អ្នកធ្វើវីដេអូម្ហូបល្បីលើ Youtube ប្រមូលរង្វាន់សរុប ២ម៉ឺនដុល្លាររួចបាត់ហើយ

2020-03-16 00:11:00
ព័ត៌មាន

2020-03-16 00:11:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតប្រជែង Influencer ប្រចាំឆ្នាំក្នុងកម្មវិធី CAMBODIAN NET IDOL រដូវកាលទី 2 បានបញ្ចប់ ដោយក្នុងនោះយុវតីស្រស់ស្អាតម្ចាស់ Channel : Eat With Bee ដែលធ្វើវីដេអូម្ហូបអាហារល្បីលើ Youtube បានឈ្នះជយលាភីលេខ១ ទទួលទឹកប្រាក់រង្វាន់ចំនួន សរុប 20.000 ដុល្លារអាមេរិកឯណោះ។

ជយលាភីនេះ ក្រោយកញ្ញា ប៉ូ សុជាតា ឬ EAT WITH BEE បានយកឈ្នះលើបេក្ខជន២រូបទៀត គឺ D.R និង Manith ដោយកញ្ញាទទួលបានសំឡេងគាំទ្រច្រើនជាងគេទាំអស់ ក្លាយជាជយលាភីលេខ១ប្រចាំរដូវកាលទី២របស់កម្មវិធីដែលបានរៀបចំដោយក្រុមហ៊ុន Cake Experiential។

ប៉ូ សុជាតា បានឲ្យដឹងថា កញ្ញា រីករាយខ្លាំងណាស់ ព្រោះមិនសង្ឃឹមថា នាងអាចធ្វើបានឡើយ ដូច្នេះហើយនាងក៏មិនមានបំណងចូលរួមការប្រកួតនេះដែរពីដំបូង ប៉ុន្តែមិត្តភ័ក្ដនាងម្នាក់ជំរុញទើបនាងសម្រេចដាក់ពាក្យប្រកួត ហើយទីបំផុតនាងសម្រេចបានលទ្ធផលយ៉ាងអស្ចារ្យ។ យ៉ាងណា កញ្ញា បានបញ្ជាក់ថា នៅក្នុងការប្រកួតដែលសរុបមានដល់ទៅ ៩វគ្គ គឺនាងមានរឿងបាក់ទឹកចិត្តមួយចំនួន ហើយកញ្ញាស្ទើរតែនឹងបោះបង់ចោលទៅហើយ។

ប៉ុន្តែអំឡុងនាងបាក់ទឹកចិត្តស្រាប់តែមានអ្នកគាំទ្រម្នាក់ឆាតមកលើកទឹកចិត្ត និងសរសើរថានាងធ្វើបានល្អ ទើបនាងចាប់ផ្ដើមមានកម្លាំងចិត្តឡើងវិញ។ "ពេលហ្នឹងខ្ញុំរំភើបខ្លាំងណាស់ ហើយក៏តាំងចិត្តថា ខ្ញុំមិនអាចបោះបង់ចោលទេ ខ្ញុំត្រូវតែតស៊ូដើម្បី Fan របស់ខ្ញុំ!"។

សុជាតា ទទួលបានទឹកប្រាក់សុទ្ធ កុងត្រា និង រង្វាន់ជាច្រើន។ យុវតី អាយុ២១ឆ្នាំ ដែលប្រាប់ថា នាងចាប់ផ្ដើមធ្វើវីដេអូម្ហូបអាហារដំបូង ដោយសារតែនាងចូលចិត្តញុំានោះ បានឲ្យដឹង លទ្ធផលនៅថ្ងៃនេះ ធ្វើឲ្យនាងកាន់តែមានទឹកចិត្ត ហើយនាង នឹងយកប្រាក់ខ្លះពីការឈ្នះនេះ ទៅទិញកាមេរ៉ាថ្មី និងសម្ភារៈមួយចំនួនទៀត ដើម្បីបន្តកិច្ចការនាង។

សុជាតា គ្រោងនឹងចាប់ផ្ដើមធ្វើវីដេអូប្រភេទថ្មីទៀតអំពីការអប់រំ ព្រោះនាងមើលឃើញថា បច្ចុប្បន្នវីដេអូប្រភេទនេះ នៅក្នុងស្រុកមិនសូវមានអ្នកធ្វើ។ ដូច្នេះហើយ នាងនឹងធ្វើដើម្បីផ្ដល់ការអប់រំ ពិសេសគឺផ្ដោតលើការអប់រំពាក់ព័ន្ធនឹងសុវត្ថិភាពបន្លែ និងចំណីអាហារ។ ក្រៅពី EAT WITH BEE បេក្ខជន២រូបទៀត គឺ D.R និង Manith ទទួលបានជយលាភីលេខ២ និងលេខ៣រៀងខ្លួន។

នេះគឺជាឆ្នាំទី២សម្រាប់កម្មវិធី Cambodian Net Idol ដែលឆ្នាំនេះ រៀបចំដោយក្រុមហ៊ុន Cake Experiential និងសហការឧបត្ថម្ភធំដោយក្រុមហ៊ុន Yes018 ។កម្មវិធីនេះ បាននាំយកបេក្ខភាព Influencer ក្នុងស្រុកជាច្រើនឲ្យមកជួបជុំគ្នាបង្ហាញពីទេពកោសល្យ និងទាក់ទាញអ្នកទស្សនាបានរាប់លាននាក់នៅលើទំព័រហ្វេសប៊ុកផ្លូវការរបស់ Yes018 ជារៀងរាល់សប្តាហ៍។

ក្នុងនាមជាអ្នករៀបចំកម្មវិធី លោក Andy Ong នាយកប្រតិបត្តិនៃក្រុមហ៊ុន Cake Experiential បានឲ្យដឹងថា លោកមោទកភាពណាស់ចំពោះការបង្កើតកម្មវិធីនេះឡើង ជាកន្លែងដែលយុវវ័យបានបញ្ចេញពីទេពកោសល្យរបស់ពួកគេ។ លោកសង្ខឹមថា ពួកគេនឹងបន្តគោលបំណងរបស់ CNI ដែលបង្កើតឡើងក្នុងគោលបំណងជាវិជ្ជមានដល់ប្រជាជនកម្ពុជាទាំងអស់។

ងាកលោក Jeck Tan មកពី Yes018 ក៏បានបន្ថែមថា លោកក៏រីករាយដូចគ្នា ក្នុងនាមជាម្ចាស់ឧបត្ថម្ភធំនៃកម្មវិធី។ លោកថា លទ្ធផលនៃកម្មវិធីនេះ បានបង្ហាញជាវិជ្ជមានពីសញ្ញានៃការគាំទ្រ Net Idol និងការបង្កើតមាតិកាសម្រាប់ការជំរុញគម្រោងផែនការអាជីវកម្មរបស់ក្រុមនានានាពេលអនាគត។ ពិសេសតាមរយៈបានចូលរួមលើកកម្ពស់ក្នុងការយល់ដឹងអំពីអ្វីទៅជាប្រព័ន្ធ 5G និងវិធីដែលប្រព័ន្ធនេះអាចផ្តល់អត្ថប្រយោជន៍ដល់ប្រជាជនកម្ពុជាទាំងអស់៕