យោងតាមហេតុផលនេះ ជនជាតិកូរ៉េប្រឆាំងនឹងកម្មវិធី MAMA ដែលធ្វើនៅប្រទេសជប៉ុន

2019-11-07 02:54:10
ព័ត៌មាន

2019-11-07 02:54:10
ចំនួនមតិ 0 | ចំនួនចែករំលែក 0

ចន្លោះមិនឃើញ

ថ្មីៗ Mnet ទើបតែប្រកាសថា កម្មវិធីប្រគល់ពានរង្វាន់ដ៏ធំប្រចាំឆ្នាំ MAMA 2019 នឹងធ្វើឡើងនៅប្រទេសជប៉ុន។ ប៉ុន្តែពេលនេះស្រាប់តែមានបញ្ហាធំកើតឡើង ទាក់ទងនឹងការមិនពេញចិត្ត នឹងការដែលកម្មវិធីត្រូវធ្វើនៅប្រទេសនេះ។

ដូចសព្វដង MAMA ឆ្នាំ ២០១៩ បានជ្រើសយកថ្ងៃណាមួយក្នុងចំណោម ៣ថ្ងៃ ដើម្បីប្រារព្ធកម្មវិធីប្រគល់ពាន នៅប្រទេសជប៉ុន ប៉ុន្តែកម្មវិធីក៏ត្រូវប្រឈមនឹងពាក្យរិះគន់ជាច្រើនរបស់ជនជាតិកូរ៉េ ដែលមិនពេញចិត្តចំពោះការរៀបចំនៅប្រទេសនេះ។

មហាជនមួយចំនួន ពិតជាមិនចង់ឲ្យ Mnet ធ្វើកម្មវិធីធំនេះនៅជប៉ុនឡើយ ដោយសារបណ្ដាលមកពីបញ្ហាទាក់ទងនឹងរឿងនយោបាយរវាងកូរ៉េ និងជប៉ុនដែលកើតឡើងកាលពីពេលថ្មីៗនេះ។ ជាក់ស្ដែងប្រទេស ២នេះ មានទំនាក់ទំនងជាមួយគ្នាយូរលង់ណាស់មកហើយ ប៉ុន្តែស្រាប់តែមានបញ្ហាប៉ះទង្គិចនឹងគ្នា ផ្អែកតាមកត្តាសេដ្ឋកិច្ច និងបញ្ហានយោបាយ។ ដោយសារតែរឿងនេះ ទើបជនជាតិកូរ៉េមួយចំនួន បានងើបឈរតវ៉ាយ៉ាងសកម្ម ដោយធ្វើពហិការ លើទំនិញរបស់ជប៉ុន និងលុបចោលការធ្វើដំណើរទៅកាន់ប្រទេសនេះថែមទៀតផង។ មិនត្រឹមតែប៉ុណ្ណោះ សូម្បីតារាៗខ្លះ ក៏បានកាត់ផ្ដាច់ចំណងការងារជាមួយក្រុមហ៊ុនផលិតផលរបស់ជប៉ុនដែរ។

មូលហេតុទាំងនេះហើយ ដែលជាហេតុសាយភាយមកដល់កម្មវិធី MAMA ប៉ុន្តែទោះជាយ៉ាងណា Mnet បានប្រកាសហើយថា បន្ទាប់ពីមានការសម្រេចចិត្តច្បាស់លាស់ហើយ កម្មវិធីសម្រេចធ្វើនៅជប៉ុនដដែល ប៉ុន្តែនៅទីក្រុង Nagoya ហើយធានាមិនប៉ះពាល់ ឬទាក់ទងនឹងបញ្ហានយោបាយឡើយ។

បន្ថែមពីលើនោះ Mnet ក៏បានប្រកាសដែរថា តារាដែលនឹងមានមុខក្នុងកម្មវិធីនៅជប៉ុនមាន BTS, TWICE, GOT7, SEVENTEEN, MONSTA X ជាដើម៕