- 2019-08-22 03:26:25
- ព័ត៌មាន
អ្នកគាំទ្ររំភើបប៉ុណ្ណា! បើប្រភពច្បាស់ការបង្ហើបថា លី ឧត្ដម គ្រោងចូលធ្វើការនៅក្រសួងការពារជាតិឆាប់ៗ!
- 2019-08-22 03:26:25
- ចំនួនមតិ 0 | ចំនួនចែករំលែក 0
អ្នកគាំទ្ររំភើបប៉ុណ្ណា! បើប្រភពច្បាស់ការបង្ហើបថា លី ឧត្ដម គ្រោងចូលធ្វើការនៅក្រសួងការពារជាតិឆាប់ៗ!
ចន្លោះមិនឃើញ
នាពេលថ្មីៗនេះ មានលេចលឺដំណឹងថា តារាសម្ដែងប្រុស លី ឧត្ដម គ្រោងនឹងចូលបម្រើការងាររដ្ឋជាលើកដំបូងក្នុងឆាកជីវិតនៅក្រសួងការពារជាតិក្នុងវេលាឆាប់ៗខាងមុខនេះ។ នេះបើតាមប្រភពច្បាស់ការ ដែលសុំមិនបញ្ចេញឈ្មោះមួយ។
នេះគឺជារឿងដ៏គួរឲ្យភ្ញាក់ផ្អើលមួយ សម្រាប់អ្នកគាំទ្រ ស្របពេលដែលគេមើលឃើញថា តារាប្រុសរូបនេះ បាន និងកំពុងមមាញឹកនឹងការងារសិល្បៈជាច្រើន។ ប្រភពបន្តថា ការងារមួយនេះ គឺជាការចាត់ចែងរបស់គ្រួសារ ដែលមានបំណងចង់គេមានការងារមួយដែលអាចផ្ដល់ឲ្យគេមានការងារមួយមាំទាំ មានក្របខណ្ឌ និងមានប្រាក់ចំណូលជាប់លាប់ មិនចង់ឲ្យពឹងតែលើការងារសិល្បៈ ដែលចំណូលមិនអាចរំពឹងទុកបាន ដូចរាល់ថ្ងៃ។
យ៉ាងណាគេមិនទាន់ដឹងនៅឡើយថា ឧត្ដម ពេញចិត្តនឹងការចាត់ចែងរបស់ក្រុមគ្រួសារដែលចង់ឲ្យលោកចូលធ្វើជាទាហាននេះ ឬយ៉ាងណាឡើយ ព្រោះថា បើមើលទៅលើភាពជាក់ស្ដែង ឧត្ដម សមជាអ្នកសិល្បៈច្រើនជាង។ "រឿងគេថា គេចង់ ឬមិនចង់ ខ្ញុំអត់ដឹងដែរ ប៉ុន្តែសំខាន់ចាស់ទុំរបស់គេ ចង់បានបែបនេះ អាហ្នឹងបើតាមខ្ញុំលឺពីសាច់ញាតិរបស់គេដែរទេ!”។ ប្រភពថ្លែង។
ជុំវិញបញ្ហានេះ លី ឧត្ដម បានទទួលស្គាល់ចំពោះការអះអាងរបស់ប្រភពកំបាំងមុខខាងលើ។ លោកថា ក្រុមគ្រួសារបាន និងកំពុងសម្រួលឲ្យលោកបានចូលបម្រើការងាររដ្ឋនៅក្រសួងការពារជាតិនោះពិតមែន។ "បាទ...បង...ចាស់ៗគាត់ចង់អីចឹងបង គឺចង់ឲ្យមានក្របខណ្ឌមួយ វារៀងធ្ងន់ខ្លួនបន្តិច...ហើយខ្ញុំក៏មិនបញ្ហាដែរ គឺវាជារឿងល្អ ខ្ញុំសប្បាយចិត្ត"។ ឧត្ដម ថ្លែង។
តារាប្រុសកាត់ឥណ្ឌា បន្តថា លោកខ្លួនឯង ក៏ចង់បានការងាររដ្ឋមួយដែរ ដូច្នេះហើយការចាត់ចែងរបស់ចាស់ទុំ ក៏ជាអ្វីដែលលោកចង់បានដូចគ្នា។ "និយាយពីថាចង់បាន គឺចង់បានណាស់ហើយបង ព្រោះជាការងារបម្រើជាតិ បានទាំងកិត្តិយស បានទាំងកេរ្តិ៍ និងសេចក្ដីថ្លៃថ្នូរទៀត អ្នកណាមិនចង់បានបង!”។ ឧត្ដម បន្ថែម។
ជុំវិញអ្នកនៅពីក្រោយដំណើរការបញ្ចូលឈ្មោះរបស់ខ្លួនទៅក្នុងជួរការងារក្របខណ្ឌរបស់រដ្ឋនេះ លី ឧត្ដម មិនបានបញ្ចេញឡើយថា ជានរណា ក្រៅពីបញ្ជាក់ថា នោះជាបំណងរបស់អ្នកមានគុណរបស់លោក។ ប៉ុន្តែតាមប្រភពខាងលើដដែល តារាប្រុសរូបនេះ មានឪពុកមាម្នាក់ គឺជាមន្ត្រីថ្នាក់ខ្ពស់មួយកំពុងបម្រើការងារនៅក្រសួងខាងលើ។ ដូច្នេះហើយ មិនជារឿងពិបាកប៉ុន្មានទេ ក្នុងការសម្រួលលើកិច្ចការនេះ។
ប្រសិនបើមិនមានអ្វីផ្លាស់ប្ដូរ ឬរាំងស្ទះទេនោះ តាមតារាប្រុសដែលពេញនិយមសម្រាប់ការថតស្ប៉តពាណិជ្ជកម្មរូបនេះបង្ហើប គឺថា អាចខ្ទង់ចុងឆ្នាំនេះប៉ុណ្ណោះ លោកនឹងអាចចូលធ្វើការបានហើយ៕