតែលោក ផលិតកម្មហាក់ព្រងើយកន្តើយ។ បញ្ហានេះលោកបានកត់សម្គាល់ឃើញថា ក្រោយពីលោកបដិសេធថតចម្រៀងបែបសិចស៊ី។ "គាត់យកយើងទៅ ហើយឲ្យថតសិចស៊ី...ហើយមិនមែនសិចស៊ីធម្មតាៗឯណា សិចស៊ីឡើងចង់ស្រាតហើយ អ្នកណាហ៊ានថត...បើមនុស្សកំពុងតែត្រូវគេរិះគន់រឿងសិចស៊ីហ្នឹងផង!”។
លោក អេនឌី បានទទួលរងការរិះគន់ខ្លាំងៗ ក្រោយពីលោកបានបញ្ចេញបទចម្រៀងផ្ទាល់ខ្លួនប៉ុន្មានបទកាលពីឆ្នាំមុន ពិសេសក្នុងបទ "ទីបំផុតទើបដឹងថាគេកុហក" ដែលលោករំលេចឈុតសិចស៊ីច្រើន។ បន្ទាប់ពីនោះមក លោកបានប្ដូរធ្វើវីដេអូចម្រៀងបែបស្រគត់ស្រគំវិញ ដោយសាមីខ្លួនបានអះអាងថា ត្បិតមិនសូវមានអ្នករិះគន់ ប៉ុន្តែវីដេអូមនោសញ្ចេតនានោះរបស់ខ្លួន មិនសូវមានការគាំទ្រប៉ុន្មានទេ ខុសពីវីដេអូចម្រៀងលាយសិចស៊ី រិះគន់ខ្លាំង ប៉ុន្តែអ្នកមើលច្រើនដែរ។
យ៉ាងណា លោកប្រាប់ថា នៅតែប្រយ័ត្នចំពោះឈុតសិចស៊ី ទើបបដិសេធការងារសិចស៊ីដែលដាក់ដោយផលិតកម្ម។ បើទោះមួយរយៈចុងក្រោយ ផលិតកម្មហាក់មិនរវល់ ប៉ុន្តែ អេនឌី លោកឈប់ខ្វល់ហើយ ហើយបានងាកមកធ្វើវីដេអូចម្រៀងខ្លួនវិញ។ "ឥឡូវធ្វើខ្លួនឯង ចេញខ្លួនឯងវាស្រួលជាង វាមិនហត់ចិត្ត ធ្វើខ្លួនឯង យើងចង់ធ្វើអី ស្រេចតែយើង...ហត់ចិត្តណាស់បង ហើយក៏ស្មារលាការងារច្រៀងក្នុងផលិតកម្មដែរ ឥឡូវហ្នឹងក៏មានគេទាក់ទងទៀតដែរ តែដូចប្រាប់អីចឹង ខ្ញុំលែងចង់ហើយ!”។
តារាប្រុសដដែល បញ្ជាក់ថា បន្ទាប់ពីវីដេអូចម្រៀង "សុំធ្វើអ្នកជូតទឹកភ្នែក" លោកក៏គ្រោងនឹងចេញវីដេអូថ្មីបន្ទាប់ទៀតនៅប៉ុន្មានថ្ងៃខាងមុខ ខណៈបច្ចុប្បន្នវីដេអូចម្រៀងថ្មីនោះ សម្រេចបានជិត៨០%ហើយ៕