- 2019-10-16 09:29:22
- ព័ត៌មាន
តារាកូរ៉េជាច្រើនផ្អាក និងលុបចោលគម្រោងសម្ដែងទាំងអស់ ក្រោយមរណភាពរបស់ Sulli
- 2019-10-16 09:29:22
- ចំនួនមតិ 0 | ចំនួនចែករំលែក 0
តារាកូរ៉េជាច្រើនផ្អាក និងលុបចោលគម្រោងសម្ដែងទាំងអស់ ក្រោយមរណភាពរបស់ Sulli
ចន្លោះមិនឃើញ
ដោយសារព័ត៌មានមរណភាពរបស់ Sulli ផ្ទុះឡើងភ្លាមៗ ហេតុនេះពិតជាធ្វើឲ្យមជ្ឈដ្ឋានជាទូទៅភ្ញាក់ផ្អើលជាទីបំផុត។ មិនត្រឹមតែតារាៗដែលត្រូវជាមិត្តជិតស្និទ្ធរបស់ Sulli ទេ សូម្បីតារាផ្សេងទៀតក៏សុខចិត្តផ្អាកការចេញសម្ដែង និងចេញអាល់ប៊ុមថ្មីសិនដែរ ក្នុងបំណងចូលរួមរំលែកទុក្ខ និងសោកស្ដាយចំពោះការបាត់បង់នេះ។
តារាល្បីៗជាច្រើននាក់ប្រចាំពិភពសិល្បៈកូរ៉េ បានប្រកាសលើកថ្ងៃចេញផ្សាយស្នាដៃថ្មី ហើយខ្លះទៀតថែមទាំងលុបចោលការទៅចូលរួមកម្មវិធីផ្សេងៗ និងសម្ដែងទៀតផង។
Seulgi (ក្រុម Red Velvet) និង Kim Yoo Jung បានលុបចោលកាលវិភាគចូលរួមកម្មវិធីមួយនៅថ្ងៃទី១៥ ខែតុលា។ រីឯ Aron និង Baekho (ក្រុម NU'EST) ពន្យារពេលក្នុងការទៅចូលរួមកម្មវិធី "Jam Live” រហូតដល់ថ្ងៃទី ១៨ ខែតុលា។ ស្របពេលជាមួយគ្នានេះ Youngbin (ក្រុម SF9) និង Hyunsik (ក្រុម BTOB) បានលុបចោលថ្ងៃត្រូវ Livestream ហើយ MONSTA X ឯណេះវិញត្រូវផ្អាកចេញរូបថត Teaser របស់អាល់ប៊ុមថ្មី។
ក្រៅពីនេះក៏នៅមានក្រុម K-Pop ជាច្រើនទៀតបានសុំផ្អាកការផ្សាយវីដេអូជាស៊េរីសិនដូចជា៖ SEVENTEEN, IZ * ONE, WJSN, AB6IX ជាដើម។
ដោយឡែក ងាកមក Taeyeon វិញក៏ជាតារា SM ដែលនឹងត្រូវបង្ហាញអាល់ប៊ុមថ្មីដែរ ប៉ុន្តែគ្រប់យ៉ាងត្រូវផ្អាកដំណើរការមួយរយៈសិន។ ចំណែកមនុស្សដំបូងដែលប្រកាសលុបចោលគម្រោងចេញស្នាដៃថ្មីនោះគឺ Amber។ តាមព័ត៌មាន វាគឺជាការត្រឡប់មកជួបអ្នកគាំទ្រជាថ្មី និងដំបូងបង្អស់របស់នាងក្នុងនាមជាតារាទោល ក្រោយចាកចេញពីផលិតកម្ម SM។
ចំណែក Victoria ដែលកំពុងមមាញឹកថតរឿងនៅប្រទេសចិន ក៏ត្រូវផ្អាកការងារសិន និងធ្វើដំណើរជាបន្ទាន់ ដើម្បីមកចូលរួមបុណ្យសព Sulli។ Luna វិញបានសុំដកខ្លួនមួយរយៈ ពីការសម្ដែង Musical "Mamma Mia!” ក៏ព្រោះតែនាងរន្ធត់ចិត្តខ្លាំងពេក ចំពោះការបាត់បង់នេះ។
ជាមួយគ្នានេះ IU ដែលត្រូវបានគេដឹងថា ក៏ជាមិត្តល្អរបស់ Sulli ក៏ត្រូវផ្អាកការចេញអាល់ប៊ុមថ្មីដែរ។ នេះបើតាមអ្វីដែលផលិតកម្មរបស់នាងគឺ Kakao M បានប្រកាសលើ Twitter។
ចូលដល់ Super Junior ក៏ជាក្រុមដែលត្រៀមបង្ហាញអាល់ប៊ុមថ្មីទី ៩ដែរ ប៉ុន្តែគ្រប់យ៉ាងត្រូវផ្អាកទាំងអស់ ស្របពេល SuperM ដែលកំពុងជោគជ័យខ្លាំងនៅអាមេរិកឯណោះក៏រំសាយគម្រោងថតកម្មវិធី "SuperM: The Beginning” ឲ្យទូរទស្សន៍ SBS ដែរ។ សូម្បី Donghae ក៏មិនបានទៅចូលរួមក្នុងកម្មវិធីរៀបចំដោយអ្នកគាំទ្រ ដើម្បីអបអរថ្ងៃកំណើតលោកដែរ។
កម្មវិធីនៅថ្ងៃទី ១៦ ខែតុលា នៅទីក្រុងកូឡាឡាំពួរ ប្រទេសម៉ាឡេស៊ីដែលត្រូវមានការចូលរួមរបស់ Kang Daniel ត្រូវពន្យារពេល រៀបចំជាថ្មីនៅថ្ងៃទី២៣ ខែតុលាវិញ។
មិនទាន់អស់ទេ សម្រាប់ក្រុម N.Flying ដែលនឹងត្រូវវិលមកជួបអ្នកគាំទ្រជាមួយស្នាដៃថ្មីរបស់ខ្លួន ក៏ត្រូវនៅស្ងៀមសិន ដើម្បីគោរពដល់វិញ្ញាណក្ខន្ធ Sulli៕
