Junhyung សមាជិកក្រុម Highlight ប្រកាសចេញពីក្រុម ក្រោយពាក់ព័ន្ធជុំវិញរឿងអាស្រូវផ្លូវភេទ

2019-03-14 08:09:52
ព័ត៌មាន

2019-03-14 08:09:52
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀង Junhyung បានទទួលស្គាល់ថា លោកពិតជាបានពាក់ព័ន្ធជាមួយតារាចម្រៀង Jung Joon Young ជុំវិញនឹងរឿងអាស្រូវផ្លូវភេទមែន ហើយលោកក៏បានធ្វើការសុំទោស និងសម្រេចដកខ្លួនចេញពីក្រុម Highlight។

នៅថ្ងៃទី ១៤ ខែមិនានេះ ខាងផលិតកម្ម Around US បានបញ្ជាក់ថា៖ "នៅអំឡុងពេលមួយក្នុងចុងឆ្នាំ ២០១៥ Yong Junhyung បានជួបគ្នាជាមួយ Jung Joon Young នៅឯកម្មវិធីផឹកស៊ីមួយ។ នៅថ្ងៃបន្ទាប់ ខណៈទាក់ទងគ្នាផ្ទាល់តាម Kakao Talk លោកត្រូវបានដឹងថា Jung Joon Young លួចបង្កប់កាមេរ៉ា ថតវីដេអូខុសច្បាប់។ ក្រោយមក Junhyung បានទទួលស្គាល់ថា លោកបានចុចបើកមើលវីដេអូនោះ ហើយលោកនិង Jung Joon Young បាននាំគ្នាចែករំលែកអ្វីដែលមិនសមរម្យជុំវិញនឹងវីដេអូនោះផងដែរ"។

បើត្រឡប់ទៅថ្ងៃទី ១៣ ខែមិនានេះវិញ តារាចម្រៀង Junhyung ក៏ត្រូវបានប៉ូលិសឃាត់ខ្លួន ដើម្បីធ្វើការសាកសួរក្នុងនាមជាសាក្សីជុំវិញរឿងក្ដីស៊ើបអង្កេតរបស់តារាចម្រៀង Jung Joon Young។ ជាមួយគ្នានេះដែរ ខាងផលិតកម្ម Around US ក៏បានបញ្ជាក់ថា៖ "Junhyungក៏បានទទួលស្គាល់ថាទង្វើមួយនេះ គឺគ្មាននរណាម្នាក់អាចលើកលែងទោសបានឡើយ ហើយលោកក៏មានអារម្មណ៍ថាខុសឆ្គងខ្លាំងចំពោះអ្នកគាំទ្ររបស់ក្រុម Highlight ដែលលោកបានធ្វើឲ្យពួកគេខកចិត្តដែលខំទុកចិត្ត និងស្រឡាញ់លោក។ ដើម្បីជាការទទួលខុសត្រូវសម្រាប់ទង្វើរបស់ខ្លួន និងបញ្ចៀសការខូចឈ្មោះរបស់ក្រុម Junhyung នឹងចាកចេញពីក្រុម Highlight នៅថ្ងៃទី ១៤ ខែមិនា ឆ្នាំ២០១៩នេះ"៕

ប្រភព៖ Allkpop ប្រែសម្រួល៖ អន សុភក្ត្រា