- 2019-07-09 02:28:29
- ព័ត៌មាន
ចំណងដៃថ្មីបំផុតរបស់ ហ៊ុយ យ៉ាឡេង គ្រាន់តែអានសង្ខេបរឿង ក៏ស្ទើរស្រក់ទឹកភ្នែកទៅហើយ
- 2019-07-09 02:28:29
- ចំនួនមតិ 0 | ចំនួនចែករំលែក 0
ចំណងដៃថ្មីបំផុតរបស់ ហ៊ុយ យ៉ាឡេង គ្រាន់តែអានសង្ខេបរឿង ក៏ស្ទើរស្រក់ទឹកភ្នែកទៅហើយ
ចន្លោះមិនឃើញ
កាលនៅឈ្មោះចាស់ "មាតុចក្រ" លោក ហ៊ុយ យ៉ាឡេង ចាងហ្វាងផលិតកម្មបានផលិតតែរឿងកំប្លែង និងភ័យរន្ធត់ ឥឡូវនេះលោកមានចំណងដៃថ្មី រស់ជាតិប្លែកកម្សត់ស្រក់ទឹកភ្នែក ដែលសាច់រឿងនេះមានចំណងជើងថា "ដើម្បីកូន"។
នេះជាខ្សែភាពយន្តមានរសជាតិប្លែកក្នុងចំណោមខ្សែភាពយន្តទាំងឡាយរបស់លោក។ បែបនេះ យ៉ាងឡេង បញ្ជាក់ថា ក៏ព្រោះតែលោកចង់ផ្ដល់ឲ្យទស្សនិកជននូវរសជាតិប្លែក និងសម្បូរបែបក្នុងឧស្សាហកម្មភាពយន្តក្នុងស្រុក។ "ខ្ញុំធ្វើរឿងនេះ គឺចង់បំបែកទីផ្សារភាពយន្ត អោយមានច្រើនបែប អោយទស្សនិកជនបានទស្សនាភាពយន្តខ្មែរច្រើនបែបច្រើនប្រភេទ ដូចទសវត្សរ៍ទី ៥៤ ដែលមិនមែនតែរឿងខ្មោចដូចបច្ចុប្បន្ន។ មួយវិញទៀត គឺចង់បង្ហាញពិភពលោកនៅយុគសម័យកាលថ្មីនៃកុនខ្មែរដែលនឹងវិវត្តខ្លួនកាន់តែល្អ និងរីកចម្រើនច្រើនប្រភេទនៃភាពយន្តខ្មែរ"។ យ៉ាឡេង ថ្លែង។
វិលមករឿង "ដើម្បីកូន" មួយនេះដដែល គឺជាចំណងដៃថ្មីសម្រាប់ប្រិយមិត្តទូរទស្សនិកជន ក្រោយពី "មាតុចក្រ" បានសម្រេចប្ដូរឈ្មោះមកជា "កថា ជ័យភាពយន្ត" វិញ។ លោក យ៉ាឡេង បានឲ្យដឹងថា សាច់រឿង "ដើម្បីកូន" គឺបានដកស្រង់ចេញពីជីវិតពិតរបស់បុរសជាឪពុកដ៏កម្សត់មួយរូប តស៊ូធាក់ស៊ីក្លូ ព្រមទាំងរបរជាច្រើនទៀត ដើម្បីរកប្រាក់ចិញ្ចឹមកូន ២នាក់ ក្រោយម្ដាយដាច់ចិត្តទៅចោល។
តួឯករឿង "វិកលចរិត" បានបន្តសង្ខេបរឿងនេះថា លោក ឪពុក រូបនោះ ខ្លួនពិការតែចិត្តមិនបានពិការឡើយ ដូច្នេះហើយ លោកធ្វើកិច្ចការអ្វីក៏ដោយ តូចទាបយ៉ាងណា ឲ្យតែសង្គមមិនស្អប់ខ្ពើម គឺលោកធ្វើទាំងអស់ដើម្បីកូនទាំងពីរ។ ពេលព្រឹក លោកឪពុកទៅជួយដឹកជញ្ជូនឥវ៉ាន់ឲ្យគេដាក់ផ្សារចាស់ រួចហើយចេញទៅរត់ស៊ីក្លូ ជាមួយគ្នា នៅឆ្លៀតរើសអេតចាយថែមទៀត។ មិនអស់នៅឡើយ យប់ឡើងលោកនៅទៅជួយរឺយែឡានគេ ដោយស្ពាយកូនពៅជាប់ខ្លួនផង។
ពលិកម្មរបស់ឪពុកកម្សត់រូបនេះ ពិតជានៅមានច្រើនទៀតណាស់...បែបនេះទៅហើយ តើវាសនារបស់លោកឪពុក និងកូនទាំងពីរយ៉ាងណា?អ្នកនិពន្ធ និងដឹកនាំរឿងខាងលើស្នើប្រិយមិត្តរង់ចាំតាមដានទាំងអស់គ្នា។ មិនទាន់មានកាលបរិច្ឆេទជាក់លាក់នៅឡើយ ប៉ុន្តែតាមលោក ហ៊ុយ យ៉ាឡេង បង្ហើប ភាពយន្តជីវិតពិត និងឆ្លុះបញ្ចាំងពីតថភាពសង្គមមួយនេះរបស់លោក នឹងចេញបញ្ចាំងជូនប្រិយមិត្តបានទស្សនាក្នុងរយៈពេលមិនយូរខាងមុខ៕