- 2019-05-24 02:48:32
- ព័ត៌មាន
សញ្ញាវិជ្ជមាន! ផលិតករ ឯកភាពងាកទៅរករសជាតិផ្សេងៗ ក្រៅតែពីរឿងខ្មោច និងកំប្លែង
- 2019-05-24 02:48:32
- ចំនួនមតិ 0 | ចំនួនចែករំលែក 0
សញ្ញាវិជ្ជមាន! ផលិតករ ឯកភាពងាកទៅរករសជាតិផ្សេងៗ ក្រៅតែពីរឿងខ្មោច និងកំប្លែង
ចន្លោះមិនឃើញ
ក្នុងទិសដៅ ធ្វើឲ្យឧស្សាហកម្មភាពយន្តក្នុងស្រុក កាន់តែមានពណ៌សម្បុរស នៅក្នុងការជួបគ្នាចុងក្រោយមួយកាលពីរសៀលថ្ងៃទី ២២ ឧសភា កន្លងទៅថ្មីៗនេះ ផលិតករភាពយន្តក្នុងស្រុក បានឯកភាពលើការជំរុញឲ្យមានការផលិតភាពយន្តចម្រុះ ជាជាងប្រជែងគ្នាផលិតតែរឿងខ្មោចដូចកាលពីអតីតកាល។
បញ្ហានេះ ត្រូវបានលើកឡើងក្នុងអង្គប្រជុំជជែកពិភាក្សាមួយអំពីស្ថានភាព និងការលើកកម្ពស់នៃភាពយន្តខ្មែរ បន្ទាប់ពីថ្មីៗ មានការប្រកាសលើកលែងពន្ធលើការផលិតភាពយន្តក្នុងស្រុកដោយរាជរដ្ឋាភិបាល ដែលបញ្ហានេះ ធ្លាប់ជាកង្វល់ដ៏ធំ និងជាយូរមកហើយ របស់ផលិតករភាពយន្តក្នុងស្រុក។
លោក ព្រំ សិលា ប្រធានសមាគមភាពយន្តកម្ពុជា បានលើកឡើងថា ការប្រកាសលើកលែងពន្ធលើការផលិតភាពយន្តដោយសម្ដេចតេជោ ហ៊ុន សែន កាលពីពេលថ្មីៗ គឺជាការលើកទឹកចិត្តមួយយ៉ាងមានប្រសិទ្ធភាព ដែលធានាដល់ការផលិតភាពយន្តក្នុងស្រុក កាន់តែមានស្ថិរភាពជាងមុន ពោលគឺផលិតករ នឹងកាន់តែមានទឹកចិត្តក្នុងបន្តផលិតភាពយន្តតទៅទៀត និងបន្តឈានទៅផលិតភាពយន្តកាន់តែមានគុណភាព។
នៅក្រោយការពិភាក្សានេះ អង្គប្រជុំ បានរកឃើញថា ភាពយន្តក្នុងស្រុកដែលជនជោរដោយប្រភេទរឿងខ្មោច និងកំប្លែងនោះ ហាក់ធ្លាក់ចុះការគាំទ្រ និងមិនអាចរកអ្នកមើលថ្មីៗបាន។ ដូច្នេះហើយចំណុចសំខាន់ដែលនៅសល់ គឺការផលិតភាពយន្តចម្រុះ។ លោក សិលា ដែលជាផលិតករផង ជាប្រធានសមាគមភាពយន្តផង បានជំរុញ ឲ្យផលិតករ ផលិតរឿងឱ្យបានគ្រប់រសជាតិ មិនត្រឹមតែជាប្រភេទរឿងកំប្លែង និងរឿងខ្មោចនោះទេ។
ចំណុចនេះ លោកអះអាងថា ដើម្បីផ្ដល់រសជាតិថ្មី មិនច្រំដែល ដែលអាចទាញមកវិញឲ្យទស្សនិកជននៅតែបន្តគាំទ្រភាពយន្តខ្មែរ។ លោកបន្ថែមថា នេះក៏ជានយោបាយ បង្កើនចំនួនអ្នកគាំទ្រដែរ ដែលផលិតករមានចំណែកសំខាន់ ឱ្យទស្សនិកជនងាកមកស្រលាញ់ភាពយន្តខ្មែរឱ្យបានច្រើន ទើបឧស្សាហកម្មភាពយន្តក្នុងស្រុកទាំងមូល អាចបន្តរីកចម្រើនទៅមុខបាន។
លោក ហ៊ុយ យ៉ាឡេង ផលិតកររឿង "ធ្មប់" ឆ្លើយតបជាមួយ Sabay តាមសារអេឡិចត្រូនិក បានអះអាងថា ផលិតករខ្មែរទាំងអស់ បានឯកភាពចំពោះការជំរុញរបស់ប្រធានសមាគមភាពយន្តខាងលើ។ លោកថា វាពិតជាដល់ពេលមែន ដែលឧស្សាហកម្មភាពយន្តរបស់ខ្មែរ ត្រូវតែបន្ថែមរសជាតិថ្មី និងសម្បូរបែបទៅឲ្យទស្សនិកជន។ ហ៊ុយ យ៉ាឡេង ដែលជោគជ័យតាមរយៈរឿងខ្មោចបែបរន្ធត់ ដូចជារឿង "ធ្មប់" និង "ទារុណកម្មខ្មោច" ជាដើម បានបញ្ជាក់ថា លោកនឹងត្រៀមរករសជាតិថ្មី ដូចការលើកឡើង សម្រាប់ដាក់ជូនទៅទីផ្សារនាពេលខាងមុខ។
