ហក់ចូលសិល្បៈមួយប្រាវ ម៉ក់ ឈុនលី ឡើងតម្លៃខ្លួន ខ្ពស់ហួសស្មាន

2019-02-08 02:45:00
ជីវិតតារា

2019-02-08 02:45:00
ចំនួនមតិ 0 | ចំនួនចែករំលែក 0

ចន្លោះមិនឃើញ

តាំងពីកសាងកេរ្តិ៍ឈ្មោះតាមរយៈការសម្ដែងរឿងខ្នាតធំ "កូនពស់កេងកង" រួចមក កុមារា ម៉ក់ ឈុនលី កាន់តែក្ដាប់បានទីផ្សាសិល្បៈច្រើនឡើងៗ រហូតតម្លៃខ្លួនក្នុងការថត ក៏ឡើងទៅតាមនោះដែរ។

តារាសម្ដែងវ័យ ១៥ឆ្នាំ រូបនេះ ប្រាប់ថា មួយរយៈនេះ មានគេហៅថតច្រើនដូចជា រឿងដុំ-ភាគ ថតស្ប៉ត និង MV ជាដើម។ ឈុនលី យល់ថា ទីផ្សារសិល្បៈរបស់ខ្លួនកាន់តែដើរទៅមុខសន្សឹមៗ ក្រោយពីពុកម៉ែ បងប្អូន បានឃើញសមត្ថភាពសម្ដែងក្នុងខ្សែរឿង និង ស្ប៉តពាណិជ្ជកម្មកន្លងមក។

បើនិយាយពីកម្រៃវិញ ក៏ទទួលបានច្រើនជាងពីមុនឆ្ងាយដែរ រហូតដល់រឿងដុំខ្លះបានខ្ទង់ជាង២ពាន់ដុល្លារ ចំណែករឿងភាគបានជាង១ពាន់ដុល្លារ ។ លើសពីនេះ មានខាងក្រុមហ៊ុនខ្លះ បានទាក់ទងឲ្យតារារៀនថ្នាក់ទី៨ នៅសាលាដង្កោ ថតMV ឬ ស្ប៉តពាណិជ្ជកម្មហូរហែ តែជួនកាលខ្លួនបដិសេធ ដោយសារជាប់ប្រលង មិនអាចខានបាន។

បើទោះជាការងារសិល្បៈកាន់តែមានសន្ទុះ ស្របពេលការសិក្សាកំពុងឆ្ពោះទៅមុខដែរ តែ ឈុន លី ប្រាប់ថា បានបែងចែកពេលវេលាសិក្សាបានត្រឹមត្រូវ មិនឲ្យប៉ះពាល់ដល់ការរៀនសូត្រនោះទេ ព្រោះ ឈុន លី ស្រលាញ់ការសិក្សាខ្លាំងណាស់។

កុមារា ម៉ក់ ឈុន លី ផ្ដើមចូលសិល្បៈដំបូងចុងឆ្នាំ២០១៧ ដោយចៃដន្យបំផុតពេលលេង Facebook នៅពេលក្រុមហ៊ុនមួយ ឃើញសម្រស់និងវ័យរបស់ ម៉ក់ ឈុនលី អាចថតស្ប៉តពាណិជ្ជកម្មលក្ខណៈគ្រួសារបាន ក៏ហៅថតតែម្ដង។ ចាប់ពីពេលនោះមក កុមារាកើតនៅទីក្រុងភ្នំពេញ ចេះតែមានឱកាសបន្តបន្ទាប់ក្នុងពិភពសិល្បៈ៕

អត្ថបទ៖ លឹម សុនា