ឡូយណាស់តើ ស្រីតូចច្រឡឹង តីតី ក្តាប់បានតំណែងតួឯកក្នុងភាពយន្តលើកកម្ពស់ប្រាក់រៀល

2020-03-19 03:25:53
ព័ត៌មាន

2020-03-19 03:25:53
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការបញ្ជាក់ពីសាមីខ្លួន គឺតារាស្រីកាចឆ្នាសឆ្នើម សេង ម៉ានិត ហៅតីតី បានឲ្យដឹងថា នាងនឹងលេចវត្តមានក្នុងការសម្តែងក្នុងភាពយន្តខ្លីបែបអប់រំមួយ ផលិតដោយជនជាតិបារាំង ដែលមានគោលបំណងលើកកម្ពស់ ការប្រើប្រាស់ប្រាក់រៀលខ្មែរដែលជារូបិយប័ណ្ណជាតិ។

រូបភាព៖ផ្ដល់ដោយសាមីខ្លួន(ក្រេឌីត៖ L Media)

នេះគឺជាលើកទី១ដែលតារាសម្តែងស្រីវ័យ ២៦ ឆ្នាំបានសម្ដែងក្នុងរឿងរបស់ផលិតករបរទេស។ តីតី ប្រាប់ថា នេះជាឱកាសធំមួយដែលទទួលបាន ហើយនាងរំពឹងថា វានឹងជាការបើកផ្លូវសម្រាប់ការងារសិល្បៈរបស់នាង។ តីតី ត្រូវបានផលិតករជនជាតិបារាំង លោកPaul Maux បានជ្រើសរើសនាងឲ្យចូលរួមសម្តែងក្នុងតំណែងជាតួឯកក្នុងភាពយន្តអប់រំថ្មីគឺរឿង ”ស្រលាញ់រៀល”។ តីតី ប្រាប់ថា នាងពិតមានមោទកភាពណាស់ដែលសម្រេចបានសមិទ្ធផលមួយនេះ។

តារាស្រីរាងតូចច្រឡឹង ប្រាប់ថា ភាពយន្តនេះទើបនឹងបញ្ចប់ការថតកាលពីពេលថ្មីដោយនាង បានសម្តែងជាមួយតារាសម្តែងស្រស់សង្ហា លោក ខាយ។ អ្វីដែលធ្វើឲ្យនាងពេញចិត្តទៀតនោះ ក៏ព្រោះតែសាច់រឿងបានចូលរួមចំណែកលើកតម្កើងប្រាក់រៀលខ្មែរ ហើយថា រឿងនេះ ក៏ស្ថិតក្រោមការគាំទ្រពីធនាគារជាតិកម្ពុជា និងសារមន្ទីរសេដ្ឋកិច្ច និងរូបិយវត្ថុ ព្រះស្រីឥសានវរ្ម័ន ឫហៅកាត់ ថា ស.ស.រ ផងដែរ។

តារាសម្តែង តីតី ត្រូវបានគេស្គាល់ច្រើនចាប់តាំងពីនាងចូលរួមសម្តែងតាំងពីវ័យកុមារក្នុងឈុតឆាកសុំលុយម៉ែទៅរៀនក្នុងភាពយន្តខ្លីមួយ ហើយចុងក្រោយនេះនាងត្រូវបានគេស្គាល់តាមរយៈភាពយន្តភាគ និងភាពយន្តខ្នាតធំមួយចំនួនដូចជារឿង “ធញ្ជ័យ” “កន្ទោងខៀវ” រឿង ”វេទមន្តស្នេហ៍” រឿង ”ឥទ្ធិពលស្នេហ៍ក្នុងភ្លើងបណ្តាសា” និងរឿងជាច្រើនទៀត។ ក្នុងរឿងទាំងនោះ ភាគច្រើននាងសម្តែងជាតួអង្គកាចឆ្នាសឆ្នើម។