ឡូយ! ប្រកួតK-POP World Festival នៅ CKCC យើងល្ងាចនេះ មានទាំង KBS មកថតផ្ទាល់ទៀត!

2019-06-07 04:05:49
ព័ត៌មាន

2019-06-07 04:05:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថានទូតកូរ៉េប្រចាំនៅព្រះរាជាណាចក្រកម្ពុជា នឹងធ្វើការប្រារព្ធកម្មវិធីប្រកួតK-POP World Festival វគ្គដំបូងនៅក្នុងប្រទេសកម្ពុជា(K-POP World Festival) និងកម្មវិធីមហោស្រពវប្បធម៌កូរ៉េប្រចាំឆ្នាំ២០១៩ ក្នុងបរិវេណមជ្ឍមណ្ឌលសហប្រតិបត្តិការកម្ពុជា-កូរ៉េ (CKCC) នៃសាកលវិទ្យាល័យភូមិន្ទភ្នំពេញ។

រូបភាពតំណាង

តាមសេចក្ដីប្រកាសព័ត៌មាន កម្មវិធីខាងលើនឹងមានក្រុមការងាររបស់ស្ថានីយទូរទស្សន៍ KBS(Korean Broadcast System) នឹងធ្វើការចុះមកថតផ្ដិតយកទិដ្ឋភាពនៃការប្រកួតកម្មវិធីវគ្គដំបូងនៅក្នុងប្រទេសកម្ពុជា រួចនឹងចាក់ផ្សាយទៅប្រមាណជា១២០ប្រទេសទូទាំងពិភពលោក ហើយក្រុមចម្រៀងN-tic របស់កូរ៉េ នឹងធ្វើដំណើរមកកាន់ប្រទេសកម្ពុជាដើម្បីធ្វើការសម្ដែងអបអរក្នុងកម្មវិធីទៀតផង។

តាមសេចក្ដីប្រកាសខាងលើរបស់ស្ថានទូតកូរ៉េប្រចាំនៅកម្ពុជា បានឲ្យដឹងថា កម្មវិធីខាងលើនេះ ជាកម្មវិធីសម្រាប់ប្រិយមិត្តគាំទ្រវិស័យK-POP ទូទាំងពិភពលោក ដែលត្រូវបានរៀបចំឡើងដោយស្ថានីយទូរទស្សន៍ KBS ក្រសួងការបរទេសប្រទេសកូរ៉េ និងមជ្ឈមណ្ឌលផ្សព្វផ្សាយវប្បធម៌បរទេស។ កម្មវិធីវគ្គដំបូង ត្រូវបានប្រារព្ធឡើងនៅតាមប្រទេសនីមួយៗ ដើម្បីស្វែងរកអ្នកតំណាងរបស់ប្រទេសទាំងនោះពីក្នុងចំណោមម្ចាស់ជយលាភីក្នុងវគ្គដំបូង ទៅចូលរួមក្នុងកម្មវិធីប្រកួតទូទាំងពិភពលោក ដែលនឹងប្រារព្ធឡើងនាថ្ងៃទី១១ ខែតុលា ឆ្នាំ២០១៩ នៅទីក្រុង Changwon នៃប្រទេសកូរ៉េ។

នេះជាលើកទី៤ ហើយដែល មជ្ឈមណ្ឌលសហប្រតិបត្តិការកម្ពុជា-កូរ៉េ(CKCC) បានប្រារព្ធកម្មវិធីនេះ បន្ទាប់ពីមជ្ឈមណ្ឌលនេះ ត្រូវបានសាងសង់តាមរយៈជំនួយរបស់ KOICA នៅក្នុងឆ្នាំ២០១៤ ពោលគឺ កម្មវិធីនេះប្រារព្ធធ្វើឡើងជារៀងរាល់ឆ្នាំ។

សម្រាប់កម្មវិធីនៅកម្ពុជាឆ្នាំនេះ មានប្រិយមិត្តគាំទ្រវិស័យK-POP ប្រមាណជាង ១០០នាក់ បានធ្វើការចុះឈ្មោះចូលរួមប្រកួត ហើយក្រោយឆ្លងកាត់តាមរយៈការវាយតម្លៃតាមវីដេអូ យើងបានធ្វើការជ្រើសរើសបេក្ខជន-បេក្ខនារី ចំនួន១២ក្រុម(រាំ៧ក្រុម ច្រៀង៥ក្រុម) សរុបមានចំនួន៥១នាក់។ នៅថ្ងៃសុក្រ ទី៧ ខែមិថុនានេះ បេក្ខជន បេក្ខនារី ដែលត្រូវបានជ្រើសរើស នឹងចូលរួមប្រកួតនៅក្នុងកម្មវិធីវគ្គដំបូង ដើម្បីដណ្តើមតំណែងជាអ្នកតំណាងឲ្យវិស័យ K-POP របស់ប្រទេសកម្ពុជា។

ល្ងាចនេះនឹងដឹងហើយថាតើនរណា ឬក្រុមណា នឹងក្លាយជាតំណាងរបស់កម្ពុជាទៅប្រកួតបន្តនៅទីក្រុង Changwon នៃប្រទេសកូរ៉េ។ មហោស្រពខាងទាំងមូលនឹងបើកដំណើរការចាប់ពីម៉ោង ១ រសៀលដល់ម៉ោង ៤ រសៀលជាមួយកម្មវិធី "មហោស្រពវប្បធម៌កូរ៉េ"។ កម្មវិធីបន្ទាប់គឺការប្រឡង "K-POP World Festival” នឹងបន្តចាប់ពីម៉ោង ៤រសៀលដល់ម៉ោង ៦ល្ងាច៕

ក្រុមចម្រៀងN-tic របស់កូរ៉េ និយាយពីការមកសម្ដែងនៅកម្ពុជាល្ងាចនេះ!

អត្ថបទ៖ ទារិកា