- 2019-03-15 01:00:00
- ជីវិតតារា
ទើបប្រឡូកសិល្បៈ តារាវ័យក្មេង ពឹង ចាន់បូណ៍មី ធ្លាប់កាន់ពានពីក្រៅប្រទេសមកកម្ពុជា យ៉ាងមោទកភាព
- 2019-03-15 01:00:00
- ចំនួនមតិ 0 | ចំនួនចែករំលែក 0
ទើបប្រឡូកសិល្បៈ តារាវ័យក្មេង ពឹង ចាន់បូណ៍មី ធ្លាប់កាន់ពានពីក្រៅប្រទេសមកកម្ពុជា យ៉ាងមោទកភាព
ចន្លោះមិនឃើញ
ទើបតែឈានជើងក្នុងវិស័យសិល្បៈ ប៉ុន្តែ ពឹង ចាន់បូណ៍មី បានសាងស្នាដៃ និងឱកាសសិល្បៈ ជាច្រើន។ ក្នុងនោះ លោកថែមទាំងយកពានពីការប្រកួតអន្តរជាតិមកទឹកដីកម្ពុជា យ៉ាងមោទកភាព ពីការប្រកួតកម្មវិធី Mister United Continents ធ្វើឡើងនៅប្រទេសហ្វីលីពីន ក្នុងចំណាត់ថ្នាក់លេខ ៣ ដោយមានប្រទេស២៥ ចូលរួម កាលបីពេលថ្មីៗនេះផងដែរ។
កម្លោះសង្ហារូបនេះ បន្តថា ដំបូងឡើយលោកគ្រាន់ជាអ្នកចម្រៀងនៅតាម Affair ម្នាក់ប៉ុណ្ណោះ។ ក្រោយមក លោកក៏បានឱកាសថតរឿង "រនាតឯក " ដោយដើរជាតួអង្គម្នាក់ មិនសូវសំខាន់នោះទេ។ ប៉ុន្តែដោយសារការខំប្រឹងប្រែង គួបផ្សំនឹងរូបសម្បត្តិ ទេពកោសល្យពីកំណើត លោក កែវ រតនា អ្នកដឹកនាំរឿងនៅស្ថានីយទូរទស្សន៍ប៉ុស្តិ៍លេខ៥ បានអនុញ្ញាតឲ្យតារាអាយុ២៣ឆ្នាំ រូបនេះ សម្ដែងជាតួអង្គឯកនឹងកញ្ញា រចនា រ៉ាវ៉ាឌី ក្នុងរឿង "វិញ្ញាណស្នេហ៍"។ ឱកាសសម្ដែងរឿង បានធ្វើឲ្យលោកពង្រីកបទពិសោធន៍ច្រើន និងឆាប់សម្ដែងចូលតួបានល្អ កាន់តែប្រសើរជាងមុន។
ត្រឹមរយៈពេលខ្លី លោក បូណ៍មី ចេះតែមានទីផ្សារសិល្បៈបន្តបន្ទាប់ដូចជា ថតភាពយន្តភាគ-ដុំ ថតស្ប៉ត និងថត MV ផងដែរ។ តារាប្រុសវ័យក្មេងរូបនេះ បង្ហើបថា ដោយសារតែលោកធ្លាប់ឆ្លងកាត់ការប្រលងលក្ខណៈ អន្តជាតិ ម្ល៉ោះហើយធ្វើឲ្យលោកបានដុសខាត់សមត្ថភាព និងបង្កើនមហិច្ឆតាកាន់តែខ្លាំងលើវិថីសិល្បៈ ដោយចង់ពង្រឹងបន្ថែមលើការដើរម៉ូដ ច្រៀង និងពិធីករ ។
ទន្ទឹមនឹងនេះ លោក ក៏នៅតែមានបំណងចង់ប្រកួតប្រជែងកម្មវិធីផ្សេងៗទៀត ក្នុងការទទួលបានបទពិសោធន៍កាន់តែច្រើន ព្រមទាំងចង់ដណ្ដើមយកពានរង្វាន់ និងលើកស្ទួយកម្ពុជាលើឆាកអន្តរជាតិ ផងដែរ ។ សម្រាប់លោកផ្ទាល់វិញ យល់ថា សិល្បៈមិនងាយស្រួលឡើយ មិនអាចគ្រាន់តែស្អាតមួយមុខ ស្រួលនឹងចូលសិល្បៈទេ លុះត្រាតែមានសមត្ថភាព និងចេះបង្កើតស្នាដៃឲ្យសិល្បកររៀមច្បងបានឃើញ ទើបអាចឈោងចាប់ក្នុងវិថីនេះបានយ៉ាងរលូន៕