- 2019-11-20 00:45:00
- ភាពយន្ត
ដល់កតារាល្បីៗច្រើនណាស់ ប្រុសក៏សង្ហា ស្រីក៏ស្អាត ជុំគ្នាសម្ពោធរឿងខ្នាតធំយប់មិញ
- 2019-11-20 00:45:00
- ចំនួនមតិ 0 | ចំនួនចែករំលែក 0
ដល់កតារាល្បីៗច្រើនណាស់ ប្រុសក៏សង្ហា ស្រីក៏ស្អាត ជុំគ្នាសម្ពោធរឿងខ្នាតធំយប់មិញ
ចន្លោះមិនឃើញ
សិល្បករខ្មែរល្បីៗ សុទ្ធតែប្រុសសង្ហា និងស្រីស្អាត បានមកជួបជុំគ្នាសម្ពោធភាពយន្តខ្នាតធំ "នាឡិកាដាស់វិញ្ញាណ" របស់ LD យប់មិញ កម្រនឹងប្រទះ។
មានការលើកឡើងថា ចំនួនភ្ញៀវកិត្តិយសមកចូលរួមច្រើនបែបនេះ គឺក្រោយពីរឿងនេះទទួលបានការលើកសរសើររបស់ផលិតករក្នុងស្រុកនានា បន្ទាប់ពីបានចាក់បញ្ចាំងលើកដំបូងជូនផលិតករ និងអ្នកដឹកនាំរឿងក្នុងស្រុកទស្សនាកាលពីចុងសប្ដាហ៍មុន។ ម្យ៉ាងក៏ផ្សំនឹងរឿងនេះ ទទួលបានភ្លើងខៀវទៅដាក់បញ្ចំាងនៅទីផ្សារអន្តរជាតិចំនួន ៦ប្រទេសផង។
លោក លៀក លីដា ផលិតករនៃខ្សែភាពយន្តខ្នាតធំខាងលើ បានឲ្យដឹងថា លោកមានមោទកភាពនឹងខ្សែរឿងដែលលោកផលិតបាន ព្រោះថា នេះភាពយន្តដំបូងរបស់លោកដែលទីផ្សារអន្តរជាតិព្រមបើកផ្លូវឲ្យទៅដាក់បញ្ចាំងនៅលើទីផ្សាររបស់គេ។ ទាំងនេះ វាសាកសមនឹងដែលលោកបានដាក់ទុនវិនិយោគយ៉ាងសម្បើមដល់ទៅ ជាង ៤០ម៉ឺនដុល្លារអាមេរិក។
“ដាក់បញ្ចាំងរឿង បាននាំឲ្យខ្ញុំនឹកឃើញកាលពីឆ្នាំ ២០១២ ជាពេលដែលខ្ញុំផលិតកុនដំបូង រឿង "អាបពាក់មួកសុវត្ថិភាព" ពេលនោះ មិត្តភ័ក្ដិខ្ញុំច្រើនបានសើចចំអកខ្ញុំ លក់ឡានយកលុយមកផលិតកុនទាំងដែលពេលនោះ កុនក្នុងស្រុកគេសឹងឈប់មើលទៅហើយ។ វិលមករឿង នាឡិកា ដាស់វិញ្ញាណក៏ដូចគ្នា ខ្ញុំដាក់ទុនច្រើនណាស់ ហើយគេសើចចំអកទៀតថា ដាក់ប៉ុណ្ណឹងសង្ឃឹមអីនឹងបានមកវិញ ប៉ុន្តែសម្រាប់ខ្ញុំ ខ្ញុំធ្វើមិនមែនគិតតែលុយមួយមុខនោះទេ!”។
លោក លីដា បន្តថា លោកចង់បើកទំព័រថ្មីសម្រាប់ខ្លួនឯង និងសម្រាប់ឧស្សាហកម្មភាពយន្តក្នុងស្រុកផង ទើបដាក់ទុនវិនិយោគច្រើនយ៉ាងនេះ ដោយក្នុងនោះថែមទាំងបាននាំយកតួអង្គប្រុសស្រី ជនជាតិបារាំងមួយចំនួនមកចូលរួមសម្ដែងជាសិល្បករខ្មែរថែមទៀត។ ដោយឡែកបច្ចេកទេសផ្សេងៗ ក៏បានសហការជាមួយអ្នកជំនាញបរទេសទៀតផង ទើបធ្វើឲ្យការចំណាយខ្ពស់ខ្លាំងតែម្ដង។
លោក ប៉ុក បូរក្ស ប្រធាននាយកដ្ឋានភាពយន្ត និងផ្សព្វផ្សាយវប្បធម៌ ដែលចូលរួមជាអធិបតីក្នុងកម្មវិធីសម្ពោធនេះ ក៏បានកោតសរសើរចំពោះ "នាឡិកាដាស់វិញ្ញាណ" ដូចគ្នា និងថានេះសញ្ញាណល្អនៃវិស័យសិល្បៈភាពយន្តក្នុងស្រុក។ លោកលើកឡើងថា ការទទួលបានសិទ្ធិយកទៅដាក់បញ្ចាំងនៅទីផ្សារអន្តរជាតិដល់ទៅ ៦ប្រទេស នឹងអាចផ្លាស់ប្ដូរការគិតរបស់បុគ្គលមួយចំនួនដែលថា ភាពយន្តខ្មែរមិនទៅមុខ ឬក៏ដើរថយក្រោយ។
“នាឡិកាដាស់វិញ្ញាណ" ចូលរួមសម្ដែងដោយតារាល្បីៗជាច្រើនដូចជាលោក សន ពិសិដ្ឋ នៅ ដាណា យ៉ែម ស្រីពេជ្រ វ៉ាន់ឌី ពិសិដ្ឋ នូ ឧសា កុមារី សរពេជ្ញ ម៉ានីកា ឃុន សាមេនតា និងសិល្បករក្នុង និងក្រៅស្រុកមួយចំនួនទៀត។ ក្រោយពីបើកសម្ពោធយប់មិញនេះ រឿង "នាឡិកាដាស់វិញ្ញាណ" នឹងដាក់បញ្ចាំងផ្លូវការចាប់ពីថ្ងៃទី ២១ វិច្ឆិកា តទៅនៅគ្រប់រោងភាពយន្តធំៗក្នុងរាជធានី៕