- 2020-01-02 03:02:38
- ភាពយន្ត
គិតវែងឆ្ងាយ! ហ៊ុយ យ៉ាឡេង ធ្វើរឿង "ដើម្បីកូន" ព្រោះចង់អោយភាពយន្តខ្មែរសម្បូរបែបដូចទសវត្ស៦០
- 2020-01-02 03:02:38
- ចំនួនមតិ 0 | ចំនួនចែករំលែក 0
គិតវែងឆ្ងាយ! ហ៊ុយ យ៉ាឡេង ធ្វើរឿង "ដើម្បីកូន" ព្រោះចង់អោយភាពយន្តខ្មែរសម្បូរបែបដូចទសវត្ស៦០
ចន្លោះមិនឃើញ
ភាពយន្ត "ដើម្បីកូន" របស់អ្នកនិពន្ធ និងដឹកនាំរឿង ហ៊ុយ យ៉ាឡេង កាន់តែជិតដល់ថ្ងៃដាក់បញ្ចាំងជូនប្រិយមិត្តទស្សនាហើយ ដោយក្នុងនោះ តាមឆន្ទៈរបស់អ្នកនិពន្ធ គឺចង់ឧស្សាហកម្មភាពយន្តសម្បូរបែបដូចទសវត្សទី ៦០។
លោក ហ៊ុយ យ៉ាឡេង បានឲ្យដឹងថា នៅឆ្នាំ ២០១៩ ដែលទើបនឹងកន្លងហួសថ្មីៗនេះ លោកបានសង្កេតឃើញថា ភាពយន្តខ្មែរពោរពេញដោយរឿងខ្មោច និងកំប្លែង ជាច្រើន។ ត្បិតថា ទីផ្សារនៅទាមទារប្រភេទភាពយន្តបែបនេះច្រើន ប៉ុន្តែបើក្រឡេកទៅមើលអតីតកាលនាទសវត្សទី៦០ លោកថា កុនខ្មែរនៅខ្វះរសជាតិនៅឡើយ។ ដូច្នេះហើយ ទើបលោក ផលិតរឿង "ដើម្បីកូន" បន្ថែមរសជាតិទៅក្នុងឧស្សាហកម្មកុនខ្មែរ និងបង្កើតសមិទ្ធផលថ្មីសម្រាប់ខ្លួនឯង និងទស្សនិកជនឆ្នាំ ២០២០នេះដែរ។
"ខ្ញុំចង់អោយភាពយន្តខ្មែរសម្បូរបែបដូចកាលទសវត្ស៦០បង ទោះបីបច្ចុប្បន្នទីផ្សារគេស៊ីតែរឿងខ្មោច តែខ្ញុំត្រូវសម្រេចនាំផ្លូវមុនគេស្វែងរកទីផ្សារថ្មីដែលមិនមែនរឿងខ្មោច ហើយខ្ញុំជឿថានឹងទទួលបានគាំទ្រច្រើនជាងមុនទៀត ព្រោះរបៀបនៃការទស្សនារបស់យុវវ័យពីមុន មកដល់ឥឡូវឃើញមានការផ្លាស់ប្ដូរដែរ"។
លោក បន្តថា ពីមុនយុវវ័យ ចូលចិត្តមើលរឿងខ្មោច កំប្លែង ប៉ុន្តែរយៈចុងក្រោយនេះ លោកថា យុវវ័យបានងាកមកមើលរឿងដែលមានអត្ថន័យស៊ីជម្រៅខ្លះដែរ ដែលទាមទារឲ្យផលិតករដូចជាលោក គួរផ្ដល់ជម្រើសខ្លះដល់ពួកគេ។ ជាមួយគ្នា លោកសង្ឃឹមថា និន្នាការនេះ នឹងបន្តកើនឡើង ដើម្បីឲ្យការផ្គត់ផ្គង់លើភាពយន្តប្រភេទនេះ មានកាន់តែច្រើន ហើយពេលនោះ ឧស្សាហកម្មភាពយន្តក្នុងស្រុកទាំងមូល នឹងសម្បូរបែបដូចកាលពីអតីតកាល។
