- 2019-10-02 03:19:05
- ព័ត៌មាន
កំពុងឡើងជើង ឥឡូវមានដំណឹងថា ស្រីស្អាត ជា ស្រីរ័ត្ន មានចំហាយស្នេហ៍ជាមួយតារាប្រុសម្នាក់?
- 2019-10-02 03:19:05
- ចំនួនមតិ 0 | ចំនួនចែករំលែក 0
កំពុងឡើងជើង ឥឡូវមានដំណឹងថា ស្រីស្អាត ជា ស្រីរ័ត្ន មានចំហាយស្នេហ៍ជាមួយតារាប្រុសម្នាក់?
ចន្លោះមិនឃើញ
តារាស្រីកំពុងឡើងជើង ជា ស្រីរ័ត្ន ដែលបាន និងកំពុងធ្វើឲ្យមានការចាប់អារម្មណ៍ពីប្រិយមិត្តអ្នកគាំទ្រ តាមរយៈរូបសម្ផស្ស ទេពកោសល្យ និងលទ្ធផលការងាររបស់នាងនោះ ឥឡូវនេះ ស្រាប់តែមានចំហាយមិនស្រួលជាមួយតារាប្រុសម្នាក់ ដែលគេសង្ស័យថា ពួកគេអាចកំពុងសាកទំនាក់ទំនងបេះដូងនឹងគ្នា។
តារាប្រុស ដែលត្រូវបានលើកជាកម្មវត្ថុស្នេហ៍ជាមួយ ជា ស្រីរ័ត្ន នៅពេលនេះ គឺតារាសម្ដែង ស្រ៊ែន វុត្ថា។ ប្រុសសង្ហារ រូបនេះ ជារឿយៗគេឃើញលោកកៀកកើយជាមួយស្រីស្អាតមិនស្វាង ក្នុងនោះមិនថាតែក្នុងការងារសិល្បៈ ប៉ុន្តែសូម្បីតែសកម្មភាពឯកជនខាងក្រៅនានា ពោលគឺសកម្មភាពដើរកម្សាន្តទៅទីកន្លែងផ្សេង ក៏ពួកគេទាំងពីររមែងបង្ហាញវត្តមានទាំងគូត្រសងដែរ។
សកម្មភាពជិតស្និទ្ធនេះ គឺខុសដាច់ស្រឡះពីទំនាក់ទំនងរបស់តារាស្រីជាមួយនឹងមិត្តភ័ក្ដិបុរសផ្សេងទៀត។ ចំណុចនេះបានធ្វើឲ្យមានមន្ទិល ក្រោយពី ស្រីរ័ត្ន ឆក់បានតំណែងសំខាន់ៗក្នុងការងារសិល្បៈរបស់នាងបន្តបន្ទាប់ ព្រមទាំងបាន និងកំពុងមានការចាប់អារម្មណ៍ខ្លាំង ក្នុងនោះសូម្បីតែរឿងរ៉ាវបេះដូង ក៏នាងទំនងមិនទំនេរដែរ។
ជាក់ស្ដែង ថ្មីៗនេះ គេបានឃើញប្រុសស្អាត វុត្ថា ទើបនឹងធ្វើកម្មវិធីខួបកំណើតដល់ ស្រីរ័ត្ន ក្នុងលក្ខខណ្ឌឯកជនទៀតផង។ មិនទាន់អស់នៅឡើយ តារាប្រុសស្រីមួយគូនេះ ក៏ទើបនឹងឡើងកម្មវិធី "Lovely Night” របស់ទូរទស្សន៍ថោន ដែលជាវេទិកាសម្រាប់គូស្វាមី ភរិយា និងគូសង្សារក្នុងសិល្បៈឡើងសម្ដែងអារម្មណ៍ចំពោះគ្នាទៅវិញទៅមកផងដែរ។
ដូច្នេះហើយ មានភាគរយកាន់តែច្រើនដែលថា ជា ស្រីរ័ត្ន ទំនងមិនទុកបេះដូងឲ្យទំនេរនោះទេ ប៉ុន្តែបានផ្ញើទុកនៅកំលោះសង្ហាបាត់ទៅហើយ ព្រោះថា គិតមកដល់ពេលនេះ ស្រីរ័ត្ន ក៏មានវ័យសមល្មម(២៦ឆ្នាំ) សម្រាប់ការមានគូគាប់ទ្រនាប់ចិត្ត។ ជុំវិញបញ្ហាទំនាក់ទំនងស្អិតល្មួតជាមួយ ស្រ៊ែន វុត្ថា នេះ ជា ស្រីរ័ត្ន នៅមិនទាន់ផ្ដល់ចម្លើយដាច់ស្រឡះអំពីទំនាក់ទំនងនាង និងវុត្ថា នៅឡើយ។
“ហេសហេ ជាមួយអ្នកផ្សេងអត់សួរសោះបង ម៉េចបានសួរតែជាមួយម្នាក់ហ្នឹង អ្នកស្គាល់ម៉ាគំនរ(សើច)!”។ ស្រីរ័ត្ន ឆ្លើយតបចំពោះការចោទសួរ។
ជា ស្រីរ័ត្ន និង ស្រ៊ែន វុត្ថា បានស្គាល់គ្នាដំបូងតាមការប្រឡង Freshie កាលពីឆ្នាំ ២០១២។ តាំងពីនោះមក ពួកគេក៏បន្តសេពគប់គ្នារហូតមក និងកាន់តែមានទំនាក់ទំនងជិតស្និទ្ធឡើងទាំងក្នុង និងក្រៅសិល្បៈៗ។ ក្នុងរយៈពេលនេះ ស្រីរ័ត្ន បានបង្ហើបថា ប្រុសសង្ហារូបនេះ គឺជាបុរសល្អម្នាក់។ ប៉ុន្តែយ៉ាងណា តួឯកស្រីរឿង "បុប្ផាស្រុកស្រែ" បញ្ជាក់ថា នៅពេលនេះ នាង សុំឆ្លើយថា ជាមួយ វុត្ថា គឺត្រឹមតែជាការរាប់អាន ប៉ុន្តែរឿងអ្វីផ្សេងទៀត សុំមិនទាន់ឆ្លើយ។ "រាប់អានគ្នាទេបង រឿងផ្សេងសុំលាក់សិន”។
ជា ស្រីរ័ត្ន គឺជាតារាស្រី បាន និងកំពុងពេញនិយម ក្នុងនោះនាងទើបនឹងចាប់បានតំណែងតួឯកក្នុងរឿងបន្តបន្ទាប់។ កាលពីខែឧសភា នាងបានគ្រងតំណែងតួឯកក្នុងរឿង "បុប្ផាស្រុកស្រែ" របស់ទូរទស្សន៍ប៉ុស្ដិ៍លេខ ៥ បន្តមកទៀត គ្រងតួឯកដដែលក្នុងរឿងបុរាណមួយរបស់ស៊ីធីអិន។ ថ្មីនេះ នាងក៏ត្រូវជ្រើសរើសជាតួឯកស្រីក្នុងបទចម្រៀងមួយបទរបស់ព្រាប សុវត្ថិ ផង។ ដោយឡែកការងារសិល្បៈផ្សេងទៀត ស្រីរ័ត្ន បង្ហើបថា ស្ប៉តពាណិជ្ជកម្មមួយចំនួន បាន និងកំពុងចរចាគ្នា។ ក្រៅពីសម្ដែង ស្រីរ័ត្ន នៅអាចដឹកនាំ និងនិពន្ធរឿងថែមទៀត៕