- 2020-01-04 08:19:30
- ព័ត៌មាន
មិនទាន់ចប់ទេ រឿង ព្រីង ច័ន្ទបុត្រ ភាគីខាងស្រីចេញមុខម្ដងវិញហើយ
- 2020-01-04 08:19:30
- ចំនួនមតិ 0 | ចំនួនចែករំលែក 0
មិនទាន់ចប់ទេ រឿង ព្រីង ច័ន្ទបុត្រ ភាគីខាងស្រីចេញមុខម្ដងវិញហើយ
ចន្លោះមិនឃើញ
ទំនាស់ពាក្យសំដីរវាងអតីតតារាសម្ដែង ព្រីង ច័ន្ទបុត្រ និងនារីរស់នៅប្រទេសបារាំងម្នាក់រឿងលុយកាក់នោះ កាលពីសប្ដាហ៍មុន ខាងប្រុសបានចេញបកស្រាយ ប៉ុន្តែមកដល់ពេលនេះ ខាងស្រីបានចេញមុខម្ដង ដោយនាងបានច្រានចោលអ្វីដែលលោក បុត្រ និយាយមិនមែនជាការពិត។
នៅមុននេះ ប្រមាណ១សប្ដាហ៍កន្លងផុតទៅមានករណី ទំនាស់ថ្មីរវាងអតីតតារាសម្ដែង ព្រីង ច័ន្ទបុត្រ ដោយសារនារីជាអាណិកជនខ្មែររស់នៅប្រទេសបារាំងម្នាក់ បានបញ្ចេញសារបន្តបន្ទាប់ថា តារាប្រុសរូបនេះ ជំពាក់លុយនាង ហើយបានព្យាយាមគេចវេះមិនសង ថែមទាំងគំរាមនាងទៀត។ ភ្លាមៗ ពោលគឺ១ថ្ងៃបន្ទាប់លោក ព្រីង ច័ន្ទបុត្រ បានចេញមុខឆ្លើយតបចំពោះករណីខាងលើ។
អតីតតួប្រុសក្នុងបទស្នេហា៤ដួងរបស់ខ្មែរ បានចាប់ផ្ដើមពីរៀបរាប់ពីសម្ព័ន្ធភាព និងនារីខ្មែររស់នៅបារាំងឈ្មោះ Roselyne Dalva ថា ពួកគេគឺជាអតីតគូស្នេហ៍ដែលធ្លាប់ល្អូកល្អិននឹងគ្នា ធ្លាប់ដើរកម្សាន្តកសាងអនុវស្សាវរីយ៍ជាច្រើនរាប់មិនអស់ គ្រប់ខេត្តក្រុងរបស់កម្ពុជា រាល់ពេលខាងស្រីចុះមកស្រុកខ្មែរម្ដងៗ។
ប៉ុន្តែក្រោយវេលាផ្អែមល្ហែមកន្លងផុតទៅ អ្នកទាំងពីរក៏ចាប់ផ្ដើមឆ្ងាយៗបន្តិចម្ដងៗ ដោយមិនសូវទាក់ទងគ្នា ដែលបញ្ញានេះ លោក បុត្រ ខ្លួនឯងក៏មិនដឹងមកពីមូលហេតុអ្វីពិតប្រាកដដែរ។ ប៉ុន្តែលោកបានដាក់ការសង្ស័យថា ទំនងដោយសារលោកឧស្សាហ៍ធ្វើឲ្យនាងខឹងពេលលោក ស្រវឹងម្ដងៗ។ លុះក្រោយពីដាច់ការទាក់ទងគ្នារយៈពេលយូរ នារីជាគូស្នេហ៍បានទាក់ទងមកលោក ហើយចាប់ផ្ដើមទារលុយតែម្ដង។
ចំពោះការទារលុយនោះ លោក ព្រីង ច័ន្ទបុត្រ បានប្រាប់ថា លោកមិនដែលបានខ្ចីលុយនារីជាគូស្នេហ៍ទេ ប៉ុន្តែលោកទទួលថា រាល់ពេលនារីជាគូស្នេហ៍ចុះមកស្រុកខ្មែរម្ដងៗ គឺការចំណាយផ្សេងៗលើការដើរកម្សាន្ត គឺខាងស្រីជាអ្នកចំណាយទាំងអស់មែន។ ត្បិតថា មិនដឹងថាខ្លួនជំពាក់អតីតសង្សារពិតមែន ប៉ុន្តែលោកបានសន្យាថាសងវិញ ចំពោះលុយចំណាយលើការស៊ីចាយជាមួយគ្នា ព្រោះតែធុញទ្រាន់នឹងការទារដដែលៗពេក ក្នុងនោះលោកថា នឹងសងក្រោយលក់ដីឪពុកនៅបាវិតដាច់។
