- 2020-02-11 04:10:09
- ព័ត៌មាន
អ្នកនិពន្ធចេញមុខភ្លាមៗ ក្រោយផ្ទុះការរិះគន់វីដេអូ Trailer រឿង "អន្ទាក់ស្នេហ៍" ជារឿងចម្លងភាពយន្តថៃ
- 2020-02-11 04:10:09
- ចំនួនមតិ 0 | ចំនួនចែករំលែក 0
អ្នកនិពន្ធចេញមុខភ្លាមៗ ក្រោយផ្ទុះការរិះគន់វីដេអូ Trailer រឿង "អន្ទាក់ស្នេហ៍" ជារឿងចម្លងភាពយន្តថៃ
ចន្លោះមិនឃើញ
អ្នកនិពន្ធនៃភាពយន្តខ្មែររឿង “អន្ទាក់ស្នេហ៍” បានចេញមុខមកតតាំង ក្រោយរឿងនេះ ត្រូវបានអ្នកទស្សនាភាពយន្តមួយចំនួនរិះគន់ ថាបានចម្លងសាច់រឿង ស្នាមរបួសចាស់ ឬ The Scar របស់ប្រទេសថៃ និងបានអះអាងថា វីដេអូខ្លីនៃរឿងទាំងពីរ មានលក្ខណៈដូចគ្នាស្ទើរតែទាំងស្រុង។
លោកសាស្ត្រចារ្យ ចាន់ សារិន ផ្នែកល្ខោនយីកេ នៃសាលាមធ្យមសិក្សាសិល្បៈ ដែលជាកវីនិពន្ធរឿង “អន្ទាក់ស្នេហ៍ ”បានអះអាងថា រឿង “អន្ទាក់ស្នេហ៍” ជាស្នាដៃនិពន្ធរបស់លោកផ្ទាល់ ដែលប្រើពេលគិតប្រមូលពីសាច់រឿងពិត របស់ ចាស់ទុំ ក្នុងស្រុកភូមិរបស់លោក ធ្លាប់រស់នៅកាលពីយុវជនជំទង មកសរសេរឡើង អស់រយៈពេល ១ ឆ្នាំ និងរៀបជាអត្ថបទភាពយន្តជិត ១ឆ្នាំទៀត។
ដូច្នេះមិនពិតទេ ដែលថាភាពយន្តរបស់លោក ទទួលបានការរិះគន់ថាចម្លងពីសាច់រឿងរបស់ប្រទេសជិតខាង។ ភាពយន្ត "អន្ទាក់ស្នេហ៍" ទៀតសោត ឆ្លុះបញ្ចាំងពីស្នេហាស្មោះស្ម័គ្រ នៃគូសង្សារស្រុកស្រែ ដែលមានម្តាយជាអ្នកបំបែក ដើម្បីមាសប្រាក់របស់ចាស់ព្រើលមួយរូប ដែលខ្វះសីលធម៌ និងមានចិត្តគំនិតកំណាញ់ស្វិត ល្បិចកល អាវ៉ាសែ ដើម្បីបោកយកនារីក្មេងមកជាគូអនាគតរបស់ខ្លួន។
លោកសាស្ត្រចារ្យ ចាន់ សារិន ដែលមានវ័យជាង ៥០ ឆ្នាំ បន្តថា សាច់រឿងនេះមានពិតក្នុងសម័យកាលលោកសាស្ត្រចារ្យនៅវ័យជាង ២០ ឆ្នាំ ដែលកាលនោះកម្ពុជាទើបតែមានសន្តិភាព ឆ្លងផុតពីរបបខ្មែរក្រហម។ តម្លៃនៃសាច់រឿងនេះ ឆ្លុះបញ្ចាំងពី កិច្ចកត្តញូតាធម៌របស់កូនស្រីជូនដល់ម្តាយ សេចក្តីស្នេហាស្មោះស្ម័គ្រ ដោយហ៊ានលះបង់សេចក្ដីសុខផ្ទាល់ខ្លួនដើម្បីដូរនឹងសេចក្ដីសុខរបស់មនុស្សជាជាទីស្រលាញ់ និងចុងក្រោយជាការកែប្រែភាពអវិជ្ជមានរបស់មនុស្សចាស់ដែលខូច។ នេះបើតាមការបញ្ជាក់របស់ សាស្ត្រាចារ្យ ចាន់ សារិន កវីនិពន្ធខ្មែរម្ចាស់ពាន់រង្វាន់អក្សរសិល្ប៍ខ្មែរឆ្នាំ ២០០១ និង ២០០២។
វិលមករឿងដែល មានប្រិយមិត្តរបស់រោងភាពយន្តជាច្រើន មានចម្ងល់ នឹងលើកឡើងបញ្ជាក់ពីការប្រើប្រាស់ប្លង់ថត ដូចគ្នា ទេសភាពដូចគ្នាមកបញ្ជាក់ ជាអំណះអំណាងងថាភាពយន្តខ្មែរមួយនេះបានលួចចម្លងសាច់រឿងដើម “របួសចាស់” របស់ប្រទេសថៃនោះ លោកថា គ្រាន់តែជារឿងចៃដន្យ និងក្នុងបរិបថមិនអាចជៀសមិនផុតឡើយ។
លោកសាស្ត្រាចារ្យបន្តថា ជាក់ស្ដែង ស្នេហារបស់ក្រមុំកំលោះស្រុកស្រែកាលនោះ គឺមិនលើសពីក្នុងទឹកបឹង មានឈូក មានព្រលឹត មានវាលស្រែ និងមាន ខ្ទមអ្នកតាជាសាក្សីឡើយ។ ដូចនេះការប្រៀបធៀបដោយយកប្លង់ថត ប្រហាក់ប្រហែល មកបញ្ជាក់ វាឥតមានអ្វីខុសទេ។
"តែប្រសិនបើម្នាក់ៗបើកចិត្តឱ្យទូលាយ ហើយគិតបន្តិចថា តើកំលោះក្រមុំស្រុកស្រែ បើស្រលាញ់គ្នា កន្លែងណាទៀតដែលសាកសមជាងនេះ ហើយថាតើ ស្រុកស្រែខ្មែរ និងស្រុកស្រែនៃប្រទេសថៃខុសគ្នាប៉ុនណានោះ លោកថា ពួកគេនឹងផ្សេងពីនេះ។ សាស្ត្រាចារ្យថ្លែង។
អ្នកនិពន្ធដដែល បន្តថា ទេសភាពដ៏ត្រកាលនៃស្រុកស្រែរបស់ខ្មែរ គិតមិនទាន់បាត់បង់សម្រស់នៅឡើយទេ ការថតជាន់ប្លង់នៃរឿងចាស់ វាតែងកើតឡើង ពិសេសអំបូររឿងស្នេហាស្រុកស្រែបែបនេះ តែថា គុណភាពនៃសាច់រឿង ពិតជាទាក់ភ្នែកទស្សនិកជនហើយទើបធ្វើឱ្យអ្នករឮកដល់រឿងចាស់ថែមទៀត។ យ៉ាងណាមិញ ទាំងផលិតករ អ្នកដឹកនាំរឿង និងក្រុមការងារជាខ្មែរទាំងអស់ ពិសេសអ្នកនិពន្ធរឿង “អន្ទាក់ស្នេហ៍” សង្ឃឹមថា អ្នកគាំទ្រកុនខ្មែរទាំងអស់ នឹងសាកល្បងទស្សនារឿងមួយនេះដើម្បីឈ្វេងយល់ពីភាពខុសគ្នានៃសាច់រឿងទាំងពីរ៕