- 2019-04-19 02:13:55
- ព័ត៌មាន
ធ្ងន់កអ្នកប្រព្រឹត្តហើយ សមាគមភាពយន្តមិនលើកលែង ចំពោះករណីបំពានលើរឿង "ជួបស៊យ" វគ្គ២
- 2019-04-19 02:13:55
- ចំនួនមតិ 0 | ចំនួនចែករំលែក 0
ធ្ងន់កអ្នកប្រព្រឹត្តហើយ សមាគមភាពយន្តមិនលើកលែង ចំពោះករណីបំពានលើរឿង "ជួបស៊យ" វគ្គ២
ចន្លោះមិនឃើញ
សមាគមភាពយន្ត បានបញ្ជាក់ឲ្យដឹងថា សមាគមបាន និងកំពុងដុតដៃដុតជើងហើយ ប្រឆាំងនឹងការបំពាន លើករណីរឿង "ជួបស៊យ" វគ្គ២ របស់ផលិតកម្ម LD ត្រូវបានជនអនាមិកលួចថតចម្លងយកទៅបង្ហោះលើបណ្ដាញសង្គមយ៉ាងអានាធិបតេយ្យ។
សមាគមភាពយន្ត ចាប់បានសកម្មភាពមិនប្រក្រតីខាងលើ ក្រោយពីឃើញឃ្លីបនៃសាច់រឿងដឹកនាំដោយ នាយ គ្រឿន នេះ ត្រូវបានគេឃើញបង្ហោះនៅលើបណ្ដាញសង្គមគួរឲ្យភ្ញាក់ផ្អើល។ ករណីនេះ សមាគមដែលដឹកនាំដោយលោក ព្រំ សិលា បានហៅការណ៍នេះថា គឺជាសកម្មភាពបំពានច្បាប់កម្មសិទ្ធិបញ្ញាដែលមិនអាចលើកលែងបាន ហើយថា ជនប្រព្រឹត្តត្រូវតែទទួលខុសត្រូវចំពោះមុខច្បាប់។
"យើងខ្ញុំលែងទទួលពាក្យ«សូមទោស»ឆ្លើយថាមិនដឹងទៀតហើយ អ្នកប្រព្រឹត្តខុសនឹងត្រូវទទួលទោសចំពោះមុខច្បាប់ " សាររបស់សមាគមភាពយន្តនារសៀលម្សិលមិញ។ ជាមួយគ្នា សមាគមមួយនេះ ស្នើឲ្យបងប្អូនសាធារណជន ចូលរួមទប់ស្កាត់នឹងកម្ចាត់រាល់សកម្មភាពលួចចម្លងដ៏គួរឲ្យអៀនខ្មាសនេះ ដើម្បីធានាដល់ភាពរីកចម្រើន រុងរឿងនៃសិល្បៈភាពយន្តរបស់ជាតិ។
ជាថ្មីម្ដងទៀត សមាគមភាពយន្ត បញ្ជាក់ជំហរថា មិនឱបដៃឈរមើលករណីបំពានច្បាប់មួយនេះឡើយ។ "យើងខ្ញុំនឹងរៀបចំរបាយការណ៍ដាក់ជូនក្រសួងវប្បធម៌ និងវិចិត្រសិល្បៈ"។
ក្រោយប្រតិកម្មរបស់សមាគមភាពយន្ត វីដេអូថតចម្លងរឿង "ជួបស៊យ" វគ្គ២ ត្រូវបានលុបចេញពីឆាណែលយូធូបមួយចំនួនហើយ គិតត្រឹមព្រឹកថ្ងៃនេះ។
ចំណុចគួរកត់សម្គាល់ ករណីខាងលើ បានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីរឿង "ជួបស៊យ" វគ្គ២ បានចាក់បញ្ចាំង ជូនប្រិយមិត្តទស្សនាកាលពីមុនបុណ្យចូលឆ្នាំប្រពៃណីជាតិខ្មែរ ហើយទទួលបានការពេញនិយម។ នេះបើតាមកញ្ញា កែវ មរកត អ្នកសម្របសម្រួលការចាក់បញ្ចាំងភាពយន្តខាងលើឲ្យផលិតកម្ម LD។
ករណីនេះ ត្រូវបានទទួលស្គាល់ ដោយលោក ព្រំ បញ្ញាវ័ន្ត ប្រធានផ្នែកទីផ្សាររបស់រោងភាពយន្តលេជេន។ លោក លើកឡើងថា ភាពយន្តខ្មែរមួយរឿងនេះ ទទួលបានការបញ្ចេញខ្លាំងនៅរោងភាពយន្តរបស់លោកទាំងប៉ុន្មានសាខា។ "តាំងពីថ្ងៃបញ្ចាំង ២-៣ ថ្ងៃដំបូង យើងលក់សំបុត្រ Sold Out ស្ទើរតែគ្រប់ម៉ោង។និយាយជារួមរោងភាពយន្តលីជេនយើងដែលមាន៦សាខា បានផ្ដល់ឲ្យគាត់ប្រមាណ៥០ស្គ្រីន ហើយក្នុងចំណោមនេះ គឹមានអ្នកគាំទ្រ ប្រមាណពី ៨០ ទៅ ៨៥%។ ខ្ញុំអាចនិយាយបានថា រឿងនេះ មានសន្ទុះខ្លាំងស្ទើរដូចនឹងរឿង "Friend Zone” ដែលចាក់បញ្ចាំងពីខែ៣"។
ករណីនេះ(សន្ទុះគាំទ្រ) ក៏មានដំណឹងថា បានកើតនៅរោងភាពយន្ត Major Cineplex by Smart ដូចគ្នា។ យ៉ាងណា អ្នកនាង នូណា ប្រធានផ្នែកទីផ្សាររបស់រោងភាពយន្ត មិនអាចសុំការអធិប្បាយបានទេ ដោយសារទូរសព្ទមិនអាចទាក់ទងបាន។
រឿង "ជួបស៊យ" វគ្គ២ ជាសាច់រឿងតពីរឿង "ជួបស៊យ" កាលពីឆ្នាំ ២០១៧។ រឿងនេះត្រូវបានដាក់បញ្ចាំងកាលពីថ្ងៃទី ១១ ខែមេសា ២០១៩ មុន៣ថ្ងៃនៃការមកដល់បុណ្យចូលឆ្នាំប្រពៃណីជាតិខ្មែរ៕
មង្គលការ សូរ្យ អេនណា យប់មិញ សុទ្ធតែស្រីស្អាត និងបារាំងច្រមុះស្រួច