បទ ឡេង ប៊ុនណាត ដ៏ពីរោះមួយបទកម្រលឺ ត្រូវថៅកែវ័យក្មេងមួយរូប យកមកច្រៀងឡើងវិញ ពីរោះរំជួលចិត្ត

2020-01-29 09:38:45
ចម្រៀង

2020-01-29 09:38:45
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ឡេង ប៊ុនណាត ហាក់បាត់មុខឈឹងពីសិល្បៈដោយមិនដឹងថាបច្ចុប្បន្នលោកនៅឯណា។ ប៉ុន្តែកេរ្តិ៍របស់លោកត្រូវបានគេរំលឹកឡើងវិញ ក្រោយពីថ្មីៗនេះ មានថៅកែដីឡូតិ៍មួយរូបបានយកបទចម្រៀងមួយបទដ៏ពីរោះរបស់លោកយកមកច្រៀងឡើងវិញ ហើយបង្ហោះនៅលើបណ្ដាញសង្គម។

បទចម្រៀងមួយបទនេះ ថៅកែដីឡូតិ៍វ័យក្មេង ដែលគេស្គាល់ថាឈ្មោះ "សីហា" បានអះអាងថា ជាបទចម្រៀងដ៏ពីរោះមួយរបស់លោក ឡេង ប៊ុនណាត ដែលកម្រមានអ្នកស្គាល់ និងធ្លាប់បានស្ដាប់។ ដោយសារជាអ្នកចូលចិត្តស្ដាប់រាល់បទរបស់តារាចម្រៀងជើងចាស់ខាងលើ លោក សីហា ប្រាប់ថា លោកក៏សម្រេចយកមកច្រៀងឡើងវិញ ក្រោយពីលោកធ្លាប់បានច្រៀងលេងជារឿយៗពីអតីតកាល។

ចម្រៀងមួយបទនេះ មានចំណងជើងថា "មេឃក្រឡាប់លើ" ដែលទំនុកភ្លេង និងទំនុកច្រៀង ត្អូញត្អែរពីការឈឺចាប់របស់បុរសជាប្ដីមួយរូប ដែលត្រូវភរិយាលួចផិតក្បត់ ហើយប្ដីកម្សត់បានតាមទាន់ម្ដងជាពីរដង។ ប៉ុន្តែមិនអាចធ្វើអ្វីបាន ក្រៅពីទ្រាំឈឺចាប់ គ្រាំគ្រាទ្រូង អួលណែននិយាយមិនចេញ រស់នៅពិបាកជាងស្លាប់ទៅទៀត។ លោក សីហា ប្រាប់ថា មូលហេតុផ្សេងទៀត ដែលលោកសម្រេចលើកយកបទខាងលើមកច្រៀងឡើងវិញ គឺចង់ឧទ្ទិសទៅមនុស្សរាប់អានគ្នាមួយរូប។

ថៅកែវ័យក្មេង បញ្ជាក់ថា សាច់រឿងឈឺចាប់ដែលមានក្នុងបទចម្រៀងរបស់លោក ឡេង ប៊ុនណាត គឺដូចស្ទើរ១០០%ទៅនឹងសាច់រឿងរបស់មនុស្សរាប់អានគ្នាម្នាក់របស់លោក នោះគឺលោកគ្រូបង្រៀនកម្សត់ម្នាក់ ដែលត្រូវភរិយាលួចផិតក្បត់ មានសហាយ ហើយលោក(ស្វាមី)បានតាមទាន់ម្ដងជាពីរដង តែមិនបានធ្វើអ្វីដល់ភរិយារូបនោះ រួមទាំងសហាយនោះទេ គឺបានត្រឹមណែនាំ ឲ្យឈប់ធ្វើបែបនេះទៀត ព្រោះអាណិតកូនតូចៗទាំងពីរ។

ប៉ុន្តែមិនត្រឹម មិនកែ ភរិយារូបនោះ នៅបានរួមគំនិតជាមួយសហាយ ហៅលោកមកសម្លាប់ក្នុងបំណងដណ្ដើមយកកេរថែមទៀត។ លោក សីហា ថា មិត្តលោកស្លាប់ទៅទាំងឈឺចាប់ និងអាឡោះអាល័យ។ "កាលគាត់នៅរស់ រាល់ពេលទៅហូបអីជុំគ្នា គាត់តែងតែសំណូមពរឲ្យខ្ញុំច្រៀងបទនេះ ឲ្យគាត់ស្ដាប់...តែខ្ញុំមិនចាប់អារម្មណ៍ថាមានរឿងអី...រហូតដល់ថ្ងៃគាត់មានរឿង ទើបដឹងថា គាត់បានជួបរឿង ដូចក្នុងបទចម្រៀងនេះ គឺដូចស្ទើរ១០០% ហើយក៏ចាប់ផ្ដើមស្រណោះគាត់ ព្រោះគាត់ស្លូតណាស់ ហើយស្រឡាញ់ប្រពន្ធ ពិសេសកូនទាំងពីររបស់គាត់ណាស់!”។