- 2019-12-27 08:08:09
- ព័ត៌មាន
មានចំណុចខ្លះដែល តន់ ច័ន្ទសីម៉ា អាចឡើងខ្លាំងនៅឆ្នាំ ២០២០
- 2019-12-27 08:08:09
- ចំនួនមតិ 0 | ចំនួនចែករំលែក 0
មានចំណុចខ្លះដែល តន់ ច័ន្ទសីម៉ា អាចឡើងខ្លាំងនៅឆ្នាំ ២០២០
ចន្លោះមិនឃើញ
តារាចម្រៀង តន់ ច័ន្ទសីម៉ា បានសាងកេរ្តិ៍ឈ្មោះឡើងមួយកម្រិតនៅចុងឆ្នាំ២០១៩ នេះដោយសារបទចម្រៀងនាងភាគច្រើន ទទួលបានការគាំទ្រខ្លាំងស្ទើរមិនគួរឲ្យជឿ ជាទុនដែលធ្វើឲ្យប្រជាប្រិយភាពនាងស្ទុះឡើង។ ប៉ុន្តែគេមើលឃើញថា នៅក្នុងឆ្នាំ ២០២០ នាងអាចនឹងឡើងកាន់តែឡើងខ្លាំងទៀតដោយយោងលើហេតុផលមួយចំនួន។
តន់ ច័ន្ទសីម៉ា ទើបបានចុះកុងត្រារយៈពេល ៥ឆ្នាំជាមួយផលិតកម្ម Galaxy កាលពីប៉ុន្មានខែមុន។ ដូច្នេះហើយ ទើបនាំឲ្យមានការព្យាករណ៍ពីការវិវត្តរបស់នាងបន្ថែមទៀតនៅឆ្នាំខាងមុខ។ និយាយដល់ចំណុចនេះ ចំណុចវិជ្ជមានមួយរបស់តារាចម្រៀងរូបរាងល្អិត ដែលប្រិយមិត្តអាចកត់សម្គាល់បាននោះ គឺសមត្ថភាពផ្ទាល់ខ្លួនដែលជាខដំបូង។
១.ត្បិតថាមាឌតូច ប៉ុន្តែ សីម៉ា មានសមត្ថភាពខ្ពស់ ពោលគឺសំឡេងមុតល្អ មានទឹកដម មានកម្លាំង និងមានភាពតម្អូញតម្អែរខ្លាំងក្នុងបទប្រភេទឈឺចាប់ក្នុងរឿងស្នេហា នោះជាមូលហេតុដែលនាងទទួលបានការគាំទ្រខ្លាំងក្នុងបទ "មនុស្សដូចខ្ញុំ" កាលនាងនៅជាតារាចម្រៀងឯករាជ្យ។ ក្រៅពីនេះ សំឡេងនាងនៅអាចច្រៀងបានបទចម្រៀងប្រភេទច្រើនទៀត។
ក្រោយមកទៀត គុណភាពសំឡេងនេះដដែល សីម៉ា នៅចាក់ដល់បេះដូងអ្នកស្ដាប់បន្តទៀត ជាមួយបទ "យល់ច្រឡំថាគេស្រឡាញ់យើង" ចេញក្រោមផលិតកម្ម Galaxy Navatra និងបទមួយចំនួនទៀត។
២.ការវិវត្តន៍ខ្លួនមកជាតារាចម្រៀងអាជីពរបស់ផលិតកម្ម៖ ការផ្លាស់ខ្លួនពីតារាចម្រៀងឯករាជ្យ មកជាតារាចម្រៀងផលិតកម្ម នឹងធ្វើឲ្យនាងកាន់តែសក្ដានុពលថែមទៀតដោយយោងលើហេតុផលមួយចំនួនដូចជា៖ ធានាដល់ការចេញបទចម្រៀងច្រើន និងទៀងទាត់ជាងមុនសម្រាប់អ្នកគាំទ្រ។ ចំណុចផ្សេងទៀត