ងាកមកនាយ គ្រឿន ជាអ្នកនិពន្ធ និងដឹកនាំសម្ដែង ទទួលជោគជ័យក្នុងរឿង "ជួបស៊យ" វគ្គ២ ដែលហាក់មើលដឹងទីផ្សាររួចហើយនោះ បានថ្លែងប្រាប់ Sabay ថា លោកក៏បានត្រៀមបញ្ចេញភាពយន្តរសជាតិថ្មីទៀតដែរ បន្ទាប់ពីស្នាដៃខាងលើ។ លោកថា រឿងក្រោយរបស់លោក គឺអាចជាប្រភេទរឿងទាក់ទងនឹងសង្គមច្រើនជាង។ យ៉ាងនេះក្ដី លោកថា អាចនឹងនៅតែលាយកំប្លែងតិចតួចដែរ ដោយសារតែលោកជាអ្នកកំប្លែង។
ជុំវិញបញ្ហានេះដដែល លោក លៀក លីដា ចាងហ្វាងផលិតកម្ម LD បានឯកភាពដូចគ្នា ចំពោះការជំរុញឲ្យការផលិតភាពយន្តគួរចៀសពីការផលិតរឿងខ្មោចដដែលៗ។ លោកថា ធ្វើបែបនេះ ឧស្សាហកម្មភាពយន្តពិបាកនឹងទៅមុខ ហើយផលិតផលភាពយន្តរបស់ខ្លួន(ផលិតករ) ក៏មិនអាចជ្រៀតទៅទីផ្សារក្រៅប្រទេសបានដែរ។
ឆ្លើយតបនឹងបញ្ហានេះ លោក លីដា អះអាងថា លោកបានត្រៀមរួចហើយ ដើម្បីបន្ថែមរសជាតិថ្មី សម្រាប់ដាក់ទៅទីផ្សារទាំងក្នុង និងក្រៅស្រុក។ រឿងក្រោយរបស់លោក ជារឿងប្រភេទ Action ដោយបានចំណាយទុនច្រើនជាង ៣០ម៉ឺនដុល្លារ ហើយបច្ចុប្បន្នកំពុងដំណើរការផលិត។ លោកថា លោកវិនិយោគដ៏សម្បើមនេះ ដើម្បីបន្ថែមផ្លែផ្កាឲ្យឧស្សាហកម្មភាពយន្តក្នុងស្រុកទាំងមូល និងសម្រាប់បំបែកទីផ្សារទៅទីផ្សារបរទេសសម្រាប់ខ្លួនឯងផង។
តាមរបាយការណ៍ពីនាយកដ្ឋានភាពយន្ត បញ្ចេញដោយប្រធាននាយកដ្ឋានលោក ប៉ុក បូរក្ស ពេញមួយឆ្នាំ ២០១៨ ឧស្សាហកម្មភាពយន្តក្នុងស្រុក គ្របដណ្ដប់ដោយភាពយន្តប្រភេទខ្មោច(ខ្មោចរន្ធត់ ខ្មោចបែបកំប្លែង) ប្រមាណ ៦០%។ តួលេខនេះ លោកថា ពិតជាច្រើនពិតមែន ដូច្នេះហើយ លោកជំរុញដូចគ្នា ឲ្យផលិតករគិតគូរពីការងាកចេញខ្លះពីការផលិតតែរឿងខ្មោចដូចអតីតកាល។
“បើយើងទៅមើលប្រទេសដែលមានឧស្សាហកម្មភាពយន្តរីកចម្រើនហើយ ដែលនៅក្បែរយើងនេះ ក៏គេមានរឿងខ្មោចដូចតែគ្នាដែរ។ ដូច្នេះ ខ្ញុំអាចនិយាយបានថា យើងមិនអាចចោលភាពយន្តប្រភេទនេះដូចគ្នា ប៉ុន្តែសុំឲ្យមានតុល្យភាពរវាងប្រភេទភាពយន្តនីមួយៗ"។ លោក បូរក្ស បន្ថែម។
ជាមួយគ្នា ប្រធាននាយកដ្ឋានដដែល នៅបានក្រើនរំលឹកថា ផលិតករត្រូវយកចិត្តទុកដាក់លើការផលិតឲ្យមានគុណភាព ខណៈរាជរដ្ឋាភិបាលទើបនឹងប្រកាសលើកលែងពន្ធលើការផលិត និងការនាំចូលសម្ភារៈពីបរទេសហើយ។ មិនអីចឹង លោកថា ឧស្សាហកម្មភាពយន្តក្នុងស្រុកនៅតែមិនអាចទៅមុខបាន មិនអាចចូលទីផ្សារបរទេសបាន៕
អាន៖ វ័យត្រឹម ១២ឆ្នាំ តែ ប្អូនស្រី ជូលី មានគំនិតគិតគូរបានវែងឆ្ងាយណាស់
អាន៖ តារាស្រីដ៏ល្បីរបស់ភូមាម្នាក់ សម្រេចចិត្តបួសជាដូនជី ឈប់ស្ដាយនឹងរឿងលោកិយ
អាន៖ កាលមុន Surprise ឲ្យ អ៊ី លីឈី ខឹងរឿងលាងចាន ឥឡូវ ពូសេម ធ្វើស៊ីភរិយាទៀតហើយ