ក្រោយមកទៀត ដោយសារតែភាគីខាងស្រី នៅតែទារដដែលៗពេក លោក បុត្រ ប្រាប់ថា លោកក៏បានផ្ដាច់ទំនាក់ទំនងហ្វេសប៊ុកជាមួយនាងតែម្ដង។ បញ្ហានេះលោកបញ្ជាក់ថា មិនមែនគេចទេ ប៉ុន្តែមកពីធុញនឹងការទារលុយខ្លាំងពេក...ព្រោះជាក់ស្ដែងលោកមិនបានខ្ចីផង ប៉ុន្តែលុយស៊ីចាយដើរលេងជាមួយគ្នាប៉ុណ្ណោះ។
យ៉ាងនេះក្ដី កញ្ញា Roselyne Dalva បញ្ជាក់មិនមែនដូច្នេះទេ។ នារីអាណិកជនខ្មែររូបនេះថា នាងធ្លាប់ជាសង្សាររបស់លោក ព្រីង ច័ន្ទបុត្រ ពិតមែន តែនោះជារឿងអតីតកាលទៅហើយ ហើយបញ្ហាចុងក្រោយនេះ គឺរឿងលុយកាក់របស់នាង។ Roselyne Dalva បន្តថា រាល់ការចំណាយដើរលេងជាមួយគ្នា គឺនាងចំណាយទាំងអស់ ក្រៅពីនេះ នៅមានទុកលុយសម្រាប់លោក បុត្រ ផ្សេងទៀត។
ប៉ុន្តែចំពោះទឹកប្រាក់ដែលនាង ទារឲ្យសងវិញនោះ មិនមែនចំនួនលុយខាងលើនោះទេ គឺលុយដែលនាងទុកឲ្យលោក ព្រីង ច័ន្ទបុត្រ ដើររកមើលទិញដី ទិញផ្ទះឲ្យនាង ដែលលុយនោះមានចំនួនជាង ១ម៉ឺនដុល្លារអាមេរិក។ ប៉ុន្តែមិនទិញបានដីផ្ទះហើយ Roselyne អះអាងថា អតីតគូស្នេហ៍ បានចាយលុយអស់ថែមទៀត។
“ខ្ញុំអត់ទារលុយស៊ីចាយជាមួយគ្នាទេបង គឺលុយដែលខ្ញុំទុកឲ្យគាត់រកទិញដីទិញផ្ទះឲ្យ ហើយត្រូវគាត់យកចាយអស់ ហើយនៅក្នុងឆាត ក៏គាត់មាននិយាយថា នឹងសងខ្ញុំវិញដែរ"។ Roselyne Dalva ថ្លែង។
យ៉ាងណាក៏ដោយ លោក ព្រីង ច័ន្ទបុត្រ នៅតែអះអាងថា លោកមិនបានទទួលលុយពីនារីអតីតសង្សារ ដូចការលើកឡើង ក្រៅតែពីលុយចំណាយលើការដើរលេងជាមួយគ្នានោះទេ។ ប៉ុន្តែលោកថា បើភាគខាងស្រីថាមាន លោកស្នើឲ្យបញ្ចេញភស្តុតាង ដូចជាកិច្ចសន្យា ឬលិខិតពាក់ព័ន្ធផ្សេងៗ។ យ៉ាងណា ស្ត្រីអាណិកជនខ្មែរនៅបារាំងដដែល ប្រាប់ថា នាងគ្មាននោះទេ។
"រឿងគាត់ទាររកសំបុត្រ ធម្មតាបង ជាសង្សារនឹងគ្នា ស្រឡាញ់គ្នា ទុកចិត្តគ្នា អីចឹងការប្រគល់លុយដែលមានក្រដាសស្នាមអី គឺអត់មានទេ...!”។ Roselyne Dalva បញ្ជាក់ថា នាងមិនចង់វែងឆ្ងាយអ្វីទេ ប៉ុន្តែគ្រាន់តែចង់ចេញមុខបំភ្លឺដើម្បីការពារខ្លួនខ្លះ និងចង់ឲ្យអតីតគូស្នេហ៍ និយាយអ្វីជាការពិត ព្រោះនាងថា អ្វីដែលលោក ព្រីង ច័ន្ទបុត្របានបកស្រាយ គឺមិនមែនជាការពិតទេ៕