នាមជាតារាចម្រៀងមានទ្រនំច្បាស់លាស់ ជាស្វ័យប្រវត្តិ នាងនឹងទទួលបានការឲ្យតម្លៃជាងមុន(ឡើងក្រេឌីត) ហើយនោះក៏ធានាដល់ការឡើងតម្លៃខ្លួនខ្ពស់ថែមទៀត។ ប៉ុន្តែអ្វីដែលសំខាន់ជាងនេះទៀត គេជឿថា នាងនឹងកាន់តែមានទីផ្សារជាងមុនសម្រាប់ Affair ផ្សេងៗ។ ដូច្នេះ នាងចេញកាន់តែច្រើន ល្បីកាន់តែខ្លាំង។
៣.គឺការគាំទ្រពីផលិតកម្ម៖ នេះជាចំណុចសំខាន់ ព្រោះថា មានសមត្ថភាពខ្ពស់ហើយ ក្លាយជាតារាចម្រៀងផលិតកម្មហើយ ប៉ុន្តែបើផលិតកម្មមិនផ្ដល់ឱកាស មិនយឹតយោងតាមសកម្មភាពផ្សេងៗ ហើយផ្អឹបចោលនោះ មិនយូរឡើយ មិនត្រឹមតែប្រជាប្រិយមិនងើបឡើងនោះ ប៉ុន្តែនឹងកាន់តែលិចលង់ថែមទៀត។ យ៉ាងណាចំណុចអវិជ្ជមានទាំងនេះ ទំនងមិនជាប់ខ្លួនតារាចម្រៀងវ័យ ២៣ឆ្នាំរូបនេះទេ ព្រោះស្ថានភាពនាងនៅ Galaxy ផ្ទុយទាំងស្រុងពីរឿងទាំងនេះ។
តាមដំណឹងដែលទទួលបាន គឺថាផលិតកម្មរបស់ឧកញ៉ា ឡេង ណាវ៉ាត្រា ផ្ចុងផ្ដើម សីម៉ា ខ្លាំងណាស់។ ដូច្នេះហើយ ទើបគ្រាន់តែចាប់ផ្ដើម សីម៉ា បានផ្ទុះខ្លាំងជាមួយបទចម្រៀង ៣បទរបស់ផលិតកម្មមានបទ "បើមិនស្មោះស្រឡាញ់គ្នារកងាប់អី" “យល់ច្រឡំថាគេស្រឡាញ់យើង" និងជាពិសេសបទ "គេនោះជាស្រីកាប់ដាវ" ស្នាដៃនិពន្ធដោយឧកញ៉ា ឡេង ណាវ៉ាត្រា ផ្ទាល់ ទទួលបានការខ្លាំងសម្បើមណាស់។
សីម៉ា ខ្លួនឯង ក៏បានអះអាងដូចគ្នាថា នាងទទួលបានការយកចិត្តទុកដាក់ខ្លាំងណាស់ពីផលិតកម្ម។ ដូច្នេះហើយ ក្រៅពីបទខាងលើ តារាចម្រៀងមកពីក្រុងដូនកែវ ខេត្តតាកែវ ប្រាប់ថា ផលិតកម្មបានត្រៀមបទថ្មីសម្រាប់នាងប្រមាណជិត ១០បទទៀតហើយសម្រាប់ឆ្នាំថ្មី។ បទទាំងនោះ សីម៉ា ប្រាប់ថា មានទាំងបទចម្រៀងសម័យបែបយុវវ័យ និងបទសម្រាប់រាំលេងសប្បាយៗនាឱកាសបុណ្យចូលឆ្នាំខ្មែរក្នុងឆ្នាំ ២០២០ នោះថែមទៀត។
ចំណុចនេះទាំងនេះ តន់ ច័ន្ទសីម៉ា ខ្លួនឯងក៏អះអាងថា សប្បាយចិត្តដូចគ្នា ប៉ុន្តែរឿងឆ្នាំថ្មីខាងមុខ នាងវិវត្តបានប៉ុណ្ណា រង់ចាំមើលទាំងអស់គ្នាទៀត៕