- 2020-01-16 04:28:04
- ព័ត៌មាន
កំប្លែងរាប់ឆ្នាំ នេះជាលើកទី១ហើយ នាយគ្រឿន និយាយរឿងរ៉ាវឈុតស្នេហា
- 2020-01-16 04:28:04
- ចំនួនមតិ 0 | ចំនួនចែករំលែក 0
កំប្លែងរាប់ឆ្នាំ នេះជាលើកទី១ហើយ នាយគ្រឿន និយាយរឿងរ៉ាវឈុតស្នេហា
ចន្លោះមិនឃើញ
ដូចគ្នានឹងតួអង្គវាយទាត់ធាក់របស់ចិន ដែលមិនសូវបានសម្ដែងឈុតស្នេហាផ្អែមល្ហែម នាយគ្រឿន ប្រាប់ថា នាយក៏មិនសូវបានសម្ដែងឈុតល្អូកល្អិនបែបនោះដែរ ក្រៅតែពីឈុតកំប្លែង ឬឡប់ៗជាដើម ដែលប្រិយមិត្តបានឃើញស្ទើរគ្រប់រឿង។
ត្បិតថា ជាតារាកំប្លែង នាយ គ្រឿន ប្រាប់ថា ឈុតស្នេហាក៏នាយចូលចិត្តដែរ ប៉ុន្តែកន្លងមកការសម្ដែងភាគច្រើនសុទ្ធជាតួអង្គកំប្លែងដោយសារតែសក្ដានុពលរបស់នាយ គឺ "កំប្លែង"។"យី...អ្នកណាមិនចូលចិត្តបង(សើច)!”។ យ៉ាងណា តាមបទពិសោធន៍កន្លងមក ក៏មិនថា លោកមិនដែលជួបឈុតឆាកស្នេហាសោះដែរ គឺធ្លាប់ដែរ ដូចជាឈុតស្នេហាសម្ដែងជាមួយកញ្ញា គៀត សុវណ្ណាឡាង ក្នុងរឿង "ជួបស៊យ" ជាដើម។
នាយ គ្រឿន លើកឡើងថា៖ "ជួបដែរ...មិនអត់សោះទេ ប៉ុន្តែក៏មិនបានស៊ីជម្រៅអីដែរ ព្រោះយើងអ្នកកំប្លែង ភាគច្រើន ឲ្យថើបជិតដល់គ្នាអីហ្នឹង គេកាត់ប៉ាត់...អត់អាដែល"។ នេះជារឿងក្នុងអតីតកាលឆ្នាំចាស់ ប៉ុន្តែមកដល់ឆ្នាំថ្មីនេះ នាយគ្រឿន ទើបនឹងបានបើកឆាកឈុតស្នេហាល្អូកល្អិនជាមួយនឹងតារាស្រីដ៏ស្រស់ស្អាតម្នាក់ គឺកញ្ញា ឈិន សៀវម៉ី វេលាដែលពួកគេបានជួបគ្នាសម្ដែងក្នុងរឿង "កំពូលអ្នកស៊ើបអង្កេតបែកស្លុយ" ដែលបានបើកសម្ពោធនាថ្ងៃម្សិលមិញ។
នៅក្នុងរឿងនេះ នាយគ្រឿន សម្ដែងជាតួឯកប្រុស និងជាអ្នកស៊ើបអង្កេត ប៉ុន្តែកំប្លែងដែលជាអត្តសញ្ញាណរបស់លោកនៅតែមានដដែល ពោលគឺជាអ្នកស៊ើបអង្កេតបែបកំប្លែងនេះឯង។ ត្បិតថានៅតែជាតួអង្គកំប្លែង នាយ គ្រឿន ប្រាប់ថា រឿងនេះលោកមានឈុតល្អូកល្អិនជាមួយតួស្រី ឈិន សៀវម៉ី ដ៏ស្រស់ស្អាត ច្រើនជាងរឿងក្នុងអតីតកាល។ គ្រឿន ប្រាប់ថា "មានបង...ឱបថើបៗរហូត(សើច)!”។
តារាកំប្លែងប្រាប់ទៀតថា តួអង្គស្រី គឺស្រស់ស្អាតខ្លាំង សាច់ស ដូច្នេះលោកក៏ជួបឧបសគ្គខ្លះដែរនៅត្រង់ចំណុចនេះ ពោលគឺការសម្ដែងហាក់នៅមានឧបសគ្គខ្លះ។ "តួស្រីគេស្អាតសាច់សអីចឹងណាបង...ដល់មកឯងឯណេះមុខអីចឹងហ្នឹង...សម្ដែងទៅវាដូចពិបាកចូលគ្នា(សើច) បើគេប្រុសស្អាតអីទៅ តួស្រីគេអាចសម្ដែងឆាប់ស៊ីគ្នា...ហើយអារឿងមួយទៀត ដែលពិបាកដែរ យើងសម្ដែងមានការប្រុងប្រយ័ត្ន...ព្រោះថា យើងគិតថា ជាការសម្ដែង តែខ្លាចខាងគេថាយើងចង់បន្លំអីចឹងណាបង!”។
នាយ គ្រឿន អះអាងថា សម្ដែងកំប្លែង គឺមានការលំបាកច្រើន ព្រោះក្រៅពីកាយវិការត្រូវរកពាក្យពេចន៍មកនិយាយឲ្យគេសើច។ ដោយឡែក ឈុតស្នេហា ក៏ពិបាកមិនចាញ់គ្នាដែរ...ត្រង់ការសម្ដែងឲ្យចូលតួ ឲ្យវាស្និទ្ធ គឺនាយហាក់មិនទាន់ល្អគ្រប់គ្រាន់ ព្រោះតែខ្លាចតួស្រីយល់ផ្សេងមកលើនាយ។ ដោយសារតែបែបនេះហើយ ជាហេតុការសម្ដែងឈុតស្នេហាហាក់មិនទាន់ដល់កម្រិតកំពូលនៅឡើយ។
នេះគឺឈុតស្នេហាដំបូង និងជាភាពយន្តដំបូងសមិទ្ធផលរបស់នាយគ្រឿននាដើមឆ្នាំ ២០២០ នេះ។ រឿង "កំពូលអ្នកស៊ើបអង្កេតបែកស្លុយ" ផលិតដោយផលិតកម្ម Vcine Picture ។ លោក លី វ៉េត ចាងហ្វាងផលិតកម្មបញ្ជាក់ថា នេះជារឿងទី២របស់ផលិតកម្ម បន្ទាប់ពីរឿង "ទេសចរណ៍ឋាននរក" ហើយថា បន្ទាប់ពីនេះទៅ ផលិតកម្មលោកក៏នៅមានរៀងបន្តបន្ទាប់ទៀត ដែលមានរសជាតិថ្មីពីរឿង២ខាងលើ។
ក្រោយពីបើកសម្ពោធម្សិលមិញ រឿង "កំពូលអ្នកស៊ើបអង្កេតបែកស្លុយ" នឹងចាក់បញ្ចាំងចាប់ពីថ្ងៃនេះតទៅហើយ នៅគ្រប់រោងភាពយន្តទំនើបក្នុងរាជធានីភ្នំពេញ។