មិនឲ្យនៅផ្ទះអផ្សុក LD ត្រៀមដាក់៦រឿងចូលឆ្នាំនេះ ឲ្យមើលបានពីផ្ទះតែម្ដង

2020-04-08 08:59:42
ព័ត៌មាន

2020-04-08 08:59:42
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម អិលឌី ទើបបានបញ្ចេញឲ្យដឹងពីផែនការថ្មីមួយចំពេលដែលបាន និងកំពុងមានវិបត្តិមនុស្សពិបាកធ្វើដំណើរឆ្ងាយពីផ្ទះ ដោយគ្រោងដាក់បញ្ចេញខ្សែភាពយន្តរបស់ខ្លួនដល់ទៅ៦រឿងឯណោះនាឱកាសបុណ្យចូលឆ្នាំថ្មីប្រពៃណីជាតិខ្មែរនេះ។

"ទែនៗ ៦រឿងតែម្តងនេះ!!! ចូលឆ្នាំខ្មែរឆ្នាំនេះបងប្អូននៅផ្ទះមិនអផ្សុកទេ!”។ ផែនការនេះ ផលិតកម្មខាងលើបានហៅដោយខ្លួនឯងថាជា "កម្មវីធីមើលរឿងនៅផ្ទះប្រឆាំងនឹងកូវីដ១៩"។ ចំពោះគោលបំណង គឺបញ្ចៀសប្រិយមិត្តរបស់ខ្លួនពីភាពអផ្សុក ពិសេសគឺដើម្បីជាចំណែកមួយក្នុងការចូលរួមទប់ស្កាត់ការឆ្លងរាលដាលចូលសហគមន៍។

បែបនេះហើយ តាមការបញ្ជាក់ រឿងទាំង៦នោះ នឹងត្រូវដាក់បញ្ចូលទៅលើឆាណែលយូធូបផ្លូវការរបស់ខ្លួនតែម្ដង ដែលអាចឲ្យប្រិយមិត្ត ទស្សនិកជនអាចទស្សនាបាន ខណៈពេលមិនអាចធ្វើដំណើរចេញពីផ្ទះទៅក្រៅបានដោយសារ Covid-19 នេះ។

យ៉ាងណាមកទល់នឹងពេលនេះ ខ្សែភាពយន្តខ្នាតធំណាខ្លះ នឹងត្រូវយកដាក់បញ្ចាំងលើប្រព័ន្ធបណ្ដាញសង្គមនោះ នៅមិនទាន់ដឹងនៅឡើយទេ ខណៈលោក លៀក លីដា នៅមិនទាន់អាចសុំការអធិប្បាយបន្ថែមបាន។ ប៉ុន្តែបើយោងតាមការផ្សព្វផ្សាយនៅលើទំព័រហ្វេសប៊ុកផ្លូវការរបស់ផលិតកម្ម គឺរឿង "អាខ្វាក់អាខ្វិន" សម្ដែងដោយនាយ គ្រឿន ជា សុវណ្ណារាហ៍ ម៉ាក សែនសូនីតា ជាដើម ទំនងជារឿងមួយក្នុងចំណោម៦ ដែលនឹងត្រូវដាក់បញ្ចាំង។

ឈុតខ្លះៗក្នុងរឿង "អាខ្វាក់អាខ្វិន"

ដោយឡែកចំពោះ កាលបរិច្ឆេទពិតប្រាកដនៃការដាក់បញ្ចាំងវិញនោះ ផលិតកម្មបានឆ្លើយតបទៅអ្នកគាំទ្ររបស់ខ្លួនថា ផែនការ ក៏ដូចជាយុទ្ធនាការបញ្ចាំងភាពយន្តដើម្បីការចូលរួមទប់ស្កាត់ការឆ្លងរាលដាលចូលសហគមន៍នេះ គឺនឹងត្រូវចាប់ផ្ដើមនៅថ្ងៃទី ១៣ មេសា ខាងមុខ ដែលជាថ្ងៃទី១នៃបុណ្យចូលឆ្នាំប្រពៃណីជាតិខ្មែរយើងតែម្ដង៕

អត្ថបទ៖ ទារិកា