- 2019-06-27 08:26:35
- ព័ត៌មាន
យុវតីស្រស់ស្អាត ម៉ាន នីស្សា នៅតែតាំងចិត្តខ្លាំងលើវិថីឆ្ពោះទៅ K-Pop idol
- 2019-06-27 08:26:35
- ចំនួនមតិ 0 | ចំនួនចែករំលែក 0
យុវតីស្រស់ស្អាត ម៉ាន នីស្សា នៅតែតាំងចិត្តខ្លាំងលើវិថីឆ្ពោះទៅ K-Pop idol
ចន្លោះមិនឃើញ
បើទោះមិនធ្លាប់ទទួលបានលទ្ធផលល្អពីការប្រឡងប្រជែងប៉ុន្មានលើកហើយក៏ដោយ ប៉ុន្តែសម្រាប់យុវតីស្រស់ស្អាត ម៉ាន នីស្សា មកពីខេត្តបាត់ដំបង បញ្ជាក់ថា នាងមានគោលដៅច្បាស់ណាស់ក្នុងដំណើរឆ្ពោះទៅវិស័យ K-Pop កូរ៉េ។
"ទោះជាឥឡូវមិនទាន់បានលទ្ធផលល្អ ប៉ុន្តែខ្ញុំអត់ទាន់បាក់ទឹកចិត្តទេបង គឺខ្ញុំនឹងនៅតែព្យាយាម និងនៅតែមានក្ដីស្រមៃថា នឹងធ្វើឲ្យខ្លួនឯងក្លាយជា K-Pop idol អោយបាន"។ នីស្សា ថ្លែង។
ម៉ាន នីស្សា មានវ័យ ១៩ឆ្នាំមកពីខេត្តបាត់ដំបង បាន និងកំពុងសិក្សាភាសាកូរ៉េឆ្នាំទី ១ នៅវិទ្យាស្ថានភាសាបរទេស(IFL)។ ដោយសារនិស្ស័យស្រឡាញ់សិល្បៈ K-pop នាងបានហ្វឹកហាត់រាំក្នុងទម្រង់សិល្បៈ K-Pop ជាមួយគ្រូម្នាក់ឈ្មោះ កក្កដា តាំងពីខែ វិច្ឆិកា ២០១៨។ រយៈពេលត្រឹមកន្លះឆ្នាំ យុវតីរូបនេះ បានបង្ហាញឲ្យឃើញនូវការរីកចម្រើនយ៉ាងខ្លាំងសូម្បីតែគ្រូបង្វឹកនាងផ្ទាល់ក៏បានលាន់មាត់សរសើរដែរ។
កាលពីខែមុននេះ ម៉ាន នីស្សា បានលេចមុខចូលរួមប្រកួតក្នុងកម្មវិធី “K-pop World Festival” ប្រារព្ធធ្វើនៅ CKCC ក្នុងបរិវេណសាកលវិទ្យាល័យភូមិន្ទភ្នំពេញ ជាទីដែលនាងបានសាងការចាប់អារម្មណ៍យ៉ាងខ្លាំងជាមួយនឹងទេពកោសល្យរាំចង្វាក់ K-Pop យ៉ាងរស់រវើក ព្រមទាំងមានសម្ផស្សស្រស់ស្អាត។ នីស្សា គឺជាបេក្ខភាពតែមួយគាត់ដែលរាំទោលក្នុងកម្មវិធី ខណៈ ១១ក្រុមផ្សេងទៀត ភាគច្រើនជារាំជាក្រុម(សម្រាប់តែក្រុមរាំ)។
គួរឲ្យស្ដាយ យុវតី នីស្សា មិនទទួលបានលទ្ធផលល្អដោយជាប់ជយលាភីឆ្ពោះទៅការប្រកួតផ្ដាច់ព្រ័ត្រនៅទីក្រុងសូវ៉ុនប្រទេសកូរ៉េខាងត្បូងនោះទេ។ កាលនោះ ក្រោយប្រកាសលទ្ធផល មានព័ត៌មានលេចលឺថា ការប្រកួតខាងលើ ចង់បានការរាំជាក្រុមច្រើនជាង សម្រាប់យកទៅប្រកួតតំណាងកម្ពុជា ទល់នឹងក្រុមរាំមកពីប្រទេសផ្សេងៗទៀត ដែលភាគច្រើនសុទ្ធការរាំជាក្រុមដែរ។
ចំពោះបញ្ហានេះ បន្ទាប់ពីចុះពីលើឆាកមក នីស្សា ឆ្លើយក្នុងបទសម្ភាសន៍ជាមួយ Sabay ថា នាងមិនបានដឹងពីរឿងនេះទេ។ ដោយឡែកចំពោះ លទ្ធផល ក៏នាងមិនបានអាក់អន់ស្រពន់ចិត្តអ្វីដែរ ផ្ទុយទៅវិញ នាងបានលើកសរសើរក្រុម OMG ដែលឈ្នះជយលាភីលេខ១ថែមទៀត។ "អត់ទេបង ខ្ញុំដូចមិនអន់ចិត្តទេ ខ្ញុំធ្វើបានតែប៉ុណ្ណឹង ដោយឡែកពួកបង OMG ពួកគាត់ពិតជាធ្វើបានល្អពិតមែន សាកសមជាអ្នកឈ្នះជយលាភី"។ នីស្សា ថ្លែង។
បើទោះ មិនបានជាប់ជយលាភី នៅក្នុងឱកាសនោះ ភ្លាមៗក្រោយការប្រកាសលទ្ធផលបានបញ្ចប់គេបានឃើញលោក Kim Il hoon អ្នកផលិតកម្មវិធីនៃស្ថានីយទូរទស្សន៍ KBS ដ៏ល្បីរបស់កូរ៉េ និងជាអ្នកផ្ដួចផ្ដើមគំនិតបង្កើត K-POP World Festival បានឡើងទៅជួប នីស្សា ផ្ទាល់នៅលើឆាក និងបានឱនខ្សឹបដាក់ត្រចៀក នីហ្សា ដែលបន្ទាប់មក យុវតីក៏ស្រក់ទឹកភ្នែក។ នីស្សា បញ្ជាក់ថា ពេលនោះ ផលិតករកម្មវិធីជនជាតិកូរ៉េ បានសរសើរទេពកោសល្យរបស់នាង និងលើកទឹកចិត្តឲ្យបន្តខិតខំ កុំបោះបង់ក្ដីស្រមៃ។
ដូច្នេះហើយ ទើបនាងបានតាំងចិត្តមោះមុតថា មិនបោះបង់ចោលមហិច្ឆតាចង់ក្លាយជា K-Pop idol នោះទេ៕
មើលការសម្ដែងរបស់ ម៉ាន នីស្សា ក្នុងកម្មវិធី “K-pop World Festival” កាលពីខែមុន៖