ឆ្នាំ ២០១៨ នេះ អៀង ចេនឡា ស្រាប់តែជួសតំណែងនាយ កុយ ក្នុងរឿងកំប្លែង១រឿង

2018-02-07 03:06:50
ព័ត៌មាន

2018-02-07 03:06:50
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាកំប្លែង អៀង ចេនឡា បានបង្ហាញពីរីកចម្រើនអាជីពកំប្លែងរបស់ខ្លួន នាឆ្នាំ ២០១៨ នេះ ដោយអាចស្នងតំណែងលោក ជួង ជី ហៅ នាយ កុយ ផងក្នុងខ្សែភាពយន្តបែបកំប្លែង "ជ័យគ្រត"។

នោះជាខ្សែភាពយន្តកំប្លែងថ្មីមួយទៀត ដែលផលិតដោយទូរទស្សន៍ក្នុងស្រុកមួយនាឆ្នាំ ២០១៨នេះ។ ចេនឡា ប្រាប់ថា លោកបានតំណែងជាតួឯក ក្នុងរឿងថ្មីនេះ ខណៈដើមឡើយ សម្ដែងដោយនាយ កុយ និងនាង គ្រត កាលអតីតកាល។ តារាសម្ដែងភាពយន្ត និងបានប្ដូរមកកំប្លែងរូបនេះ លើកឡើងថា លោករីករាយណាស់ ព្រោះនោះជាតំណែងតួឯកលើកដំបូង។

កន្លងមក ចេនឡា ធ្លាប់តែសម្ដែងកំប្លែងលើឆាក និងសម្ដែងក្នុងវីដេអូសំណើចខ្លីៗមួយចំនួន ក្នុងនាមជាតារាកំប្លែង។ ដោយឡែកការសម្ដែងក្នុងខ្សែភាពយន្តនានា គឺធ្លាប់តែសម្ដែងជាតួអង្គឪពុក ឬអ្នកបម្រើប៉ុណ្ណោះ មិនធ្លាប់សម្ដែងជាតួឯកឡើយ។ អៀង ចេនឡា បានចាប់ដៃគូជាមួយ នី មុន្នីនាថ នាមជាតួឯកស្រីប្រុសក្នុងរឿង "ជ័យគ្រត" ឆ្នាំ ២០១៨នេះ រួមជាតារាប្រុសស្រី ក្មេងចាស់ជាច្រើនរូបទៀត ត្រៀមនឹងបញ្ចាំងជូនទស្សនាឆាប់ៗនេះលើកញ្ចក់ទូរទស្សន៍ថោន។

និយាយពីខ្សែភាពយន្តបែបកំប្លែង "ជ័យគ្រត" ធ្លាប់ត្រូវបានលើកយកមកសម្ដែង ឬក៏យកមកថតដោយក្រុមផលិតជាច្រើនរួចមកហើយ។ ដំបូងឡើយ លោក ជួង ជី ហៅ កុយ បានយកផលិតក្នុងអំឡុងឆ្នាំ ២០១៣ ដោយលោកបានចូលរួមសម្ដែងដោយខ្លួនឯងតែម្ដង ជាមួយអ្នកស្រី អ៊ុន សុភឿន ដែលជាប់ឈ្មោះ "នាងគ្រត" មកដល់បច្ចុប្បន្ន ក្រោយសម្ដែងជាតួអង្គ "នាងគ្រត" រឿងនេះ។

បន្តមកទៀត "ជ័យគ្រត" ក៏ត្រូវលើកយកមកសម្ដែងដោយក្រុមកំប្លែងនាយពែកមីដែរកាលពីឆ្នាំ ២០១៦ មុនពេល មានការផលិតជាថ្មីទៀតដែល អៀង ចេនឡា ឆក់បានតំណែងជាតួឯកនាពេលនេះ ជាមួយតារាស្រីដែលកំពុងជាប់ក្ដីក្ដាំរឿង "បោកប្រាស់ទំនុកចិត្ត" ជាមួយអតីតគូស្នេហ៍ គឺកញ្ញា នី មុន្នីនាថ។

វិលមកលោក អៀង ចេនឡា ដើមឡើយ គឺជាតារាចម្រៀង និងសម្ដែងភាពយន្ត។ ប៉ុន្តែនៅឆ្នាំ ២០១៥ ដោយមើលឃើញថា ទីផ្សារកំប្លែង លោកក៏បានប្ដូរមកជាតារាកំប្លែងវិញ ដោយលេងជាមួយក្រុមនាយកុយ ប្រចាំទូរទស្សន៍អាស៊ីអាគ្នេយ៍។ សាមីខ្លួនអះអាងថា ក្រោយប្ដូរអាជីព ទីផ្សារការងាររបស់លោក កាន់តែរីកចម្រើន កេរ្តិ៍ឈ្មោះរបស់កាន់តែល្បីមែន។

លោកថា ប្រជាប្រិយរបស់លោកកាន់តែល្បីខ្លាំង មានគេស្គាល់ច្រើន គឺក្រោយចូលសម្ដែងក្នុងឈុតកំប្លែងខ្លីៗរបស់កម្មវិធី "ដូច្នឹងផង" និង "ប្រហុកធីវី"៕