ការយល់ច្រឡំជាប់ខ្សែនាយ កុយ ធ្វើឲ្យ ចេនឡា កាន់តែមានទីផ្សារ(វីដេអូ)

2017-03-20 02:25:37
ជីវិតតារា

2017-03-20 02:25:37
ចំនួនមតិ 0 | ចំនួនចែករំលែក 0

ចន្លោះមិនឃើញ

មានកំណើតមកពីឃុំ ត្រើយស្លា ស្រុក ស្អាង ខេត្ត កណ្ដាល គួបផ្ដុំមុខមាត់ពីធម្មជាតិ ដូចទៅនឹងតារាកំប្លែងជើងចាស នាយកុយ ធ្វើឲ្យមហាជនយល់ច្រឡំជាច្រើនថា លោក ចេនឡា គឺជាកូនបង្កើតរបស់នាយកុយ។ ការយល់ច្រឡំនេះ ធ្វើឲ្យតារារូបនេះមានទីផ្សារកាន់តែច្រើន។

លោក ចេនឡា បានថ្លែងថា មហាជនដែលជួបលោកជាពិសេសពេលចុះទៅសម្ដែងនៅតាមខេត្តម្ដងៗ ក្នុងនោះស្ទើរតែ៨០% បានយល់ច្រឡំថា លោកគឺជាកូនបង្កើតរបស់នាយកុយ ។ ជាការពិតតារារូបនេះ មិនមានជាប់សាច់ឈាមទាល់តែសោះជាមួយនាយកុយ គ្រាន់តែមានស្រុកកំណើត មកពីឃុំ ត្រើយស្លា ស្រុក ស្អាង ខេត្ត កណ្ដាល ដូចគ្នាប៉ុណ្ណោះ។

តារាខាងលើបន្តឲ្យដឹងថា ដោយសារតែមុខមាត់ពីធម្មជាតិស្រដៀងនាយកុយ ខ្លួនត្រូវបាននាយក្រិន បានយកមកសម្ដែងកំប្លែងជាមួយ។ ការផ្លាស់ប្ដូរពីការច្រៀងមកកំប្លែង មិនមែនជារឿងលំបាកសម្រាប់លោកឡើយ ចេនឡា ត្រូវបានក្រុមកំប្លែងនាយក្រិនយកទៅសម្ដែងជាមួយបន្តបន្ទាប់ មកទល់បច្ចុប្បន្ន លោកសម្ដែងកំប្លែងជាមួយក្រុមនាយក្រិន បានប្រហែល២ឆ្នាំមកហើយ។ កម្មវិធីរបស់លោកឡើងសម្ដែងកំប្លែង គឺនៅស្ថានីយទូរទស្សន៍អាស៊ីអាគ្នេយ៍ និង ចុះកាត់សក់ការគេម្ដងម្កាល។

មិនត្រឹមតែមានទីផ្សារកំប្លែងលើអាជីពតារាចម្រៀងដែលខ្លួនមានស្រាប់ឡើយ ចេនឡា ក៏ចាប់ផ្ដើមមានទីផ្សារភាពយន្តជាបន្តបន្ទាប់។ លោកថ្លែងបន្តឲ្យដឹងថា ក្នុងវិស័យភាពយន្ត លោកបានធ្លាប់សម្ដែងជិត២០រឿងមកហើយ។

ទោះបីជាមានមុខមាត់ស្រដៀងនាយកុយ និងបានសម្ដែងកំប្លែង ជាមួយសមាជិកក្នុងក្រុមកំប្លែងនាយកុយ ច្រើនឆ្នាំហើយក្ដី ចេនឡា ថា ខ្លួនមិនទាន់បានជួបមុខនិយាយលេងជាមួយនាយកុយឡើយ។ សូមស្ដាប់វីដេអូ លោក ចេនឡា ជុំវិញមហាជនយល់ច្រឡំខ្លួនថា ដូចនាយកុយ និង ទីផ្សារសិល្បៈរបស់លោក ដូចតទៅ៕

អត្ថបទ៖ ស៊ុនហួត