គ្រាន់តែ Pre-Wedding ដល់ទៅ៤ប្រទេស ឥឡូវមង្គលការ ណាត បូរី ល្បីថា នឹងកក្រើកក្រុងបាវិតហើយ!

2019-12-18 02:42:13
ព័ត៌មាន

2019-12-18 02:42:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយពីបានបង្ហាញមុខមាត់អនាគតភរិយាដែលមានសម្រស់ស្រស់ស្អាតមួយរូបនៅក្រុងបាវិត តារាសម្ដែងលោក ណាត បូរី នាំគូស្នេហ៍ដណ្ដឹងដើរថត Pre-Wedding ដល់ទៅ៤ប្រទេស មុនពេលលេចដំណឹងមង្គលការដ៏ធំនៅក្រុងបាវិតនាចុងសប្ដាហ៍នេះ។

តាមព័ត៌មានដែលទទួលបានពីក្រុមសិល្បករដែលជាមិត្តជិតស្និទ្ធរបស់លោក ណាត់ បូរី បានឲ្យដឹងថា តារាប្រុសរូបនេះ គ្រោងត្រៀមតុដល់ទៅ ១៤០តុឯណោះ សម្រាប់ទទួលភ្ញៀវកិត្តិយសពិសាភោជនីយអាហារក្នុងថ្ងៃមង្គលរបស់លោក។ នេះគឺជាតួលេខខ្ពស់មិនធម្មតាមួយ សម្រាប់មង្គលការដែលប្រព្រឹត្តទៅនៅក្រៅក្រុង និងនៅជាយដែនប្រទេស និងត្រូវគេប៉ាន់ប្រមាណណា នឹងចំណាយដល់ទៅរាប់សិបម៉ឺនដុល្លារអាមេរិកឯណោះ។

ការដែលប្រារព្ធពិធីទទួលភ្ញៀវដ៏ធំនេះ ត្រូវបានគេដឹងថា ភរិយារបស់លោក ណាត បូរី គឺជាកូនក្រមុំរបស់គ្រួសារដ៏មានមុខមាត់ម្នាក់នៅក្រុងបាវិតនោះ។ ដូច្នេះហើយ ពិធីត្រូវធ្វើទៅតាមធនធាន មុខមាត់ និងកិត្តិយសរបស់ម្ចាស់សាមីកម្មវិធី។ ជុំវិញបញ្ហានេះ លោក ណាត បូរី បានសារភាពថា មង្គលការរបស់លោក ពិតជាគ្រោងធ្វើឡើងដល់ជាង១៤០តុ ទៅលើសនេះមែន ដោតសារតែគ្រួសាររបស់អនាគតភរិយាលោក គឺអ្នកមានមុខមាត់នៅក្រុងបាវិត។

យ៉ាងណាក៏ដោយ ភ្ញៀវកិត្តិយសដែលមិត្តរួមអាជីព ត្រូវបានកូនកំលោះបញ្ជាក់ថា អញ្ជើញតែរង្វង់ក្រោម១០តុប៉ុណ្ណោះ ដោយសារតែមង្គលការនៅឆ្ងាយពេក។ បន្ថែមពីលើនេះ លោកក៏មិនមានគម្រោងធ្វើពិធីកាត់ចំណងដៃនៅភ្នំពេញដែរ ដោយសារតែលោក មិនចង់អោយពិបាក ឬរំខានដល់ភ្ញៀវ ម្យ៉ាងទៀត លោក និងភរិយាក៏មានកិច្ចការរវល់ខ្លាំងទៀតផង។

តាមកាលវិភាគ លោក ណាត បូរី នឹងចូលរោងការជាមួយកូនក្រមុំអ្នកក្រុងបាវិត នៅថ្ងៃទី២១ ធ្នូ ក្នុងឆ្នាំ២០១៩ ចុងសប្ដាហ៍នេះ។ ពិធីនេះ សាមីខ្លួនបានអះអាងថា បានចំណាយខ្ពស់ ដោយសារតែធ្វើច្រើនតុ ខណៈដែលគ្រួសារទាំងសងខាងក៏ព្រមព្រៀងគ្នាថា នឹងធ្វើអោយសមនឹងមុខមាត់ឳពុកម្ដាយក្មេក ដែលជាអ្នកជោគជ័យ នៅក្រុងបាវិត លើជំនួញដីធ្លី។ មិនត្រឹមប៉ុណ្ណឹង អនាគតភរិយារបស់លោក ក៏ជាអ្នកនាំចូលផ្ដាច់មុខផលិតផលអនឡាញ ដ៏ជោគជ័យម្នាក់ផងដែរ។

ដោយសារតែចាប់ដៃគ្នាក្នុងភាពសម្បូរសប្បាយទាំងសងខាង កន្លងទៅគេឃើញលោក ណាត បូរី បាននាំអនាគតភរិយាដើរថតរូប Pre-wedding ដល់ទៅ៤ប្រទេសឯណោះ គឺនៅកម្ពុជា វៀតណាម សិង្ហបុរី និង ឥណ្ឌូណេស៊ី ក្នុងនោះគ្រាន់តែចំណាយលើការងារមុនរៀបការនេះ អស់មិនតិចដែរ ប៉ុន្តែកូនកំលោះរូបនេះ សុំមិនបង្ហើបឡើយ៕