- 2019-03-11 03:20:00
- ជីវិតតារា
Freshy Boy ហន គឹមធាន តស៊ូតាំងពីតួកំប៉ិកកំប៉ុករហូតតួសំខាន់និងក្តាប់បានស្ប៉តក្រៅប្រទេស
- 2019-03-11 03:20:00
- ចំនួនមតិ 0 | ចំនួនចែករំលែក 0
Freshy Boy ហន គឹមធាន តស៊ូតាំងពីតួកំប៉ិកកំប៉ុករហូតតួសំខាន់និងក្តាប់បានស្ប៉តក្រៅប្រទេស
ចន្លោះមិនឃើញ
ហន គឹមធាន អតីតជយលាភី Freshy Boy ចំណាត់ថ្នាក់លេខ៣ ជំនាន់ទី១៥ ប្រាប់ថា អស់ពេលជាង២ឆ្នាំ ដែលខ្លួនប្រឡូកសិល្បៈមកនេះ ឆ្លងកាត់នូវការខំប្រឹងតស៊ូព្យាយាមជាច្រើន តាំងពីតួរៃរង កំប៉ិកកំប៉ុក រហូតក្លាយជាតួអង្គសំខាន់ និងក្ដាប់បានស្ប៉តពាណិជ្ជកម្មឲ្យក្រុមហ៊ុនក្រៅប្រទេសថែមទៀត។
តារាមកពីខេត្តបាត់ដំបង បន្តថា ពេលចូលសិល្បៈដំបូងៗកូនទី៤ ចំណោមបងប្អូន៥នាក់ ឲ្យដឹងថា មានការលំបាកខ្លាំងណាស់ ណាមួយខ្លួនជាអ្នកខេត្តមិនសូវស្គាល់គេឯង និងតារាថ្មីផង ដូច្នេះមិនសូវទទួលបានការងារច្រើនទេ។ ថ្វីត្បិតខ្លួនបានឆ្លងកាត់ការប្រលងប្រុសស្អាត តែដោយសារជាតារាថ្មីថ្មោង ម្ល៉ោះហើយខាងផលិតករឲ្យសម្ដែងតួអ្វី ក៏ព្រមថតដែរ ដើម្បីយ៉ាងណាកសាងកេរ្តិ៍ឈ្មោះនិងឱកាសក្នុងពិភពសិល្បៈ។
ក្រោយៗមក គួបផ្សំនឹងសមត្ថភាព ទេពកោសល្យសម្ដែង និងតែងចូលរួមកម្មវិធីសិល្បៈផ្សេងៗ គឹមធាន ក៏ចេះតែមានឱកាសបន្តបន្ទាប់ក្នុងវិស័យនេះ រហូតបានថតMV ដើរបង្ហាញម៉ូដ ថតស្ប៉តពាណិជ្ជកម្មឲ្យក្រុមហ៊ុនក្រៅស្រុកនិងក្នុងស្រុក រួមទាំងភាពយន្តភាគ រឿងខ្លី និងដុំផងដែរ។ លើសពីនេះ ធាន គឹមហន បានបង្ហាញទេពកោសល្យក្នុងរឿងល្បីមួយគឺ "សសរកន្លោង" ហើយតែងមានផលិតករជាច្រើនទាក់ទងឲ្យថត ជាហូរហែ។
ជំហានចូលសិល្បៈដំបូង បើធៀបនឹងបច្ចុប្បន្ន ពិតជាមានការខុសប្លែកគ្នាដាច់ឆ្ងាយតែម្ដង។ សម្រាប់ និស្សិតដែលកំពុងសិក្សាជំនាញគ្រប់គ្រងសេដ្ឋកិច្ច នៅសាកលវិទ្យាល័យបៀលប្រាយ យល់ថា មើលពីក្រៅគិតថា សិល្បៈមានភាពងាយស្រួល តែតាមពិតមិនដូច្នេះទេ គឺមិនចេះតែចូលៗនោះឡើយ។ បើសិនជាគ្មានសមត្ថភាព តស៊ូ អត់ធ្មត់ និងព្យាយាមនោះទេ មិនងាយនឹងមានឱកាស អាចកសាងភាពល្បីល្បាញបាននោះទេ។
សម្រាប់ គឹមហន វិញ ពេលនេះ បានបើកហាងកាត់សក់មួយកន្លែងហើយ ដែលមានទីតាំងនៅម្តុំសាលាអង្គអេង បន្ថែមពីលើអាជីពសម្ដែង។ យុវជនវ័យក្មេងរូបនេះ អះអាងថា ខ្លួនមិនបោះបង់អាជីពសិល្បៈចោលនោះទេ ទោះជាខ្លួនរៀនចប់ក៏ដោយ។ ផ្ទុយទៅវិញ មានតែពង្រឹងជំនាញបន្ថែមដូចជា ពិធីករ ឬចេះច្រៀង ដើម្បីបង្ហាញទេពកោសល្យជូនទស្សនិកជន ក៏ដូចជាបំពេញក្ដីស្រមៃតាំងពីតូចដែលស្រលាញ់សិល្បៈនេះ៕