ក្រៅពីផ្អែកលើរបត់នៃការទស្សនាភាពយន្តរបស់យុវវ័យ អ្វីដែលលោក មានសុទិដ្ឋិនិយមចំពោះរឿងរសជាតិថ្មីរបស់លោក គឺក៏ព្រោះតែលោក មើលឃើញមួយផ្នែកទៀត ពីតម្រូវការអ៊ុំ ពូ មាមីងដែរ។ លោកថា "ពូៗមីងអី គាត់ចង់មើលរឿងដែលគាត់អាចមើលបាន ហើយខ្ញុំតែងទទួលបានការទទូចពីពួកគាត់ផង។ ដូច្នេះហើយ ទើបខ្ញុំធ្វើរឿងនេះ...ខ្ញុំដឹងថា បច្ចុប្បន្ន យុវវ័យមានទម្លាប់ច្រើនជាងសម្រាប់ការកម្សាន្តដោយការទស្សនាភាពយន្ត ប៉ុន្តែពួកគេក៏អាចនាំឪពុកម្ដាយគាត់មកទស្សនាបាន ធ្វើបែបនេះចំណេញដល់ទៅ២ ទី១ បានជួយលើកតម្កើងភាពយន្តខ្មែរ ហើយទី២ បានបង្កើនភាពស្និទ្ធស្នាលជាមួយអ្នកមានគុណទៀត នេះក៏ជាអំណោយមួយដល់អ្នកមានគុណដែរ!"។
រឿង "ដើម្បីកូន" ជាប្រភេទខ្សែភាពយន្តជីវិតពិតដ៏កម្សត់ ឆ្លុះបង្ហាញពីសង្គម ដែលដកស្រង់ពីជីវិតពិតរបស់ឪពុកធាក់ស៊ីក្លូពិកាជើងម្ខាងម្នាក់ដែលប្រឹងចិញ្ចឹមជីវិតដើម្បីកូនពីរអ្នកដែលប្រពន្ធយកមកបោះបង់ចោលនៅកែងវត្តឧណ្ណាឡោម។ បុរសពិការដ៏អភ័ព្វ ពិតជាពលីខ្លាំងណាស់ ដើម្បីចិញ្ចឹមកូន២អ្នកអោយបានរស់បាន ពោលគឺ ខ្លួនពិការតែចិត្តមិនបានពិការឡើយ ព្រោះចង់បញ្ចៀសកូនពីផ្លូវដ៏វេទនាដែលខ្លួនបានដើរ។
តាមលោក លោក ហ៊ុយ យ៉ាឡេង បុរសកម្សត់ក្នុងរឿង បានបង្ខំខ្លួនជាមួយការងារតូចៗជាច្រើនតាំងពីព្រឹក រហូតដល់យប់ ដោយក្នុងនោះមានដូចជា រត់ស៊ីក្លូ រើសអេតចាយ ជញ្ជូនឥវ៉ាន់ឲ្យគេ និងការងារប្រើកម្លាំងជាច្រើនទៀត ប៉ុន្តែចុងក្រោយកូនធ្លាក់ខ្លួនឈឺ មើលមិនជា ធ្វើឲ្យឪពុកកាន់តែអស់សង្ឃឹម...ប៉ុន្តែលោកឪពុករូបនេះ មិនព្រមចុះចាញ់នោះទេ ព្រោះថា ពេលនេះ កូនជាអ្វីទាំងអស់...ដូច្នេះហើយ ជីវិតរបស់លោក អាចប្រើជាថ្នូរបានដែរ។
តាមកាលវិភាគ ភាពយន្តជីវិតពិតមួយនេះ នឹងមកដល់ក្នុងរោងកុន នៅថ្ងៃទី៣០ ខែមករា ២០២០ ខាងមុខនេះ។