តារាកំប្លែងរូបស្រស់ នីឡា ត្រូវឪពុកបញ្ចេញវេលារៀបការបាត់ទៅហើយ

2019-08-23 03:42:10
ព័ត៌មាន

2019-08-23 03:42:10
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែងក្នុងក្រុម ពែកមី គឺកញ្ញា វ៉ាន់ នីឡា បានលេចលឺដំណឹងជិតរៀបការជាមួយគូស្នេហ៍ថ្មីតាំងពីប៉ុន្មានខែមុន ហើយឥឡូវនេះ លោក សុវណ្ណ រិទ្ធី ហៅតា វ៉ិចទ័រ ត្រូវជាឪពុក បានបញ្ចេញវេលាជាក់លាក់សម្រាប់ថ្ងៃមង្គលជ័យរបស់នាងហើយ។

តម្រុយបញ្ចេញដោយលោកឪពុកនៅពេលនេះ បន្ទាប់ពីប៉ុន្មានថ្ងៃមកនេះ វ៉ាន់ នីឡា បានបញ្ចេញរូបថត Pre-Wedding ជាបន្តបន្ទាប់នៅលើបណ្ដាញសង្គមផ្ទាល់ខ្លួនជាមួយនឹងគូស្នេហ៍ថ្មី។ លោកឪពុករបស់តារាស្រី បានបង្ហើបថា នីឡា នឹងរៀបការនៅក្នុងឆ្នាំក្រោយ ២០២០ នេះហើយ។ ដំណឹងនេះ គឺមានការផ្លាស់ប្ដូរបន្តិចបន្តួច ពីព័ត៌មានចាស់ដែលថា តារាកំប្លែងដ៏ស្រស់ស្អាត គ្រោងរៀបការនៅឆ្នាំ ២០២១។

ចំពោះការផ្លាស់ប្ដូរ នេះសាមីខ្លួន នីឡា ធ្លាប់ប្រាប់សារព័ត៌មានថា ព្រោះតែនាងចង់ឲ្យអ្វីៗដំណើរការបានឆាប់ ចៀសវាងពេលវេលាធ្វើឲ្យអ្វីៗប្រែប្រួលដូចកាលពីអតីតកាល រវាងនាង និងកូនប្រុសថៅកែវង្សល្ខោន ភី សុគន្ធី។ ដោយឡែក វេលារៀបការក៏មានការផ្លាស់ប្ដូរដែរ បើតាមលោកតា វ៉ិចទ័រ។ កាលពីប៉ុន្មានខែមុន នីឡា ធ្លាប់ប្រាប់សារព័ត៌មានថា មង្គលការរបស់នាង គ្រោងធ្វើនៅក្រោយបុណ្យចូលឆ្នាំខ្មែរប្រពៃណីជាតិរបស់យើង។

ប៉ុន្តែតាមការបញ្ជាក់របស់លោកតា វ៉ិចទ័រ នៅរសៀលម្សិលមិញវិញ លោកថា ចាស់ទុំទាំងសង្ខាងបានជួបគ្នារួចរាល់អស់ហើយ ហើយលោកគ្រោងរៀបចំឲ្យ នីឡា នៅមុនចូលបុណ្យឆ្នាំខ្មែរវិញ។ យ៉ាងលោក មិនបានបង្ហើបពីការសម្រេចចិត្តលើការបង្ខិតវេលារៀបការពីក្រោយ មកមុនបុណ្យជាតិដ៏ធំខាងលើនេះទេ។

កញ៉ា វ៉ាន់ នីឡា ធ្លាប់ភ្ជាប់ពាក្យម្ដងរួចមកហើយ ជាមួយអតីតគូដណ្ដឹងលោក ផន រង្សី ដែលជាកូនប្រុសរបស់ថៅកែវង្សល្ខោន ភី សុគន្ធី នៅខេត្តតាកែវកាលពីឆ្នាំ ២០១៦។ ការប្រកាសភ្ជាប់ពាក្យនោះ ក្រុមគ្រួសារបានព្រមព្រៀងថា ទុកពេលឲ្យកូនទាំងពីរ៣ឆ្នាំទៀត ទើបរៀបការ។ ប៉ុន្តែក្រោយមកបានប្រមាណ២ឆ្នាំប៉ុណ្ណោះ ពួកគេក៏បានបែកបាក់គ្នាវិញ ជាមួយមូលហេតុដែលថា ពួកគេមានខែថ្ងៃមិនល្អជាមួយគ្នា។

ក្រោយពីបែកគ្នា លោកសុវណ្ណ រិទ្ធី ធ្លាប់ប្រាប់សារព័ត៌មានថា ចាស់ៗនៅតែមានបំណងចងសម្ព័ន្ធធ្វើដន្លងជាមួយគ្នា។ ដូច្នេះហើយ ចាស់ៗគ្រោងនឹងធ្វើអ្វីមួយដើម្បីកែប្រែជោគវាសនារបស់កូនទាំងពីរ ឲ្យល្អវិញ មុនពេលអាចមកជួបជុំគ្នាវិញ។ ប៉ុន្តែអ្វីៗ មិនអាចត្រឡប់ក្រោយ បន្ទាប់ពីគេឃើញ អតីតគូដណ្ដឹងរបស់ នីឡា គឺលោក ផន រង្សី បានភ្ជាប់ពាក្យជាមួយអ្នកថ្មីបាត់ទៅហើយ កាលពីពាក់កណ្ដាលឆ្នាំ ២០១៨។

ដោយឡែកគូស្នេហ៍ថ្មី ដែលត្រូវជាអនាគតស្វាមីរបស់ នីឡា នាពេលនេះ ត្រូវបានគេដឹងថា ជាកូនអ្នកភ្នំពេញ និងជាកូនប្រុសរបស់មន្ត្រីធំមួយរូប។ យ៉ាងណា កូនកំលោះ មិនទាន់ត្រូវបានបញ្ចេញឈ្មោះនៅឡើយនោះទេ។ ប៉ុន្តែលោក វ៉ិចទ័រ ប្រាប់ថា អនាគតកូនប្រសាលោកមានអាយុ ២៣ឆ្នាំ គឺបងកូនស្រីលោក៤ឆ្នាំ ស្របពេលដែលឆ្នាំនេះ នីឡា ទើបមានអាយុ ១៩ឆ្នាំប៉ុណ្ណោះ។

រូបភាព៖ IG នីឡា

អ្នកដឹកនាំកម្មវិធីកម្សាន្តរបស់ CTN រូបនេះ ប្រាប់ទៀតថា អនាគតកូនប្រសារបស់លោក បច្ចុប្បន្ន គឺនៅសិក្សានៅឡើយ ហើយលោកមិនច្បាស់ថា រូបគេធ្វើកិច្ចការងារអ្វីខ្លះនោះទេគិតត្រឹមពេលនេះ៕

អត្ថបទ៖ ទារិកា