- 2019-12-03 09:34:03
- ព័ត៌មាន
នេះគឺពានទាំងអស់ ដែលមហោស្រពភាពយន្តជាតិលើកទី៦ បានផ្ដល់សម្រាប់វិស័យភាពយន្តខ្មែរឆ្នាំនេះ
- 2019-12-03 09:34:03
- ចំនួនមតិ 0 | ចំនួនចែករំលែក 0
នេះគឺពានទាំងអស់ ដែលមហោស្រពភាពយន្តជាតិលើកទី៦ បានផ្ដល់សម្រាប់វិស័យភាពយន្តខ្មែរឆ្នាំនេះ
ចន្លោះមិនឃើញ
មហោស្រពភាពយន្តជាតិលើកទី៦ ដែលមានការសាទរពីអ្នកជំនាញជាច្រើននោះ បានបញ្ចប់ដោយរលូនដោយអាចរកឃើញអ្នកឈ្នះតាមគុណសម្បត្តិរៀងៗខ្លួនក្នុងចំនួនជាច្រើនពាន។
នៅឆ្នាំនេះ មហោស្រពបានបន្ថែមពានផ្នែកបច្ចេកទេសថែមទៀត ព្រោះថា ក្រុមអ្នកបច្ចេកទេស ក៏ជាកោសិកាដ៏សំខាន់និងមិនអាចខ្វះបានដូចគ្នា នៅក្នុងដំណើរផលិតភាពយន្តទាំងអស់។ សរុបអ្នកឈ្នះពានទាំងអស់ក្នុងមហោស្រពភាពយន្តជាតិលើកទី៦នេះ គឺមានចំនួន ១២ ពាន ហើយមានអ្នកឈ្នះចំនួន ១៤នាក់។ ពានទាំងនោះមាន៖
១.ពានអ្នករៀបចំឆាកឆ្នើម៖ បានទៅលើឈ្មោះ សំណាង ប៉ាក អ្នករៀបឆាកក្នុងរឿង "វាលប្រមាញ់" ២.ពានអ្នកកាត់ត និងដំឡើងរូបភាពឆ្នើម៖ បានទៅលើឈ្មោះ នី វ៉ាន់ថា អ្នកបច្ចេកទេសនៃរឿង "នាឡិកាដាស់វិញ្ញាណ"។ ៣.ពានអ្នកផ្គុំសំឡេងឆ្នើម៖ បានទៅលើឈ្មោះ ហេក សុផានិត អ្នកបច្ចេកទេសនៃរឿង "នាឡិកាដាស់វិញ្ញាណ"។ ៤.ពានតួសម្ដែងបុរស ឆ្នើមប្រចាំឆ្នាំ៖ បានទៅលើលោក រ៉ុង សុភីដេវីដ តួសម្ដែងក្នុងរឿង "ស្នេហាក្មេងៗ"។ ៥.ពានតួសម្ដែងនារី ឆ្នើមប្រចាំឆ្នាំ៖ បានទៅលើកញ្ញា វីនិច្ច វិរៈ តួឯកស្រីក្នុងរឿង "វិបល្លាស" ៦.ពានកិត្តិយស បុរស និងនារី៖ បានទៅលើលោក សន ពិសិដ្ឋ និងប្អូនស្រី ឃុល សាមេនតា តួសម្ដែងឪពុក និងកូនក្នុងរឿង "នាឡិកាដាសវិញ្ញាណ"។
ពាននេះដដែល បានទៅលើលោក ជី រតនា តួឯកប្រុសក្នុងរឿង "វិបល្លាស" និងអ្នកឈ្នះចុងក្រោយសម្រាប់ពាននេះដែរ គឺបានទៅលើកញ្ញា វណ្ណៈ បរមី តួឯកស្រីក្នុងរឿង "ព្រឺ"។ ៧.ពានអ្នកដឹកនាំរឿងដំបូង៖ បានទៅលើកញ្ញា រិទ្ធិ លម្អរពេជ្រ អ្នកដឹកនាំរឿង "ស្នេហាក្មេងៗ"។ ៨.ពានអ្នកនិពន្ធឆ្នើម៖ បានទៅលើ កញ្ញា រិទ្ធិ លម្អរពេជ្រ និងលោក ម៉ុង ម៉ានិត(សហដឹកនាំ) នៃរឿង "ស្នេហាក្មេងៗ"។ ៩.ភាពយន្តទទួលបានការគាំទ្រច្រើនបំផុតពីមហាជន៖ បានទៅលើរឿង "ធ្មប់" របស់លោក ហ៊ុយ យ៉ាឡេង។ ១០.អ្នកថតភាពយន្តឆ្នើម៖ បានទៅលើអ្នកថតនៃរឿង "វិបល្លាស" លោក គីមអាន សុផាស័ក្ត ១១.អ្នកដឹកនាំរឿងឆ្នើម៖ បានទៅលើលោក លៀក លីដា នៃរឿង "នាឡិកាដាស់វិញ្ញាណ" ១២.ពានភាពយន្តឆ្នើមប្រចាំឆ្នាំ៖ បានទៅលើរឿង "នាឡិកាដាស់វិញ្ញាណ" របស់ផលិតកម្ម LD Picture។
