- 2020-01-08 03:15:42
- ព័ត៌មាន
ឆ្នាំថ្មី២០២០ តារាប្រុស នាង វ៉ាងសាន់ និង ឈួន ពន្លឺ ទម្លាក់លុយម្នាក់ ២ម៉ឺនដុល្លារអាមេរិក
- 2020-01-08 03:15:42
- ចំនួនមតិ 0 | ចំនួនចែករំលែក 0
ឆ្នាំថ្មី២០២០ តារាប្រុស នាង វ៉ាងសាន់ និង ឈួន ពន្លឺ ទម្លាក់លុយម្នាក់ ២ម៉ឺនដុល្លារអាមេរិក
ចន្លោះមិនឃើញ
ចាប់ផ្ដើមគម្រោងក្នុងឆ្នាំថ្មី តារាប្រុស២ដួង គឺលោក នាង វ៉ាងសាន់ ពិធីករទូរទស្សន៍ហង្សមាស និងលោក ឈួន ពន្លឺ តារាសម្ដែង បានទម្លាក់លុយម្នាក់២ម៉ឺនដុល្លារអាមេរិក វិនិយោគរួមគ្នាក្នុងជំនួញថ្មីស្រឡាងមួយរបស់ពួកគេ។
តារាប្រុសទាំងពីរ បានសម្រេចរួមគ្នាវិនិយោគបើកភោជនីយដ្ឋានមួយកន្លែង ដែលទើបបើកសម្ពោធម្សិលមិញនៅទីតាំងជិតស្តុបទួលទំពូង។ ជំនួញ គឺកើតឡើងពីមិត្តភាព ដែលក្នុងនោះ ពួកគេបានអះអាងថា ពួកគេទាំងពីរអ្នកជាមិត្តល្អនឹងគ្នា ហើយមានគំនិតចង់រកស៊ីដូចគ្នា ក៏សម្រេចរួមគ្នាវិនិយោគតែម្ដង។ តាមការឲ្យដឹង តាមពិតទៅ ភោជនីយដ្ឋានដែលមានឈ្មោះថា “Sunlight Restaurang” នេះបានបើដំណើរការមួយរយៈហើយ។
ក្នុងរយៈពេលនោះ ជំនួញពួកគេដំណើរល្អ រហូតចំណេញប្រាក់ខ្លះ ទើបចាប់ផ្ដើមពង្រីកបន្ថែមទៅជាន់លើ ហើយក៏ចាប់ផ្ដើមពីសម្ពោធធំដុំផ្លូវការតែម្ដង ដោយបានអញ្ជើញភ្ញៀវកិត្តិយសទាំងក្នុង និងក្រៅសិល្បៈប្រមាណ ៤០តុឯណោះ។ លោក ឈួន ពន្លឺ ប្រាប់ថា សម្រាប់លោកផ្ទាល់ គឺស្រឡាញ់ចូលចិត្តការធ្វើជំនួញផ្នែកភោជនីយដ្ឋាននេះ ស្របពេលមិត្តភ័ក្ដិក៏យល់ស្រប ទើបអ្វីៗក៏អាចលេចជារូបរាងឡើង។
ហេតុផលសំខាន់មួយទៀត ដែលតារាប្រុស រើសយកជំនួញដែលភាគច្រើន ត្រូវបើកដោយសិល្បការិនីនោះ ដោយសារតែលោកមានជំនាញខាងម្ហូបមកពីក្រៅប្រទេសស្រាប់ផង។ ពន្លឺ ប្រាប់ថា លោកធ្លាប់ទៅធ្វើការនៅប្រទេសសិង្ហបុរី អំឡុងឆ្នាំ ២០១០-២០១១ ធ្វើជាអ្នករត់តុ។ ជំនាញពិសេសរបស់លោកមួយទៀត កាលនៅលើទឹកដីនាគអាស៊ីនោះ គឺជំនាញ "ភ្លក្ស" អាហារ។
ផ្សំគ្នាទៀតដែរ តារាសម្ដែង ឲ្យដឹងបន្ថែមថា លោកខ្លួនឯងក៏ជាអ្នកចូលចិត្តការងារចុងភៅនេះទៀត ទើបលោកសម្រេចវិនិយោគរួមគ្នាជាមួយមិត្តភ័ក្តិវិនិយោគលើភោជនីយដ្ឋានខាងលើ ដែលលោកយល់ថា សាកសមបំផុតសម្រាប់លោក។
លោក នាង វ៉ាងសាន់ និង ឈួន ពន្លឺ មិនទាន់បានដាក់គោលដៅ ត្រូវពង្រីកសាខាភោជនីយដ្ឋានរបស់ខ្លួនទៅកន្លែងផ្សេងទៀតទេ។ លោកថា អ្វីដែលត្រូវធ្វើចំពោះមុខ គឺត្រូវធ្វើយ៉ាងណាឲ្យសាខាធំទី១នេះ ដំណើរការល្អជាមុនសិន៕