- 2018-10-30 03:10:06
- ព័ត៌មាន
មិនធម្មតា ឆាយ វីរៈយុទ្ធ បង្ហាញមហិច្ឆតាធំក្នុងជំនួញមាសស
- 2018-10-30 03:10:06
- ចំនួនមតិ 0 | ចំនួនចែករំលែក 0
មិនធម្មតា ឆាយ វីរៈយុទ្ធ បង្ហាញមហិច្ឆតាធំក្នុងជំនួញមាសស
ចន្លោះមិនឃើញ
ខណៈដែលមិត្តរួមអាជីពចម្រៀងជាច្រើនបាន និងកំពុងវក់វីរកស៊ីពុះដីឡូតិ៍លក់ លោក ឆាយ វីរៈយុទ្ធ ឯណេះរួមជាមួយភរិយា វក់វីនឹងមុខជំនួញមាសស ឬអង្ករ ដែលបានប្រាប់ថា លោកមានមហិច្ឆតាធំក្នុងជំនួញនេះ។
មហិច្ឆតារបស់តារាចម្រៀងសាន់ដេ គឺលោកចង់ធ្វើជាអ្នកជំនួញផ្គត់ផ្គង់អង្ករដ៏ធំមួយក្នុងស្រុក ខណៈបច្ចុប្បន្នកំពុងបាន និងកំពុងពង្រីកខ្លួនបន្តិចម្ដងៗ។ លោក ឆាយ វីរៈយុទ្ធ បានចាប់ផ្ដើមចេញរកស៊ីជំនួញយ៉ាងចេញមុខ ក្រោយតែប៉ុន្មានខែប៉ុណ្ណោះ បន្ទាប់ពីលោកបានរៀបការជាមួយអ្នកនាង សែ ចាន់ឌី កូនថៅកែម៉ាស៊ីនស្រូវ ហាក់ សែ កាលពីពាក់កណ្ដាលឆ្នាំ ២០១៧។
យ៉ាងណា តារាចម្រៀងបានបញ្ជាក់ថា លោក បានរកស៊ីជំនួញនេះ តាំងពីលោក និងភរិយានៅជាគូដណ្ដឹងម្ល៉េះ ប៉ុន្តែទើបតែលូកដៃខ្លាំងក្រោយរៀបការ។ ជំនួញមាសសនេះ គូស្វាមីតារាចម្រៀងបាន ដាក់ឈ្មោះថា "ស្ដេចអង្ករ" ដែលបើកដំណើរដំបូងមានត្រឹម២ទីតាំងប៉ុណ្ណោះនៅរាជធានីភ្នំពេញ គឺនៅម្ដុំ កាំកូស៊ីធី និងតាមបណ្ដោយផ្លូវឧកញ៉ា ម៉ុង ឫទ្ធី។ ប៉ុន្តែបច្ចុប្បន្នលោកបាន ពង្រីកបានរហូតដល់៤ទីតាំងហើយ។
“បាទ...ឥឡូវយើងពង្រីកបាន៤ទីតាំងហើយនៅរាជធានីយើងនេះ ហើយតាមសាមីខ្លួន អាជីវកម្មមួយនេះ គ្រោងបើកសាខា១ទីតាំងបន្ថែមទៀត ឆាប់ៗខាងមុខនេះ...តាមពិតមិនទាន់បានបង្ហើបទេ ដល់ឥឡូវហើយសួរហើយប្រាប់តែម្ដង គឺបើកថែមមួយទៀតឆាប់ៗនេះហើយ ហើយខ្ញុំនៅមានមហិច្ឆតាបន្ថែមទៀត"។
តាមម្ចាស់បទ "ទឹកលុយសម្លាប់ទឹកចិត្តខ្ញុំហើយ" ដំណាក់កាលទី១នេះ លោកនឹងខិតខំពង្រីកខ្លួននៅរាជធានីសិន ជំហានបន្ទាប់នឹងទៅតាមបណ្ដាខេត្តទៀត។ "ឥឡូវយើងវ៉ៃនៅភ្នំពេញសិន ទៅមុខទៀត អាចនឹងទៅខេត្តនានាទៀត ពិសេសខេត្តដែលមានសក្ដានុពល...រាល់ថ្ងៃកំពុងតែសិក្សាមើលសិន!”។ ឆាយ វីរៈយុទ្ធ បន្ថែម។
អ្នកនាង សែ ចាន់ឌី ជាភរិយា ក៏លូកដៃខ្លាំងដែរក្នុងជំនួញជួញដូរអង្ករខាងលើ ហើយថ្មីៗនេះ អ្នកនាងទើបនឹងត្រូវបានអញ្ជើញដោយសហរដ្ឋអាមេរិក ទៅទទួលការបណ្ដុះបណ្ដាលបន្ថែមជំនាញសហគ្រិនថែមទៀតផង៕