លទ្ធផលទាំងនេះ បាននាំឲ្យមានសុទិដ្ឋិនិយម និងការរំពឹងខ្ពស់សម្រាប់មហោស្រពនៅឆ្នាំបន្ទាប់ៗទៀត ក៏ដូចជាភាពរីកចម្រើនវិស័យភាពយន្តខ្មែរ។ ឯកឧត្ដម ម៉ៅ អាយុទ្ធ ប្រធានគណៈកម្មការវាយតម្លៃរបស់មហោស្រព បានឲ្យដឹងថា ឯកឧត្ដមបានរកឃើញចំណុចវិជ្ជមានច្រើនក្នុងចំណោមភាពយន្តទាំង ១៨ជើង ដែលត្រូវបានដាក់បញ្ចូលក្នុងមហោស្រព ក្នុងនោះសំដៅលើគុណភាព។
ជាមួយគ្នា ឯកឧត្ដម ក៏បានលើកសរសើរពីសមត្ថភាពរបស់អ្នកដឹកនាំភាពយន្តខ្មែរ ដែលក្នុងនោះមានរឿងខ្លះ ថែមទាំងបាននាំយកសិល្បករបរទេសមកសម្ដែងជាមួយសិល្បករក្នុងស្រុកផង ដែលនេះ ឯកឧត្ដម អះអាងថា ជាជំហានដ៏ល្អថ្មីទៀតនៃសិល្បៈភាពយន្តក្នុងស្រុក។
ដោយឡែកលោក ប៉ុក បូរក្ស ប្រធាននាយកដ្ឋានភាពយន្ត និងផ្សព្វផ្សាយវប្បធម៌ បានបង្ហាញសុទិដ្ឋិនិយមដូចគ្នាចំពោះបេក្ខភាពភាពយន្តក្នុងមហោស្រពលើកទី៦នេះ។ លោកថា ភាពយន្តក្នុងស្រុក គិតទាំងបរិមាណ និងគុណភាព គឺមានការកើនឡើងគួរឲ្យកត់សម្គាល់នៅមហោស្រពលើកនេះ ដែលបង្ហាញពីស្ថិរភាពនៃវិស័យភាពយន្តរបស់ខ្មែរ។ យ៉ាងណាក៏ដោយ ដើម្បីឲ្យរក្សាស្ថិរភាពនៃការផលិត លោកជំរុញដល់ផលិតករផលិតភាពយន្តមានគុណភាពដែលអាចចេញទៅទីផ្សារបរទេសបាន ដើម្បីបង្កើនលទ្ធភាពប្រមូលទុនត្រឡប់មកវិញ។
លោកថា រឿងដែលមានគុណភាពស្តង់ដារមួយ ត្រូវការទំហំវិនិយោគច្រើន ដែលជាឧបសគ្គធំមួយសម្រាប់ផលិតករក្នុងស្រុក។ ដូច្នេះជាដំណោះស្រាយ លោកលើកទឹកចិត្តផលិតករត្រូវចេះរកដៃគូវិនិយោគជាមួយបរទេស ដើម្បីប្រមូលទុនបង្គ្រប់ និងបើកឱកាសទីផ្សារភាពយន្តនៅក្រុងស្រុកផង។ ធ្វើបែបនេះបាន លោកថា ឧស្សាហកម្មភាពយន្តខ្មែរនឹងមានស្ថិរភាព។
ងាកមកឯកឧត្ដម សោម សុគន្ធ រដ្ឋលេខាធិការក្រសួងវប្បធម៌ គូសបញ្ជាក់ថា មហោស្រពភាពយន្តជាតិ គឺព្រឹត្តិការណ៍វប្បធម៌ដ៏ធំប្រចាំឆ្នាំ និងជាចំណុចវាស់វែងដ៏សំខាន់នូវគុណភាពរបស់ផលិតផលភាពយន្តក្នុងស្រុក។ វេទិកានេះ មិនត្រឹមជាកន្លែងប្រកួតប្រជែងស្នាដៃ ប៉ុន្តែក៏ជាកន្លែងសិក្សារៀនសូត្រពីគ្នាទៅវិញទៅមកពីភាពយន្តដែរ។
ដូច្នេះហើយ ឆ្លងតាមកំណើនទាំងបរិមាណ និងគុណភាពក្នុងមហោស្រពលើកទី៦នេះ ឯកឧត្ដម ពិតជាមោទកភាពណាស់ និងមានជំនឿថា ភាពយន្តខ្មែរបាន និងកំពុងដើរលើផ្លូវត្រូវមួយ ក្នុងទិសដៅដែលអាចឈានទៅប្រកួតប្រជែងជាមួយភាពយន្តបរទេសនៅលើវេទិកាអន្តរជាតិបាននាពេលមិនយូរខាងមុខ ជាក់ជាមិនខាន៕
